«ժողովուրդը պետք է դատի Հայաստանի բոլոր ղեկավարներին՝ Լ. Տեր-Պետրոսյանին, Ռ. Քոչարյանին, Ս. Սարգսյանին, Ն. Փաշինյանին»

Փարաքարից հետո «Քաղաքացիական պայմանագիր» կուսակցության քարոզարշավի հաջորդ կանգառը Էջմիածին քաղաքն էր: Քաղաքի հրապարակում հայրենիքի համար մարտերում իրենց կյանքը զոհվածների հիշատակը մեկ րոպե լռությամբ հարգելուց հետո կուսակցության նախընտրական ցուցակը գլխավորող Նիկոլ Փաշինյանը հայտարարեց.

«Շատերը ձեզ փորձում են էսօր համոզել, որ ահա, տեսա՞ք, է՞դ էիք ուզում, ստացա՞ք, բա լավ չէ՞ր՝ ընտրությունները կեղծվում էին, թալանվում էիք, տներից դժվարությամբ էիք դուրս գալիս, բայց գոնե մեր հայրենիքի ամբողջականությունը եւ անվտանգությունն ապահովված էին: Սո՛ւտ է, չհավատա՛ք դրան, ընդհակառակը, էս հանգրվանին մենք հասել ենք այն պատճառով, որ երկար տարիներ ՀՀ քաղաքացին ազատություն չի ունեցել ստեղծագործելու, արարելու, թեկուզ՝ բիզնեսի ասպարեզում»:

Ըստ Փաշինյանի՝ ՀՀ քաղաքացին հենց թեկուզ գործարարության ասպարեզում պետք է ազատ աշխատելու եւ ստեղծագործելու հնարավորություն ունենար, որ պետական բյուջեն լիներ կրկնապատիկ եւ եռապատիկ, որ անվտանգության ոլորտի ծախսերը լինեին կրկնապատիկ եւ եռապատիկ: 

«Ձեզնից շատերի երեխաները այս ընթացքում ծառայել են բանակում, եւ դուք գիտեք տասնյակների, հարյուրների, որոնք ազատվել են բանակից առանց դրա համար որեւէ պատճառ ունենալու, որովհետեւ բանակի ամբողջ հոգսը դրված է եղել շարքային քաղաքացիների ուսերին: Զինվորին ուղարկել եք, հետեւից՝ կոշիկ, սնունդ, քիչ էր մնում՝ զենք-զինամթերքի ձեռքբերումն էլ դնեին ծնողի վրա»,- ասաց նա: 

Վարչապետի պաշտոնակատարի համոզմամբ՝ «էս ընտրությունների ամենակարեւոր որոշելիքը հետեւյալն է. ժողովուրդը պետք է դատի Հայաստանի բոլոր ժամանակների ղեկավարներին՝ Լեւոն Տեր-Պետրոսյանին, Ռոբերտ Քոչարյանին, Սերժ Սարգսյանին, Նիկոլ Փաշինյանին»:  

Իր անունից վստահեցրեց՝ ենթակա է ցանկացած դատավճռի:

Խոսելով այն մասին, թե հնարավոր է՝ ընտրությունները կեղծվեն, որեւէ մեկի ձայնը տեղ չհասնի՝ Փաշինյանն ասաց. «Չհավատաք որեւէ մեկին, որ կասի, թե ձեր ձայնը կասկածի տակ է: Սա 2013 կամ 2017 թիվը չէ, կամ 2008, 2003 թվականը, որ ասեն՝ ինչքան կուզենք, կխփենք: Էս ընտրություններում միայն ու միայն ժողովուրդը ինչքան կուզի, կխփի»:

Վարչապետի պաշտոնակատարը նաեւ Էջմիածնում խոսեց բանակում իր իշխանության օրոք արված բարեփոխումների մասին: 

Նախ՝ թվելով, թե ինչ գնումներ են իրականացրել եւ այլն, Փաշինյանը շեշտեց. «Եթե դուք բանակում մեր արածի տեմպի մեկ երրորդը նախորդ 20 տարում պահեիք, մենք կունենայինք իսկապես անպարտելի բանակ... Մենք եկել ենք եւ ժառանգել ենք ստահոդ պետություն, որտեղ կա ֆուտլյար եւ չկա բովանդակություն, որտեղ բոլոր պետական պաշտոնյաները առավոտ գործի են գնում ոչ թե պետությանը եւ մարդկանց ծառայելու, այլ գռփելու: Պետական կառավարման ամբողջ համակարգը թաթախված է եղել կոռուպցիայի մեջ, բանակից սկսած՝ դատարաններով վերջացրած»: 

Նա խոստովանեց՝ գիտի, բոլոր խնդիրները ամբողջությամբ չեն լուծել, բայց նաեւ հիշեցնելով Սոդոմ-Գոմորի հայտնի պատմությունը՝ հավելեց. «Մենք պետական համակարգում կադրային ջարդ չենք արել, որովհետեւ հավատացած ենք եղել, որ այնտեղ գոնե 100 արդար կա, դատական համակարգը չենք ավերել, որովհետեւ հավատացած ենք եղել, որ 30 արդար դատավոր կա: Բոլորին տվել ենք շանս, եւ, այո՛, շատերը այդ շանսը օգտագործել են մեր դեմ, պետության դեմ: Բայց ես չեմ փոշմանում դրա համար, մենք մաքուր ենք մնացել Աստծո առաջ, ժողովրդի առաջ եւ ուզում ենք, որ դուք մեր դատը անեք»:

Վերջում Փաշինյանը էջմիածինցիներին կոչ արեց հունիսի 20-ին գնալ տեղամաս եւ ցույց տալ Նիկոլ Փաշինյանին իր տեղը, Սերժ Սարգսյանին իր տեղը, Ռոբերտ Քոչարյանին իր տեղը, Լեւոն Տեր-Պետրոսյանին՝ իր: