Բելառուսն Արցախ այցելած ռուս բլոգերին Ադրբեջանին արտահանձնելու որոշում է կայացրել

Արցախ այցելելու համար 2016 թվականի դեկտեմբերի 15-ին Մինսկում ձերբակալված հայտնի ռուս բլոգեր Ալեքսանդր Լապշինինին Ադրբեջանին արտահանձնելու մասին որոշում է կայացվել: Այդ մասին Լապշինի հիմնադրած հայտնի զբոսաշրջային «Живой журнал» կայքում գրառում է արել նրա ընկերուհին՝ որպես Եկատերինա ներկայացած մի կին՝ վկայակոչելով բլոգերից ստացած տեղեկատվությունը: «Ալեքսանդրը հայտնել է, որ մի քանի օր առաջ մեկուսարանում  ուժային կառույցների ներկայացուցիչներն իրեն իրազեկել են, որ արտահանձնման մասին որոշումն արդեն կայացված է: Որոշում է կայացվել, որ նրան Բաքու հասցնելուց հետո ուղարկելու են Իսրայել»,- գրել է Եկատերինան: Իր հերթին, Ադրբեջանի գլխավոր դատախազությունն այսօր հայտարարել է, որ անհրաժեշտ միջոցառումներ են ձեռնարկվում Ալեքսանդր Լապշինին Ադրբեջանին արտահանձնելու համար:

Ուշագրավ է, որ ադրբեջանական լրատվամիջոցներում տեղեկություն է հայտնվել, թե Ալեքսանդր Լապշինին Ադրբեջանին արտահանձնելուց հետո, այնտեղ նա ներողություն է խնդրելու առանց Բաքվի թույլտվության Արցախ այցելելու համար եւ ներման խնդրանքով դիմելու է Իլհամ Ալիեւին, որն էլ բավարարելու է այն:

Ռուսաստանի եւ Իսրայելի քաղաքացի հանդիսացող Ալեքսանդր Լապշինը 2011 թվականի ապրիլին եւ 2012 թվականի հոկտեմբերին այցելել է Արցախ, իսկ 2016 թվականի ապրիլի 9-ին՝ քառօրյա պատերազմից հետո, իր կայքում ծաղրել Արցախը զավթելու Բաքվի փորձերը: Բացի այդ, Լապշինը, որը հայտնի ճանապարհորդ է, իր այցելած 122 երկրների շարքում որպես անկախ պետություն հիշատակել է նաեւ Արցախը: Այս ամենի համար Ադրբեջանի գլխավոր դատախազության Ծանր հանցագործությունների հարցերով քննչական կոմիտեում նրա նկատմամբ քրեական գործ է հարուցվել քրեական օրենսգրքի 281.2 (պետության դեմ ուղղված հրապարակային կոչեր հնչեցնելը) եւ 318.2 հոդվածներով (Ադրբեջանի պետական սահմանների անօրինական հատում): Այս կապակցությամբ Ադրբեջանի գլխավոր դատախազության տարածած հաղորդագրությունում նշվում է.

«Մի շարք երկրների քաղաքացիություն ունեցող Ալեքսանդր Լապշինը, նախապես նախնական հանցավոր համաձայնության մեջ է մտել Ադրբեջանի գրավյալ տարածքներում բնակվող հայկական զինված ուժերի հետ, կոպտորեն խախտել է «Ադրբեջանի պետական սահմանների մասին» եւ «Անձնագրի մասին» օրենքները: 2011 թվականի ապրիլին եւ 2012 թվականի հոկտեմբերին նա Ադրբեջանի պետական սահմանները հատել է հսկիչ-անցագրային կետերից դուրս գտնվող տարածքից եւ առանց որոշակի փաստաթղթերի ներթափանցել է գրավյալ տարածքներ:

Անօրինական վարչակարգը միջազգային մակարդակով գովաբանելու նպատակով նա իրեն պատկանող «http//puerrtto.livejournal.com» կայքում իր այցելած երկրների շարքում Հայաստանի ու Ադրբեջանի հետ մեկտեղ թվարկել է նաեւ Լեռնային Ղարաբաղը՝ այն ներկայացնելով որպես անկախ պետություն: Բացի այդ, նա 2016 թվականի ապրիլի 6-ին եւ հունիսի 29-ին արած գրառումներում աջակցություն է հայտնել անջատական վարչակարգի անկախությանը եւ Ադրբեջանի տարածքային ամբողջականությունը պառակտող կոչեր հնչեցրել»: Դրա համար ռուս բլոգերին 5-7 տարվա ազատազրկում է սպառնում:

Սա առաջին դեպքն է, որ Ադրբեջանը փորձում է այլ երկրի քաղաքացի հանդիսացող անձի քրեական պատասխանատվության ենթարկել Արցախ այցելելու եւ հայկական երկրորդ պետության վերաբերյալ իր կարծիքը հայտնելու համար: Դատելով ադրբեջանական լրատվամիջոցների հրապարակումներից՝ Լապշինի նկատմամբ քրեական հետապնդման նպատակն է կանխել օտարերկրացիների այցերն Արցախ: Ըստ այդ հրապարակումների՝ Լապշինի հետապնդումը պետք է դաս լինի մյուսների համար:

Սակայն տարակուսանքների տեղիք է տալիս այն փաստը, որ Արցախ այցելած մոտ 500 արտասահմանցի  հասարակական, քաղաքական, մշակութային եւ այլ հայտնի գործիչներից որպես թիրախ, այսպես ասած՝ թույլ օղակ, ընտրվել է հենց Լապշինը: Այդ առումով որոշակի մտորումների տեղիք է տալիս այն փաստը, որ հայտնի ռուս բլոգերին ձերբակալել են Բելառուսի նախագահ Ալեքսանդր Լուկաշենկոյի՝ նոյեմբերի 28-ին Ադրբեջան կատարած այցից օրեր անց: Ինչպես հայտնի է, Լուկաշենկոն Իլհամ Ալիեւի հետ Բաքվում ստորագրած համատեղ հռչակագրով իր երկրի աջակցությունն էր հայտնել Ադրբեջանի տարածքային ամբողջականությանը: