Ուղեվարձը պետք է լինի ոչ թե թանկ կամ էժան, այլ արդար ու հասանելի. Երեւանի քաղաքապետարան

Հասարակական տրանսպորտի բարեփոխման աշխատանքային խումբը շարունակում է քննարկել ոլորտի կարգավորման վերաբերյալ միջազգային խորհրդատվական ընկերության առաջարկները:

Գործընթացին վերաբերող տեղեկատվությունը հանրությանը հասանելի դարձնելու նպատակով ստեղծված transport.yerevan.am կայքում նշվում է, որ նախատեսվում է, մասնավորապես, հետեւյալը.

- Երեւան քաղաքի ուղեւորահոսքերի հաշվարկների անկախ հետազոտության հիման վրա նախագծել նոր երթուղային ցանց, որը կօպտիմալացնի առկա ցանցերը, եւ քաղաքացիների համար առավել հարմարավետ ծառայություններ կապահովի,

- նախագծել հասարակական տրանսպորտի միասնական ցանց, որը կառուցված չի լինի բացառապես վերգետնյա տրանսպորտային միջոցների վրա եւ հնարավորություն կտա տրանսպորտային տեսակների փոխլրացմամբ առավել արագ ու հարմարավետ տեղաշարժվել Երեւան քաղաքում,

- ներդնել միասնական էլեկտրոնային տոմսային համակարգ, որը, անկախ վճարման տեսակից, հնարավորություն կտա թափանցիկ ու վերահսկելի դաշտ բերել ոլորտի ֆինանսական շրջանառությունը եւ կապահովի քաղաքացիների երթեւեկը շահավետ պայմաններով:

Ինչ վերաբերում է սակագնի թանկացման հավանականության մասին հարցին, կայքում հրապարակված պատասխանը սա է.

«Հասարակական տրանսպորտի սակագինը պետք է լինի ոչ թե թանկ կամ էժան, այլ արդար ու հասանելի ազգաբնակչության համար։ Սա կարեւորագույն սկզբունք է, որը ընկած է այս բարեփոխումների ռազմավարության հիմքում։ Բնականաբար, Երեւանի քաղաքապետարանը կձեռնարկի բոլոր հնարավոր միջոցները` առկա սակագինը չթանկացնելու համար, եւ գործընթացը կլինի բաց ու թափանցիկ»:

«Հայաստանի սպառողների ասոցիացիա» հասարակական կազմակերպության նախագահ Արմեն Պողոսյանը հասարակական տրանսպորտի բարեփոխման աշխատանքային խմբի անդամ է: Քննարկվող հարցերից որոշները նրա համար ընդունելի են, որոշների հետ համամիտ չէ: Ի դեպ, նա գտնում է, որ խմբում ընդգրկված մարդկանցից շատերը գաղափար չունեն ոլորտից:

«Այդ մասնակիցների մեջ կոմպետենտ մարդ շատ քիչ կա: Օրինակ` մեկը հարցրեց` իսկ դուք փողոցների թողունակությունը հաշվարկե՞լ եք: Բոլորը նրան նայեցին որպես աննորմալի: Ոչ մեկը չհասկացավ, որ դա ամենակարեւոր հանգամանքն է` քանի ավտոմեքենա կարող է երթեւեկել այս փողոցով, քանիսը` այն: Ասացին` այդ ավելորդ խնդիրներով մեզ մի շեղեք»,- նկատեց Արմեն Պողոսյանը:

Ինչ վերաբերում է քննարկվող նյութի վերաբերյալ ունեցած անհամաձայնությանը, հասարակական կազմակերպության ներկայացուցիչը կարծում է, որ առաջին հերթին պետք է որոշվի տրանսպորտի ոլորտը համակարգող մարմնի կազմակերպաիրավական ձեւը: «Առանց դրա` մնացածը կլինի կարկատանի նման մի բան: Իմիտացիա: Վիճակը էապես չի փոխվի»,- ասաց Արմեն Պողոսյանը:

Նրա խոսքով, միջազգային խորհրդատուն առաջարկել է, եւ հիմա էլ աշխատանքային խումբը քննարկում է, թե տրանսպորտի ոլորտում քանի օպերատոր պետք է լինի:  

«Իմ համոզմամբ դա աբսուրդ է: Եթե լինի կազմակերպություն, այդ կազմակերպությունն ինքը կվարձի օպերատորի: Օպերատորին ու սեփականատերը տարբեր բաներ են: Տնտեսագիտական հասկացությամբ, սեփականատերը վարձում է օպերատորին: Իսկ որ օպերատորը եւ սեփականատերը նույն մարդը լինեն, դա աբսուրդ է: Օպերատորը չի կարող հարց լուծել, ինքը սահմանափակված է»,- նշեց մեր զրուցակիցը:

Նա առաջարկում է, որ լինի բաց բաժնետիրական ընկերություն, որի բաժնեմասերի մի կեսը քաղաքապետարանին պատկանի, մյուս կեսը` ներկայիս, այսպես կոչված, գծատերերին: Բացի այդ, առանձին մարդիկ նույնպես կարողանան որոշ քանակով բաժնետոմս ունենալ:

Հաջորդ հարցը, որ խումբը, ըստ Արմեն Պողոսյանի քննարկում է, միացյալ տոմսն է:

«Այսինքն` ուղեւորը ոչ թե պետք է վճարի մեքենայի սրահի մեջ, այլ նախապես գնի տոմսը, որն ուժի մեջ կլինի որոշակի ժամկետում, ինչպես Եվրոպայում է: Դա շատ առողջ միտք է, եւ ես պաշտպանում եմ: Բայց սկզբունքային հարց չէ, այլ տեխնիկական: Այստեղ քննարկելու բան չեմ տեսնում: Դա զուր ժամանակի կորուստ է»,- կարծիք հայտնեց ՀԿ ղեկավարը:

Խոստացվում է, որ տրանսպորտային նոր համակարգը պետք է սկսի գործել 2018 թվականի հունվարից:

Հ.Գ. WYG միջազգային խորհրդատվական ընկերությանը, ինչպես ընդգծեց «Հայաստանի սպառողների ասոցիացիա» հասարակական կազմակերպության նախագահ Արմեն Պողոսյանը, հայկական կողմը վճարել է 840 հազար եվրո կամ ավելի քան մեկ միլիոն դոլար: