Ինտերնետով խոպանից փող են ուզում, տեղեկանք ինչղ ուղարկեն. գյուղապետը նախագահից նեղսրտած է

ՀՀ կառավարության մայիսի 18-ի նիստում հաստատվեց համայնքների խոշորացման հերթական ծրագիրը: Ըստ այդմ՝ 361 համայնքի միավորման արդյունքում ձեւավորվելու է 30 համայնք:

Շիրակի մարզում խոշորացման արդյունքում ձեւավորվելու է երեք համայնք՝ Անի, Մարմաշեն եւ Ախուրյան:

Անի համայնքը ձեւավորվելու է 17 համայնքի միավորումից: Դրանք են՝ Մարալիկ, Աղին, Անիավան, Անիպեմզա, Բագրավան, Գուսանագյուղ, Իսահակյան, Լանջիկ, Լուսաղբյուր, Հայկաձոր, Ձիթհանքով, Ձորակապ, Շիրակավան, Ջրափի, Սառնաղբյուր, Սարակապ, Քարաբերդ:

Ախուրյանը կձեւավորվի 8 համայնքի՝ Ախուրյանի, Այգաբացի, Արեւիկի, Բասենի, Կամոյի, Կառնուտի, Հովիտի, Ջրառատի միավորումից:

Մարմաշենի կազմում կընդգրկվեն Մայիսյան, Լեռնուտ, Կապս, Կարմրաքար, Կրաշեն, Հացիկ, Հովունի, Մարմաշեն, Մեծ Սարիար, Շիրակ, Ջաջուռ, Ջաջուռավան, Վահրամաբերդ, Փոքրաշեն, Քեթի համայնքները: Այս համայնքների ընդհանուր թիվը 15-ն է:

Այսպիսով՝ Շիրակի մարզում, 39 գյուղական եւ 1 քաղաքային (Մարալիկ) համայնքների միավորումից կձեւավորվի երեք խոշորացված համայնք: Շիրակի մարզում նշյալ համայնքների ղեկավարներն ու բնակիչներն արդեն տեղեկացել են խոշորացման մասին եւ հասցրել են բողոքով դիմել Սերժ Սարգսյանին:

«Խոշորացումը մի խայտաբղետ բան է: Ամասիայում խոշորացրեցին, գյուղերում մարդ չկար, որ բողոքեն, բայց մեր մոտ՝ Ջաջուռից մինչեւ Մարմաշեն մի խառնաշփոթ, խաշիլ է դարձել: Ես հիմա հանգիստ նստած եմ, բայց չգիտեմ, թե ի՞նչ կկատարվի: Նախագային նամակ գրեցինք, պատասխան չստացանք»,- ասում է Մարմաշենի համայնքապետ Աշոտ Եղոյանը:

Վերջինս մտավախություն է հայտնում այն մասին, որ իր համայնքի բյուջեն ստիպված է լինելու բաժանել 16 համայնքի միջեւ: Այն դիտարկմանը, թե համայնքների միավորմանը զուգահեռ միավորվելու է նաեւ բյուջեները, համայնքապետն ասում է.

«Դա միայն ասում են, որ միավորվելու է, բայց հիմա ես Մարմաշենում ունեմ երաժշտական դպրոց, լուսավորված փողոցներ, իրականացնում եմ աղբահանություն, իսկ մյուս 15 համայնքում դրանք չկան: Միավորվելուց հետո, մեծ համայնքը պարտավորվելու է համաչափ զարգացնել մյուս համայնքները: Բայց ի՞նչ միջոցներով, թեկուզ նրանց բյուջեներն էլ միավորվեն՝ օգուտ չի լինի: Ես եթե հետագայում լինեմ համայնքի ղեկավար, ինչպե՞ս եմ վարվելու, միայն Մարմաշենի փողոցներն եմ մաքրելո՞ւ, միայն Մարմաշենի երեխաներն են անվճար օգտվելու երաժշտական դպրոցից, թե՞ մյուս համայնքներին էլ: Սրանք հարցեր են, որոնց մասին մտածել-մտածելով գլուխս պայթում է»,- նշում է Եղոյանը:

Աշոտ Եղոյանին մտահոգում է նաեւ այն, որ առ այսօր կայացած չէ լիազոր ներկայացուցիչների ինստիտուտը:

 «Հիմա էլ ասում են՝ օրինակ, եթե Ջաջուռի բնակչին տեղեկանք է պետք, նա պետք է մտնի ինտերնետով ուղղորդի իրա տեղեկանքի բովանդակությունը կենտրոնական գրասենյակ, ընդեղից էլ, էլի համացանցի միջոցով կլրացվի եւ կուղարկվի բնակչին: Էսի աբսուրդ է, մեր բնակիչների 90 տոկոսը համացանցին չեն տիրապետում, էն 90 տոկոսի տներն էլ չկա համակարգիչներ, ինտերնետ-մինտերնետներ ու եսիմ ինչեր: Սկայպով հազիվ խոպանից փող են ուզում, ինտերնետով տեղեկանք ինչղ ուղարկեն:

Լիազոր ներկայացուցիչները ունենալու են միայն շտաբներ, որոնցով կնքված տեղեկանքը բանկը չի վերցնելու: Մեր ժողովուրդն էլ ամեն օր վարկ է վերցնում, հիմա ամեն օր գնալ-գալու է, որ կենտրոնական գրասենյակը ստորագրի: Մենք բողոքում ենք, կառավարությունից ասում են՝ ամեն ինչ լավ կլինի: Բերում են Ամասիայի օրինակը, բայց ես էլ բերում եմ Դսեղի օրինակը, որտեղ ոչ մի բան չի գործում: Զարգացած Իսպանիայի մոդելն առել ընկել են խեղճ ու կրակ ժողովրդի ջանին»,- ասում է Աշոտ Եղոյանը:

Ապագայում ստեղծվելիք Անի համայնքի կազմ մտնող Գուսաննագյուղի ղեկավար Վասակ Ղազարյանն էլ դժգոհում է այն հանգամանքից, որ իր ղեկավարած համայնքը, ի թիվս այլ գյուղերի, միավորվելու է Մարալիկի հետ, որը իր տեսակով քաղաքային համայնք է:

«Մեր գյուղը ուզում էին միացնեին Ախուրյանին, մենք բռնիքն բողոքեցինք, հիմա էլ ուզում են Անիի կազմի մեջ մտցնեն: Խոշորացմանը ժողովուրդը համաձայն չէ, քանի որ մարդիկ տարբեր բնավորության անձիք են, յոլա չեն գնա: 17 համայնք իրար են միացնում, էդ ի՞նչ կեղնի: Գոեն էս սահմանամերձ 11 (Աղին, Լուսաղբյուր, Հայկաձոր, Սարակապ, Անիավան, Անիպեմզա, Բագրավան, Գուսանագյուղ, Իսահակյան Շիրակավան, Ջրափի) համայնքը իրար միացնեին: Գյուղերը իրարից հեռու են, հետո էլ միացնում են Մարալիկին: Մարալիկը քաղաք է, մենք` գյուղ: Ի՞նչ կեղնի մեր վիճակը: Մեր փոքր գյուղերը վարի կերթան, ինչ կա սաղ կքաշեն իրենց տակը: Հիմա շփվում ենք Աշոցքի, Ամասիայի ժողովրդի հետ, գյուղապետով, բանով սաղ բողոքավոր են»,- ասում է Գուսաննագյուղի ղեկավարը:

Մարզի խոշոր համայնքներից Ախուրյանի ղեկավար Արծրուն Իգիթյանը եւս դժգոհ է միավորմա ծրագրից: Վերջինիս չի մխիթարում այն հանգամանքը, որ միավորվող համայնքների կենտրոնն Ախուրյանն է լինելու: Ասում է, որ իր համայնքը զարգացած է, իսկ խոշորացման կազմում գտնվողները՝ խնդրահարույց:

«Մեր հանրապետությունում խոշորացման հայեցակարգ չկա: Տեղ կա երկու համայնք է միանում, տեղ կա՝ հինգ կամ 15: Հիմա էլ խոշորացնումը դարձնում են շրջանի մակարդակի: Չկա հստակ չափորոշիչ, թե ինչ կարգով պետք է խոշորացումը կատարվի: Ոնց որ ցանկության հարց լինի: Էն համայնքները, որոնք արդեն խոշորացվել են ֆինանսական որեւէ աջակցություն չեն ստացել»,- եզրափակում է Արծրուն Իգիթյանը: