«Մա՜մ, ես պետք է քննություն տամ, դո՞ւ ես լարվել». դիմորդները այսօր հանձնեցին առաջին միասնական քննությունը

Կենսաբանություն և աշխարհագրություն առարկաների միասնական քննությամբ այսօր տրվեց 2022 թվականի քննական շրջանի մեկնարկը: Ավելի քան 1635 դիմորդ հայտարարագրվել էր՝ քննություն հանձնելու կենսաբանություն առարկայից, իսկ 127-ը՝ աշխարհագրություն:

Ընդհանուր առմամբ գործում էր 15 քննական կենտրոն, որոնցից 11-ը՝ մարզերում, 4-ը՝ Երևանում:

Հատուկ լարվածությամբ, շտապողականությամբ Երևանի Գ. Գյուլբենկյանի թիվ 190 ավագ դպրոցի բակում դիմորդներից 120-ն էին հավաքվել: Վերջիններս քննական կենտրոն ներկայացան քննությունն սկսվելուց մեկ ժամ առաջ՝ ժամը 08:30-ին, ինչպես սահմանել է ԳԹԿ-ն: Նկատենք, որ այս դպրոցում դիմորդները կենսաբանություն առարկայից էին քննություն հանձնում:

Փոքր-ինչ լարված, հուզված՝ նրանք սպասում էին իրենց հերթին. ոմանք մտածում էին՝ ինչպիսին կլինեն թեստերը, ոմանք էլ իրենց ուղեկցող ծնողներին էին հանգստացնում՝ կատակելով, թե. «Մա՜մ, ես պետք է քննություն տամ, դո՞ւ ես լարվել»: Ի դեպ, իսկապես ծնողները է՛լ ավելի էին լարված, քան դիմորդները:

Կենսաբանություն հանձնող դիմորդների մեծ մասը «Հայկական ժամանակի» հետ զրույցում նշում էին՝ նպատակ ունեն ընդունվել Բժշկական համալսարան, իսկ նրանցից մեկն էլ կենսաբանություն առարկան հանձնելով՝ ցանկանում է ընդունվել Երևանի պետական համալսարան:

Նրանց խոսքով՝ հիմնականում կրկնուսույցների մոտ են պարապել առարկան՝ քննությունները հանձնելու համար: Անի Մխիթարյանը ևս նրանց թվում է, սակայն վերջինս շեշտում է՝ չնայած կրկնուսույցի մոտ պարապելուն, դպրոցը ևս համապատասխան գիտելիքներ տվել է:

«Ուզում եմ ընդունվել Երևանի պետական բժշկական համալսարան, հույս ունեմ՝ ամեն ինչ լավ կլինի: Երբ որոշում էի՝ դպրոցն ավարտելուց հետո ի՜նչ մասնագիտությամբ եմ շարունակելու ուսումս, ինքնըստինքյան կենսաբանություն առարկան հետաքրքիր դարձավ»,- ասում է նա:

Բժշկական համալսարանի ապագա ուսանողներ են նաև Լիլիթն Յայլոյանը, Սուրեն Ախպերջանյանը և Էմիլի Զաքարյանը: Սուրենը համոզված է՝ արագ կգրի և դուրս կգա, Լիլիթն ավելի շատ է մտահոգված, սակայն վստահ է՝ կարող է հաղթահարել: Էմիլին էլ, որը ապագա ատամնաբույժ է, առհասարակ լարվածություն չի զգում:

Դիմորդներից Ելենա Ասատրյան էլ մեզ հետ զրույցում ասում է՝ պատասխանատու օր է իր համար: Կենսաբանություն առարկայի քննության համար 8 ամիս պարապել է. «Բոլորը սպասում են, որ դու բարձր գնահատական պետք է ստանաս, ու դրանից մի փոքր ավելի եմ լարվում, բայց վստահ եմ եկել քննության: Ընդունվելու եմ Հայաստանի ազգային ագրարային համալսարանի անասնաբուժական բաժինը: Մեծ սիրով ու ոգևորությամբ եմ առաջ գնալու»,- վստահեցնում է նա:

Դիմորդներն թույլ էր տրվում իրենց հետ ունենալ հաշվիչներ, ջուր, զովացուցիչ ըմպելիքներ: Նախքան քննական սենյակ մուտք գործելը՝ քննական կենտրոնի անդամները նրանց զգուշացնում էին՝ հեռախոսը թողնել ծնողների մոտ, նոր մուտք գործել: Կային դիմորդներ, որոնք մոռացել էին բերել անձնագրերը, և նրանց հնարավորություն տրվեց ավելի ուշ մտնել քննական սենյակ, երբ անձնագիրը իրենց մոտ կլիներ արդեն:

Քննական կենտրոնի ղեկավար Վարդան Պարսամյանը լրագրողների հետ զրույցում տեղեկացնում է՝ դպրոցում քննություն հանձնողների թիվը 120 է, բացակայել է 4 դիմորդ:

«Բացակայած դիմորդների համար նախկինում կար կարգ, որ եթե դիմորդը բերի բժշկական տեղեկանք, ապա նրան թույլ է տրվում մասնակցել քննությանը: Հիմա փոփոխություններ են եղել, և դա հանվել է. բացակայող դիմորդին մնում է բողոքարկող հանձնաժողով դիմել և ներկայացնել դիմումը: Հանձնաժողովը կորոշի՝ տա՞լ հնարավորություն դիմորդին մասնակցելու քննությանը, թե՞ ոչ: Քննության ընթացքում խախտումներ կան, որ դիմորդը կարող է միանգամից հեռացվել, կա նաև, որ կարող է զգուշացում ստանալ, կրկնվելու դեպքում՝ հեռացվել»,- մանրամասնում է նա:

Ապագա ուսանողներին քաջալերելու համար Երևանի Գ. Գյուլբենկյանի թիվ 190 ավագ դպրոց էր եկել նաև ՀՀ ԿԳՄՍ փոխնախարար Կարեն Թռչունյանը: Շրջելով դպրոցի երեք քննասենյակներով՝ փոխնախարարը նախ հետաքրքրվում էր՝ դիմորդները լա՞վ են պատրաստվել քննությանը, լա՞վ են զգում իրենց: Վերջինիս զարմացրեց այն փաստը, որ դիմորդների մեծ մասը բժշկական համալսարան ընդունվելու համար էր քննություն հանձնում: «Չկա՞ Բժշկական չընդունվող ուսանող, բոլորն այնտեղ են ընդունվելու»,- հարցրեց փոխնախարարը:

Թռչունյանը խոսքով՝ դիմորդների ընդհանուր թվի շատ մեծ փոփոխություն այս տարի չկա, սակայն, կախված մասնագիտություններից, տարբերություններ նկատվում եմ: «Կան մասնագիտություններ, որ նվազել են, իսկ որոշ տեղերում՝ աճել: Սա բնական երևույթ է: Իհարկե, պահանջված մասնագիտություններն են «Իրավագիտությունը», «Մաթեմատիկան» և «Ինֆորմատիկան», սակայն պետք է նշեմ, որ վերջին տարիներին բնական գիտությունների նկատմամբ հետաքրքրությունը մեծացել է»,- լրագրողների հետ զրույցում ասում է նախարարը:

Նրա հավաստմամբ՝ նախարարությունը կատարելագործում և վերահսկում է քննական գործընթացի կազմակերպման ու իրականացման աշխատանքները՝ հաշվի առնելով նաև համապատասխան կառույցների արած առաջարկները: Մասնավորապես՝ 2023 թ. դիմորդներն արդեն երկու անգամ միասնական քննություն հանձնելու հնարավորություն կունենան:  

Քննության տևողությունը 3 ժամ էր: Ավարտից քիչ անց՝ ժամը 13:00-14:00, Գնահատման և թեստավորման կենտրոնը հրապարակելու է ճիշտ պատասխանները: Գնահատականները հրապարակվելու են քննությունը հանձնելու 5-րդ օրը, իսկ գնահատականը բողոքարկել կարելի է դրա հաջորդ օրը՝ մինչև ժամը 18:00-ն: