Արծվիկ. ցանկանում եմ լավ ելույթ ունենալ, որ երկիրս հպարտանա ինձնով

«Եվրատեսիլ 2017»-ում Հայաստանի ներկայացուցիչ Արծվիկը շատ ոգեւորված է մրցույթից առաջ: Նրա համար այս մրցույթին մասնակցելը մեծ երազանք է եղել, եւ Հանրային հեռուստաընկերության «Դեպի եվրատեսիլ» նախագծում տարած հաղթանակի շնորհիվ կիրականացնի այն: Այսօր՝ ապրիլի 27-ին, լրագրողների հետ հանդիպման ժամանակ նա կիսվեց իր սպասումներով:

«Մինչեւ հիմա հավատս չի գալիս, որ ես հաղթել եմ եւ գնում եմ ներկայացնելու Հայաստանը: Դա ինձ համար շատ մեծ պատասխանատվություն է: Ամեն ինչ անելու եմ, մեր թիմն ամեն ինչ անում է, որ լավ ներկայացնենք Հայաստանը Կիեւում»,- ասաց նա:

Ինչպես հայտնի է, Արծվիկն Ուկրաինայի մայրաքաղաքում կայանալիք մրցույթում ներկայանալու է «Fly with Me» երգով: Ստեղծագործության երաժշտության հեղինակներն են Լիլիթ եւ Լեւոն Նավասարդյանները, խոսքերի հեղինակները՝ Ավետ Բարսեղյանը եւ Դավիթ Ծերունյանը: Լիլիթ Նավասարդյանն ընդգծում է, որ ամեն ինչ արել են, որպեսզի երգի միջոցով հնարավոր լինի ցուցադրել Արծվիկի ողջ տաղանդը:

«Ինձ շատ ոգեշնչեց Արծվիկի ձայնը, նրա ձայնի մեջ առկա էթնիկ հնչերանգները, որոնք հիմք դարձան: Շատ ուզեցի, որ ձայնային այդ հայկական էլեմենտները երեւան ստեղծագործության մեջ: Երգը հետաքրքիր է նաեւ նրանով, որ դրանում կարծես քամիներ լինեն մոլորակի բոլոր մասերից. կան սլավոնական էլեմենտներ, շատերը նկատել են, որ ասիական՝ չինական էլեմենտներ կան, կան աֆրիկյան էլեմենտներ, բայց գլխավորը ինչի վրա կառուցվել է երգը, հայկական յարխուշտան է: Հայկական յարխուշտայի ռիթմն է օգտագործվել»,- ասաց նա՝ ավելացնելով, որ ստեղծագործությունը համապատասխանում է «Եվրատեսիլի» այս տարվա կարգախոսին՝ «Տոնենք բազմազանությունը»:

Երգի ու տեսահոլովակի հրապարակումից հետո դրա հետ կապված բազմաթիվ մեկնաբանություններ եղան: Հիմնականում քննադատվեց հենց այն, ինչը, ըստ Լիլիթ Նավասարդյանի, հետաքրքիր է դարձնում երգը՝ տարբեր մշակույթներից վերցված տարրերը: «Եվրատեսիլին» նախապատրաստվելու ընթացքում Արծվիկն այս երգով ներկայացել է եվրոպական մի քանի երկրներում (Իսրայել, Հոլանդիա) եւ նրա խոսքով՝ Եվրոպայում այն շատ են հավանել:

«Եվրոպայում հիացած էին, գուցե այստեղ մի փոքր չհասկացան, բայց կարծում եմ, որ թիմը եւ Լիլիթը գիտեն՝ ինչ են անում: Երգն ինձ դուր է գալիս, սիրել եմ այն, եւ ամեն ինչ կանեմ, որ հասցնեմ հանդիսատեսին այնպես, որ հավանեն ոչ միայն Եվրոպայում, այլեւ նրանք, ովքեր սկզբում չէին հավանել»,- ասաց նա:

Այս տարվա «Եվրատեսիլի» գլխավոր սկանդալը կապված էր Ռուսաստանի հետ: Ուկրաինան արգելեց Ռուսաստանի ներկայացուցիչ Յուլյա Սամոյլովային մուտք գործել իր տարածք, քանի որ նա եղել է Ղրիմում: Հետագայում խոսակցություններ տարածվեցին, թե նույն պատճառով վտանգված է նաեւ Արծվիկի մասնակցությունը, որը Մոսկվայում է բնակվում: Սակայն հայ երգչուհին վստահեցնում է, որ իր հետ նման խնդիր չի առաջանա:

«Ես Ղրիմում չեմ եղել, բայց ինձ պատմել են, որ շատ գեղեցիկ է: Ինչ վերաբերում է Յուլիային, կարծում եմ նա, ինչպես ես, հավատում է իր երազանքին, շատերը նրան նայելով ոգեշնչվում են: Կցանկանայի, որ նա այնտեղ լիներ: Ինձ համար սա տհաճ իրավիճակ է: Հուսով եմ՝ հաջորդ տարի նրա երազանքը կկատարվի, եւ նա կգնա ու կներկայացնի իր երկիրը»,- ասաց նա:

Հայաստանյան պատվիրակությունը Կիեւ է մեկնելու ապրիլի 30-ին: Մայիսի 1-ի տեղի է ունենալու 1-ին փորձը, մայիսի 5-ին՝ 2-րդը: Մայիսի 8-ին կայանալու է գլխավոր փորձը, որի ժամանակ քվեարկելու է ժյուրին: Մինչեւ մայիսի 9 Արծվիկը մասնակցելու է տարբեր միջոցառումների եւ հանդիպելու է ԶԼՄ-ների հետ: Ուկրաինայում նկարահանվելու է նաեւ տեսաբացիկի մի փոքր հատված (մեծ մասը նկարահանվել է Հայաստանում), քանի որ այս տարվա կանոնների համաձայն՝ ելույթից առաջ ցուցադրվող տեսաբացիկում պետք է լինեն նաեւ մասնակցի՝ մրցույթի ժամանակ ունեցած հույզերը:

Բեմադրության աշխատանքներին, ինչպես անցած անգամ, մասնակցել է Շվեդ ռեժիսոր Սաշա Ժան-Բապտիստը: Դրա հետ կապված մանրամասներ Արծվիկը չի բացահայտում, սակայն հայտնի է, որ բեմում լինելու է վարդագույնը: Արծվիկի հագուստի դիզայները լինելու է Ֆաինա Հարությունյանը: Բեմի վրա նրա հետ լինելու են 2 պարուհի Շվեդիայից (Մարլեն Լինդալ, Ֆաննի Սվենսոն) եւ 3 բեքվոկալիստ (Անուշիկ Տեր-Ղուկասյան, Ամալյա Մարգարյան, Վիկտորիա Պողոսյան):

«Եվրատեսիլ 2017»-ի 1-ին կիսաեզրափակիչը տեղի կունենա մայիսի 9-ին, 2-րդը՝ 11-ին, իսկ եզրափակիչը՝ 13-ին: Արծվիկը ելույթ կունենա 1-ին կիսաեզրափակչի ընթացքում 16 համարի ներքո: