ՍԴ-ն որակապես բարելավվել է, բայց դատավորներից երկուսը անհարիր կերպով քաղաքականացված են. փաստաբան

4-րդ օրն անընդմեջ Սահմանադրական դատարանը այսօր շարունակեց հունիսի 20-ի արտահերթ ընտրությունների արդյունքների վիճարկման հարցով «Հայաստան», «Պատիվ ունեմ» դաշինքների, «Զարթոնք» եւ «Հայոց Հայրենիք» կուսակցությունների դիմումների քննությունը: 

ՍԴ-ում ընթացող գործընթացի վերաբերյալ զրուցել ենք իրավաբանական գիտությունների թեկնածու, փաստաբան Գրիգոր Մինասյանի հետ.

- Պարոն Մինասյան, արդեն 4-րդ օրն է՝ Սահմանադրական դատարանում շարունակվում է ընտրությունների արդյունքների վիճարկման գործով նիստը: Աննախադեպ մեծ ծավալի նյութեր են ուսումնասիրվում, երբեմն մինչեւ ուշ երեկո աշխատում է դատարանը: Հաշվի առնելով, որ Բարձր դատարանի նորացված եւ ամբողջական կազմի աշխատանքին հրապարակավ հետեւելու հնարավորություն է ստեղծվել, խնդրում եմ ձեր կարծիքն ասել այդ մասին:

- Շատ դրական է, որ Սահմանադրական դատավարությունը մեր հանրության համար թափանցիկ է, ու առավել դրական է, որ այս դատավարությունը առաջացրել է հանրության որոշ հատվածի հետաքրքրությունը: Ցավալի է միայն, որ այս ամենի արդյունքում հանրությունը տեսնում է առանձին դատավորների կողմից այնպիսի տգեղ դրսեւորումներ, որ կարող է խարխլվել ՍԴ առանց այդ էլ խախուտ հեղինակությունը:

 - Եթե հետեւում եք նիստերին, հավանաբար կփաստեք, որ երբեմն-երբեմն որոշ դատավորներ հանդես են գալիս այնպիսի միջնորդություններով ու հարցադրումներով, որ տպավորություն է ստեղծվում, թե լսում ենք կողմերից որեւէ մեկին: Ըստ ձեզ կարելի՞ է ասել, որ ՍԴ-ն շարունակում է լինել քաղաքականացված:

- Հենց դրա մասին էի խոսում: Երկու դատավորներ կարծես մոռացել են, որ իրենք այլեւս քաղաքական գործիչներ չեն ու կողմերից ոչ մեկին չեն ներկայացնում: Նիստին մի զավեշտալի դեպք եղավ, երբ այդ երկու դատավորներից մեկը դիմումատուի ներկայացուցիչ Դավիթ Հարությունյանի փոխարեն ինքը սկսեց պատասխանել ՔՊ ներկայացուցիչ Ռուստամ Բադասյանի հարցին, որը վերաբերում էր 2018 թվականին Սերժ Սարգսյանի հրաժարականի իրավական ձեւակերպումներին: Շատ ավելի կոնկրետ Ձեր հարցին պատասխանելով` կարելի է ասել, որ ՍԴ-ն որակապես բարելավվել է, բայց առնվազն երկու ՍԴ դատավոր անհարիր կերպով քաղաքականացված են:

- Անուններ կնշե՞ք, ո՞ւմ նկատի ունեք: 

- Եթե հետեւել եք նիստին՝ վստահաբար տեսած կլինեք, որ Ռուստամ Բադասյանի հարցին պատասխանում էր Հրայր Թովմասյանը: 

- Իսկ երկրորդը Արեւիկ Պետրոսյանի՞ն նկատի ունեք:

- Այո:

- Ի՞նչ կարծիք ունեք ներկայացված դիմումների բովանդակության մասին: Մասնագետների կողմից կարծիքներ են հնչում, որ դրանք հիմնված են ենթադրությունների ու մտահոգությունների վրա. համամի՞տ եք:

- Արդեն որերորդ օրն է` բոլորս լսում ենք ավելի շատ միտինգային հայտարարություններ, քան իրավաբանական փաստեր: Մենք որոշ դիմումատուներից լսում ենք դավադրության տեսություններ, բայց չենք կարողանում գտնել գեթ մեկ տրամաբանական կապ անվերջ հորդող մեղադրանքների ու անարդար լինելու մեջ: Դիմումատուները չեն կարողացել նույնիսկ ընտրական հանձնաժողովներին ու վարչական դատարան ներկայացնել որեւէ բողոք, որովհետեւ այդ պարագայում պիտի կոնկրետ փաստեր նշվեին, իսկ ՍԴ-ում կարելի է գալ ու քաղաքական ելույթներ ունենալ, խոսել հասարակության հոգեբանության մասին, կամ էլ` պնդել, որ վարչապետը, եթե անվտանգության աշխատակիցների հետ է շրջել, դրանով կեղծվել է ընտրությունների արդյունքները: Ահա այսպիսի իրավաբանությունից հեռու վիճակ է այժմ` ՍԴ-ում:

- Գործով որպես պատասխանող ներգրավված ԿԸՀ նախագահը երեկ կարծիք է հայտնել, որ ներկայացված բոլոր դիմումներն էլ պետք է մերժվեն: Անձամբ դուք ի՞նչ սպասելիք ունեք այս գործով: Հնարավոր համարո՞ւմ եք հակառակը՝ այսինքն ներկայացված դիմումների բավարարումը:

- Երբ աշխարհի բոլոր գործընկեր գերտերությունները, բոլոր օբյեկտիվ միջազգային ու տեղական դիտորդներն այս ընտրությունները ճանաչում են բացարձակ լեգիտիմ, ապա ինչպես կարելի է ՍԴ որոշումից այլ բան սպասել: Եթե հանրությունն ընդհանրապես չի ընդվզում ընտրություններից հետո, նույնիսկ հազար մարդ ցույցի դուրս չի գալիս, ապա ինչպես կարող է արդար դատարանը համարել, որ ընտրությունները չեն արտահայտել հանրության կամքը: Ես համոզված եմ, որ դիմումները կմերժվեն:

- Պարոն Մինասյան, Սահմանադրական դատարանի այս կամ այն որոշումը կփարատի՞ դիմումատուների մտահոգությունները, թե՞ մերժման դեպքում նրանք կշարունակեն պնդել, որ ընտրությունները արդար չեն եղել:

 - Հուսով եմ` դիմումատուներից ամենաողջամիտները նույնպես կուրախանան, երբ ավարտվի հենց իրենց համար ոչ նպաստավոր այս դատավաորությունը: Խորհրդարան անցած ուժերը կարող են արդեն հանգիստ պնդել, որ արեցին ամեն հնարավորը, եւ վերցնեն մանդատներն ու ավելի հանրօգուտ գործ անեն ԱԺ-ում: Նույնիսկ խորհրդարան անցած ուժերը պիտի որ ուրախանան ՍԴ-ի կողմից իրենց դիմումների մերժումից: Չէ որ իրենք էլ մեր երկիրը սիրող մարդիկ են ու չեն ուզենա երկիրը տանել դեպի քաոս, քանի որ օրինական ընտրությունները չեղարկելով կամ արդյունքը փոխելով ՍԴ-ն կառաջացնի լուրջ հանրային ընդվզում, ինչը խայտառակ բացասական ազդեցություն կունենա թե՛ երկրի տնտեսության, եւ թե՛ նաեւ մեր պաշտպանունակության վրա: Հուսով եմ` ողջամտությունը կհաղթի ՍԴ-ում: