Տեխնիկական կանեփի վերաբերյալ ներկայացված տվյալներն ուռճացված են. գյուղատնտես

Տեխնիկական կանեփի վերաբերյալ ներկայացված տվյալներն ուռճացված են, այս նախագիծն այլ նպատակներ է հետապնդում: «Հայկական ժամանակ»-ի հետ զրույցում նման տեսակետ հայտնեց գյուղատնտես Հարություն Մնացականյանը:

Նշենք, որ այսօր ՀՀ կառավարությունը հավանություն տվեց «Թմրամիջոցների մասին» օրենքին եւ կից օրենքներին: Նախագիծը վերաբերում է արտադրական եւ արդյունաբերական կանեփի աճեցման եւ հետագայում վերամշակման գործընթացին:

Փոխվարչապետի պաշտոնակատար Տիգրան Ավինյանը նախագիծը ներկայացնելիս նշեց, որ տեխնիկական կանեփն օգտագործվում է բազմազան ոլորտներում եւ ապրանքատեսակներում, ինչպիսիք են՝ տեքստիլը, ավտոմոբիլային արտադրությունը, կահույքի մեջ է օգտագործվում, թղթի, շինանյութի, խնամքի պարագաների, բժշկության մեջ: Ըստ էության այս նախագծով Կառավարությունը նպատակ ունի անցնելու բարձրարժեք մշակաբույսերի աճեցմանը: «Ներկայումս ԵՄ տարածքում կանեփի մշակությամբ զբաղվում են 21 երկրներում: Ընդ որում՝ 1 հեկտար տեխնիկական կանեփի վերամշակումից կարելի է ստանալ միջինը 75-ից 210 լիտր ՍԲԴ յուղ, 6 տոննա ծղոտ, որը կարելի է վերածել մոտավորապես 1.5 տոննա մանրաթելի: Արդյունաբերական կանեփի մշակությունը թույլատրված է նաեւ Ռուսաստանում, ԱՄՆ մի շարք նահանգներում, Չինաստանում, Իսրայելում, Կանադայում, Ավստրալիայում եւ այլ երկրներում»,- նշել էր Ավինյանը՝ հավելելով, որ 1 տոննա հումքի արտահանման համար գործելու է մոտավորապես 60 մլն դրամ տուրքի չափ:

«Եթե պետությունը նման որոշում է կայացնում գոնե առնվազն պարտավոր էր ուսումնասիրել ոլորտը, գոնե գյուղացիներին պետք է ներկայացնեին, թե կանեփից ինչ են ստանում: Ենթադրենք ստանում են ՍԲԴ յուղ, այդ յուղի ինքնարժեքը որքան է, ինչ գնով է հնարավոր արտահանել: Կամ, թե օրինակ՝ կանեփի թելն ինչ արժե»,- նշեց Մնացականյանը:

Նրա կարծիքով՝ ոչ մի հաշվարկ չկա եւ շատ հավանական է, որ մարդիկ շահագրգռված մտնեն կանեփի արտադրության տակ եւ լուրջ վնասներ կրեն, իսկ ինչ-որ անձինք լուրջ շահույթներ կստանան այդտեղ, խոսքը՝ կանեփի սածիլներ ներկրողների, համակարգը սարքողների մասին է:

«Սրա երկրորդ էֆեկտն այն է լինելու, որ թմրանյութերի շրջանառությունը վերահսկողությունից դուրս կգա: Քանի որ չեն կարողանալու վերահսկել, թե որ կանեփն է սատիվա, որը ինդիկա: Հնդկական ինդիկան կանեփը պարունակում է տետրահիդրոկանաբինոլ, իսկ սատիվան տեխնիկական կանեփն է»,- նշեց գյուղատնտեսը՝ հավելելով, որ սկսելու են ինդիկա արտադրել, չի ստացվելու վերահսկել եւ խառնվելու է իրար ամեն ինչ:

Ըստ նրա՝ սրա արդյունքում թմրամիջոցների առք ու վաճառքով զբաղվողները մեծ եկամուտներ ու շահույթներ են ստանալու:

Հարցին՝ այսինքն պետությունը տեխնիկական կանեփի արտադրությունից շահելու փոխարեն տուժելո՞ւ է, Մնացականյանը դրական պատասխան տվեց. «Մի քանի հոգի շահելու են, հիմնականում այն սպեկուլյանտները, որոնք կանեփի սածիլներ են վաճառելու գյուղացիներին, որպեսզի աճեցնեն: Գյուղացիները կանգնելու են փաստի առաջ, կանեփը տարածվելու է ամբողջ երկրով մեկ՝ անկանոն, որովհետեւ թռչունները, միջատներն այդ սերմերը տանելու են: Թմրանյութի առք ու վաճառքով զբաղվողներն առիթից օգտվելու են եւ տարբեր տեղերում աճեցնելու են»:

Անդրադառնալով հարցին, ըստ իրեն ո՞րն է նման նախագիծ օրակարգ բերելու նպատակը, եթե բացասական այդքան կողմեր կան, գյուղատնտեսը ասաց. «Կոնկրետ 2-3 հոգի շահագրգիռ անձ մեծ գումարներ են աշխատելու: Կառավարության մեջ էլ քանի որ մեծամասնությունը ոլորտից անտեղյակ եւ անգրագետ են, նրանց աչքերին թոզ են փչել: Կասկածներ ունեմ, որ անգամ որոշ անդամներ շահագրգռված են ու այդտեղ փայաբաժին ունեն»:

Նա ընդգծեց՝ տեխնիկական կանեփի մասին ներկայացվող եկամտաբերության վերաբերյալ տվյալները խիստ չափազանցված են:

Մնացականյանի խոսքով՝ Հայաստանում մեծ մասշտաբի հողեր ունեցողներ չկան, որոնք այդ գործով կզբաղվեն. «Մի բան էլ ասեմ. այդ կանեփը շահութաբեր է հիմնականում այն երկրներում, որտեղ մարիխուանան օրինականացված է: Բերելու են Հայաստան, տարածվելու է անկանոն, վերահսկողությունից դուրս է գալու եւ լինելու է այն, ինչ լինելու է»:

Հարցին՝ արդյունքում ոչ մեկ տեխնիկական կանեփ չի՞ աճեցնելու, գյուղատնտեսը պատասխանեց. «Տեխնիկական կանեփ գյուղացիները շահագրգռված ցանելու են: Մտածելու են միլիոններ են աշխատելու: Կամ շահույթ չեն ստանալու կամ շատ ցածր շահութաբերություն են ստանալու»: