«Ինչպիսի՜ խայտառակություն». Նիկոլ Փաշինյան-Տարոն Մարգարյան հեռակա բանավեճը

Երեւանի քաղաքապետի թեկնածուներ Նիկոլ Փաշինյանն ու Տարոն Մարգարյանը երեկ եւ նախօրեին հեռակա բանավեճի են բռնվել: Ինչպես հայտնի է՝ նրանց հեռուստաբանավեճը չի ստացվում, քանի որ ՀՀԿ-ն հայտարարում է, թե այս փուլում նպատակահարմար չի համարում դա:

«Ես Ճիշտն ասած չեմ լսել նման հայտարարություն: Թող փորձեն, մրցակցություն է տրված: Բայց ժողովուրդը արդյո՞ք համաձայն է, թե՞ ոչ: Իմ համար շատ կարեւորը մեր երեւանցիների կարծիքն է, ոչ թե մյուսների»,- ի պատասխան լրագրողների հարցերի երեկ Երեւանի Մալաթիա-Սեբաստիա վարչական շրջանում Տարոն Մարգարյանն այսպես է պատասխանել Երեւանի քաղաքապետարանը ՀՀԿ-ականներից ազատելու վերաբերյալ Նիկոլ Փաշինյանի հայտարարությանը:

Անդրադառնալով Աջափնյակում մետրոկայարան կառուցելու Փաշինյանի խոստմանը՝ Մարգարյանն ասել է. «Իսկ դուք հավատու՞մ եք: ...Ես տեղական ինքնակառավարման մարմիններում գրեթե 10 տարուց ավելի աշխատել եմ, լավ տիրապետում եմ քաղաքային տնտեսությանը եւ այսօր մենք շատ ուսումնասիրություններ ենք կատարել, նաեւ մետրոյի նոր կայարաններ ավելացնելու վերաբերյալ: Դրա համար շատ միջոցներ են անհրաժեշտ, հետագայում, երբ որ մեր քաղաքացիների առաջնային խնդիրները լուծենք՝ անպայման դրա մասին էլ կխոսենք»:

Մարգարյանը փորձել է արձագանքել նաեւ Նիկոլ Փաշինյանի հետեւյալ հայտարարությանը՝ «Երեւանի քաղաքապետարանի տրանսպորտի համակարգում այսօր 230 ավտոբուս կա, որոնց 90 տոկոսը սարքին վիճակում է, բայց երթուղի դուրս չեն գալիս: Ինչո՞ւ: Որովհետեւ, եթե երթուղի դուրս գան «Գազելների» գծատերերի շահույթը կպակասի: Կարող եք ասել՝ վարորդ չունեն: Դե թող ծառայողական ավտոմեքենաների վարորդներին կրճատեն, մի քիչ էլ աշխատավարձն ավելացնեն եւ ուղարկեն ոչ թե տրանսպորտի վարչության պետին տուն եւ աշխատանքի տանել, այլ՝ երեւանցիներին»: 

«Ինֆորմացիային այդքան լավ չի տիրապետում: Մեր քաղաքային տնտեսությանն այդքան լավ չեն տիրապետում»,- Մալաթիա Սեբաստիա համայնքում ընտրողների հետ հանդիպումից հետո լրագրողներին ասել է նա:

Հիշեցնենք, որ ուրբաթ օրը Հյուսիսային պողոտայում տեղի ունեցած հանրահավաքի ընթացքում Նիկոլ Փաշինյանը հայտարարել էր, թե պետք է մասնակցել բոլոր ընտրություններին եւ գյուղ առ գյուղ, քաղաք առ քաղաք Հայաստանը ազատագրել Հանրապետական կուսակցության միահեծան ապօրինի եւ կոռուպցիոն իշխանությունից:

Իր հերթին արձագանքելով ՀՀԿ-ականների եւ Տարոն Մարգարյանի հայտարարություններին, որ Նիկոլ Փաշինյանը երեւանցի չէ, իջեւանցի է՝ Նիկոլ Փաշինյանը այդ հանրահավաքում հայտարարել էր.

«Նախ, էսպես խոսողները, սիրելի երեւանցիներ, Երեւան քաղաքը չեն ճանաչում նույնիսկ 3-րդ դասարանի մակարդակով: Մի հատ եկեք շրջվենք եւ նայենք, թե ինչ փողոց է անցնում այստեղով: Պատկերացնո՞ւմ եք, մարդիկ չեն իմացել Երեւանի եւ երեւանցու մասին եւ այս հոյակերտ Երեւանի կենտրոնը անվանակոչել են լոռեցի Հովհաննես Թումանյանի անունով: Ինչպիսի՜ խայտառակություն: Մի քիչ վերեւ ես գնում՝ թիֆլիսեցի Սայաթ Նովայի անունն են բերել կպցրել, ինչպիսի՜ խայտառակություն: Մի քիչ ձախ նայեք՝ չարդախլվեցի Հովհաննես Բաղրամյանի անունով փողոց Երեւանի կենտրոնում, չեն էլ ամաչում: Երեւանի գլխավոր պողոտան, փոխանակ Տարոն Մարգարյանի անունով դնեն՝ բերել են հացեկացցի Մեսրոպ Մաշտոցի անունով են դրել, ինչպիսի՜ խայտառակություն: Աջ նայեք, չեն էլ ամաչում ջավախքցի Վահան Տերյանի անունով են բերել փողոց անվանակոչել: Բա էն ռոստովցի Մարտիրոս Սարյանը, ի՞նչ են բերել նրա անունով Երեւանում փողոց անվանակոչել:

Վանեցի Աղասի Խանջյանը, ղարաբաղցի Լեոն, ադրիանապոլսցի Հակոբ Պարոնյանը, աշտարակցի Պերճ Պռոշյանը, հաջիքենդցի Հովհաննես Իսակովը, նոր նախիջեւանցի Միքայել Նալբանդյանը, բաքվեցի Արսեն Ամիրյանը, գյումրեցի Ավետիք Իսահակյանը, կարսեցի Եղիշե Չարենցը, թիֆլիսեցի Նար-Դոսը, ի՞նչ բարոյական իրավունք ունեն Երեւանում անվանակոչված փողոցներ ունենալու: Բա տնաշեններ, ինչպիսի՜ խայտառակություն, Երեւանի պաշտոնական հիմնի բառերը գրել է, պատկերացնո՞ւմ եք չանախչեցի Պարույր Սեւակը: Էս ա Տարոն Մարգարյանի եւ նրան կից սոցիոլոգների մակարդակը, որովհետեւ նրանք միանգամից իրենց պադեզդի դիմացի ցեխից դուրս են եկել եւ հայտնվել Երեւանի քաղաքապետարանում, նրանք չգիտեն, թե ինչ է Երեւանը եւ երեւանցին»:

Փաշինյանը խոսել էր նաեւ իր եւ Տարոն Մարգարյանի հեռուստաբանավեճի շուրջ հնչած մեկնաբանությունների եւ, մասնավորապես, Տարոն Մարգարյանի շտաբի պետ Էդուարդ Շարմազանովի այն հայտարարության մասին, թե եթե պետք լինի՝ ՀՀԿ ավագանու ընտրությունների ՀՀԿ ցուցակի 50, 60-րդ համարներին կուղարկեն «Ելք»-ի քաղաքապետի թեկնածուի հետ բանավեճի.

«Անկեղծ ասած, էս արձագանքը ինձ համար ամենեւին էլ զարմանալի չէ, որովհետեւ ՀՀԿ-ի համար գործելակերպ է իրենց 60-րդ, 600-րդ, 6000-րդ համարներին ուղարկել զոհվելու եւ այդ ընթացքում նրանց թիկունքում քյաբաբ ուտել եւ միլիոններ աշխատել: Ես հասկանում եմ Շարմազանովին, որովհետեւ Տարոն Մարգարյանին ինձ հետ բանավեճի ուղարկելը նշանակում է նրան ուղարկել քաղաքական զոհաբերության, քաղաքական մատաղի՝ անլեզու գառան նման»,- նկատել էր Փաշինյանը՝ կոչ անելով մայիսի 14-ին գնալ ընտրական տեղամասեր եւ քվեարկել «Ելք» դաշինքի օգտին, որովհետեւ Տարոն Մարգարյանի հուսահատության գազելից ելք կա: