Մենք պետք է համոզված լինենք, որ մեր երեխաների հետ աշխատող մարդիկ ունեն պատշաճ որակավորում. Փաշինյան

ՀՀ կառավարությունն այսօրվա նիստում սահմանեց նախադպրոցական ուսումնական հաստատությունների` պետական բյուջեից մեկ սանի հաշվարկով ֆինանսավորման կարգը, այդ թվում՝ կրթության եւ զարգացման առանձնահատուկ պայմանների ապահովման համար անհրաժեշտ ֆինանսավորման բարձրացված չափաքանակը:

Հարցը զեկուցող ՀՀ կրթության, գիտության, մշակույթի եւ սպորտի նախարարի պաշտոնակատար Վահրամ Դումանյանն ասաց, որ ՀՀ կառավարությունը որպես ռազմավարական նպատակ որդեգրել եւ իրականացնում է նախադպրոցական տարիքի երեխաների համընդհանուր կրթության ապահովման քաղաքականություն:

«Սակայն նախադպրոցական կրթության եւ ծառայությունների շարունակական մատչելիության ապահովման համար սահմանված չէ ֆինանսավորումը կարգավորող նորմատիվային իրավական ակտ: Դրա բացակայության պատճառով խիստ տարբեր են համայնքային նախադպրոցական հաստատություններում երեխաների կրթական ծրագրերի իրականացման նյութատեխնիկական եւ ուսումնամեթոդական պայմանները, նախադպրոցական մանկավարժական կադրերի վարձատրությունը»,- ներկայացրեց ԿԳՄՍ նախարարի պաշտոնակատարը:

Նրա խոսքով՝ նախադպրոցական ծառայությունների ֆինանսավորման համար մի դեպքում ելակետային է համարվում երեխաների փաստացի միջին հաճախումների թիվը, մյուս դեպքում հաստատության տարիֆիկացիայով հաստատված պլանային թիվը: Արդյունքում ֆինանսական հատկացումների զգալի տարբերություններ են ստեղծվում. «Այլ խնդիր է նախադպրոցական տարբեր հաստատությունների կողմից իրականացվող ծախսերի անհամամասնությունը եւ դրանց ֆինանսավորման էական տարբերությունները՝ համայնքից համայնք, ինչպես նաեւ Երեւանի տարբեր վարչական շրջաններում: Հաստատությունների մանկավարժական անձնակազմի աշախտանքի վարձատրությունների չափը միեւնույն կրթական ցենզի, միեւնույն ստաժի պայմաններում շատ տարբեր են: Բացակայում են նաեւ ՀՀ օրենսդրությամբ սահմանված աշխատողներին ուղղվող խթանման ֆոնդի հնարավորությունները»:

Դումանյանն ասաց, որ ներկայացվող ֆինանսավորման կարգը նպատակ ունի կանոնակարգել դաշտը՝ առաջարկելով միասնական մեթոդաբանություն նախադպրոցական հաստատությունների ֆինանսավորման առումով. «Առաջին փուլում կգործի իբրեւ պետական բյուջեի ֆինանսավորման հատկացման մեթոդաբանություն, հետագայում կարող է նաեւ ուղենիշային հանդիսանալ ոլորտի ֆինանսավորման համար ընդհանրապես»:

Հաշվի առնելով, որ համաձայն վիճակագրության նախադպրոցական կրթությունը հատկապես դժվար հասանելի է որոշ խմբերի համար, որոնք այդ ծառայություններից օգտվելու համար կարիք ունեն հավելյալ աջակցության, ինչպես նաեւ առաջնորդվելով նախադպրոցական կրթության մասին օրենքով սահմանված առաջնահերթություններից՝ նախագծով առաջարկվում է ֆինանսավորումն իրականացնել հետեւյալ խմբերի երեխաների համար ներկայացվող ժամանակացույցով՝

2022 թ. սեպտեմբերի 1-ից կրթության եւ զարգացման առանձնահատուկ պայմանների կարիք ունեցող երեխաների համար,

2023 թ. սեպտեմբերի 1-ից՝ ընտանեկան նպաստ ստացողների համակարգում հաշվառված ընտանիքների երեխաների համար,

2024 թ. սեպտեմբերի 1-ից՝ 3 եւ ավելի երեխա ունեցող ծնողների երեխաների համար,

2025 թ. սեպտեմբերի 1-ից զինծառայող ծնողի երեխաների համար:

ՀՀ վարչապետի պաշտոնակատար Նիկոլ Փաշինյանը հետաքրքրվեց՝ փաստորեն սրանով 1 սանի ֆինանսավորման հետ կապված չափաքանակն են ավելացնում կոնկրետ խմբերի հասցեականությունն ապահովելո՞վ, ինչին Վահրամ Դումանյանը դրական արձագանքեց:

Փաշինյանը 2 դիտարկում արեց նախագծի հետ կապված. «Փաստորեն մենք 2022 թվականի սեպտեմբերի 1-ից հնարավորություն ենք ստեղծում, որպեսզի դաստիարակ ուսուցիչների աշխատավարձերի որոշակի բարձրացում տեղի ունենա որոշակի հատվածներում: Ես առաջարկում եմ հետեւյալը, որ մենք որպեսզի հատվածական չգործենք պայամանվորվենք, որ աշխատավարձի բարձրացումը տեղի է ունենալու ատեստավորումից հետո: Այսինքն՝ մենք բարձրացնելու ենք միայն այն ուսուցիչ-դաստիարակների աշխատավարձը, որոնք անցած կլինեն ատեստավորում եւ հաստատ կլինեն իրենց որակավորումը: Ինչքան էլ, որ մենք այս փուլում խոսում ենք տարբերությունները հավասարեցնելու մասին, միեւնույն է, եթե մենք ավել ֆինանսական միջոց ենք ծախսում այդտեղ պարտադիր պետք է որակի բաղադրիչը լինի»:

Երկրորդ դիտարկումը վարչապետի պաշտոնակատարի խոսքով՝ վերաբերում է՝ 2024 թվականի սեպտեմբերի 1-ից 3 եւ ավելի երեխա ունեցող ծնողների երեխաներին. «Մենք ունենք նաեւ այլ ծրագիր, որ 3-րդ եւ յուրաքանչյուր հաջորդ երեխայի համար պետք է սահմանենք նպաստ: Ես կարծում եմ, որ մենք այս կետը պետք է դեռ թողնենք այստեղ: Եթե մենք բավականին շոշափելի աջակցություն ենք ցուցաբերելու 3 եւ ավելի երեխա ունեցող ընտանիքներին, հետեւաբար այս միջոցները պետք է վերահասցեագրենք կամ էլ այլ մեխանիզմ գործի, որ այդ գումարները հաշվանցվեն, որովհետեւ ճիշտ չի լինի, որ այդպիսի ճեղք առաջանա տարբեր երեխաների միջեւ: Այս 2 պայմանը պարտադիր է, որպեսզի մեր քաղաքականությունները ներքին կապերը չկորցնեն: Սրանից հետո պայմանավորվենք հետեւյալը՝ կրթական համակարգում մենք պարտադիր պետք է իրականացնենք աշխատավարձերի բարձրացման քաղաքականություն, բայց դա չի կարող տեղի ունենալ առանց որակավորման բարձրացման եւ հաստատման: Սա ռազմավարական հարց է, մենք պետք է համոզված լինենք, որ մեր երեխաների հետ աշխատող մարդիկ ունեն պատշաճ որակավորում»: