Գործնական այցով Մոլդովա մեկնած գյումրեցի աղջիկները վերադառնալ չեն կարող. խնդրի մասին տեղյակ են նաև ՀՀ ԱԳՆ-ում

Փետրվարի 21-ին գործնական այցով Մոլդովա մեկնած Մարիամն ու Վալյան վերադառնալ չեն կարող: Աղջիկները Գյումրու «Երիտասարդական նախաձեռնությունների կենտրոն» (ԵՆԿ) ՀԿ ներկայացուցիչներն են, որոնք Մոլոդվայում մասնակցում էին Արևելյան գործընկերության երկրներում և Ռուսաստանում Եվրամիության «Erasmus+ երիտասարդություն» և «Եվրոպական համերաշխության կորպուս» ծրագրերի տեղեկատվական կենտրոնների տարածաշրջանային տարեկան հանդիպմանը։

Տեղեկատվական կենտրոնների աշխատանքն այս տարի կրկին համակարգելու է Գյումրու ԵՆԿ-ն, ներկայացուցիչներն էլ գնացել էին գործընկերների հետ հանդիպման՝ մինչ այս կատարած աշխատանքի ամփոփման և նոր անելիքների համակարգման հստակեցումների նպատակով: Հետ էին վերադառնալու փետրվարի 24-ին:

«Հետ վերադառնալուց առաջ մեր աշխատակիցները նամակներ են ստացել ավիաընկերություններից, որ թռիչքը չեղարկվում է, բայց չէին հասկացել, թե խնդիրն ինչո՞ւմն է, որովհետև պատերազմի մասին տեղեկություն չեն ունեցել: Ավելի ուշ պատվիրակության բոլոր անդամների թռիչքներն են չեղարկվել»,- «Հայկական ժամանակի» հետ զրույցում տեղեկացրեց ԵՆԿ ՀԿ նախագահ Արթուր Նաջարյանը:

Պատվիրակության այն անդամները, որոնք ունեցել են շենգենյան վիզա, կարողացել են արագ Մոլդովայի միակ բաց սահմանով՝ Ռումինիայով մեկնել իրենց երկրներ: ՀՀ-ից Մարիամն ու Վալյան, ՌԴ 2 ներկայացուցիչները, 1 բելառուսցի և ադրբեջանցի աղջիկ շենգենյան վիզա չունենալու պատճառով մինչ օրս մնացել են Մոլդովայում:

Այս պահին նրանց կացարան է հատկացվել: Որոշակիորեն լեհական կողմը, որը նաև հրավիրողն է, սննդի հարցն է կարգավորում: Մոլդովայում մնացած աղջիկներն իրենք են հոգում այլ ծախսերը՝ մինչև կարողանան ելք գտնել ու հասնել Ռումինիա:

«Ճիշտ է, բավական նորմալ տեղավորված ենք, կենտրոնական հատվածում է մեր ժամանակավոր կացության վայրը: Կազմակերպիչները, որոնք Լեհաստանից են, հոգ են տարել, որ որևէ խնդրի չբախվենք, բայց, ամեն դեպքում, անձնական կազմակերպման հարցեր ենք ունեցել: Մենք ինքներս ենք մեր գործընկերների հետ միասին զբաղվել, օրինակ, կացարան գտնելու և այլ հարցերով, որոնց, իհարկե, իրենք էլ աջակցում են»,- մեզ հետ զրույցում ասաց Վալյա Մարտիրոսյանը:

Լեհական կողմն աղջիկներին առաջարկել է դիմել Մոլդովայում Լեհաստանի հյուպատոսարան և փորձել գոնե բազմակի մուտքի երկարաժամկետ վիզա ստանալ, որով հնարավոր կլինի հատել Մոլդովայի սահմանն ու հասնել Ռումինիա:

«Հիմա եթե այդ երկարաժամկետ վիզան ունենանք, կկարողանանք գնալ Ռումինիա ու այնտեղից էլ հասնել Հայաստան: Սպասում ենք հյուպատոսարանի պատասխանին, եթե ստացվեց այդ վիզան, սկսելու ենք Մոլդովայից դուրս գալու ելք որոնել արդեն: Ցանկացած հնարավորություն կօգտագործենք՝ մեքենա, ավտոբուս, գնացք և այլն»,- մանրամասնեց Մարիամ Ղարագյոզյանը:

Մարիամն ասաց, որ ԱԳՆ-ում ևս տեղյակ են: Երբ փորձել են Մոլոդվայում ՀՀ դեսպանատան հետ թեժ գծի միջոցով կապ հաստատել, պարզվել է, որ դեսպանատունը Մոլդովայում փակված է, միայն թեժ գիծն է գործում: Զանգից հետո աղջիկների հետ կապ են հաստատել ՀՀ ԱԳՆ-ից:

«Զանգեցին, տեղեկացան իրավիճակի մասին, գիտեն, որ մենք այստեղ ենք: Երկրորդ անգամ զանգեցին՝ մեր մասին իմանալու համար: Իրենք այս պահին առանձնապես բան չեն կարող անել, ուղղակի տեղեկանում են, թե դրությունն ինչպես է: Խոստացել են, եթե ինչ-որ արտակարգ թռիչք լինի կամ ինչ-որ հնարավորություն լինի Հայաստան գալու կամ հայրենակիցներին տեղափոխելու, մեզ տեղյակ կպահեն: Դրանից զատ այլ բան չկա»,- ասաց Մարիամը:

Թե ե՞րբ խնդիրը կկարգավորվի, աղջիկներն ասել չեն կարող, նրանց դեռ հստակ պատասխան չի տալիս նաև ԱԳՆ-ն: Վալյան ու Մարիամը սպասում են ուրբաթ օրը Մոլդովայում Լեհաստանի հյուպատոսարան ներկայացրած՝ իրենց երկարաժամկետ վիզա ստանալու դիմումի պատասխանին:

Սամսոն Մատինյան