Արգենտինան, Պորտուգալիան աշխարհի առաջնությունում են, Հոլանդիան, ԱՄՆ-ն դուրս մնացին

Եվրոպական, հարավամերիկյան գոտում, ԿՈՆԿԱԿԱՖ-ում եւ Ասիայում Ռուսաստանում կայանալիք աշխարհի 2018 թ. առաջնության ուղեգրերի պայքարը մոտեցել է վերջին փուլին: Եվրոպական եւ հարավամերկյան գոտում երեկ՝ հոկտեմբերի 10-ին կայացան խմբային փուլի վերջին հանդիպումները: Ֆուտբոլասերների ուշադրության կենտրոնում էր Արգենտինայի հավաքականը, որի խաղը շատերը համարում են դժգույն եւ նշում, որ թիմն առաջ է գնում միայն Լիոնել Մեսիի շնորհիվ:

Երեկ «ալբիսելեստեն» աշխարհի 2018 թ. ուղեգիր նվաճեց հենց «Բարսելոնայի» առաջատարի օգնությամբ: Էկվադորի դեմ խաղում Արգենտինան գոլ բաց թողեց հանդիպման 1-ին րոպեին: Գոլի հեղինակ դարձավ Ռոմարիո Իբարան,  սակայն Մեսիի հեթ-տրիկի շնորհիվ Արգենտինան տարավ այդքան անհրաժեշտ հաղթանակը: «Ոսկե գնդակի» 5-ակի դափնեկիրն աչքի ընկավ 11-րդ, 18-րդ եւ 62-րդ րոպեներին:

Մինչեւ այս հանդիպումն Արգենտինան աննախանձելի վիճակում էր: Խմբում 6-րդ տեղում էր, եւ հնարավոր էր՝ նույնիսկ անցումային խաղերում ուղեգրի համար պայքարելու հնարավորություն չստանար, սակայն այս հաղթանակի շնորհիվ 28 միավորով զբաղեցրեց 3-րդ տեղը եւ ուղիղ ուղեգիր ստացավ դեպի Ռուսաստան:

Ուղեգրեր ստացան նաև Բրազիլիան (41 միավոր՝ 1-ին տեղ), Ուրուգվայը (31 միավոր՝ 2-րդ տեղ) եւ Կոլումբիան (27 միավոր՝ 4-րդ տեղ): Պերուն, որը մինչեւ վերջին՝ 18-րդ, տուրը 4-րդ տեղում էր, երեկ ոչ-ոքի (1:1) խաղաց Կոլումբիայի հետ եւ ձեռքից բաց թողեց ուղեգիրը: 26 միավորով զբաղեցրեց 5-րդ տեղը եւ կմասնակցի անցումային խաղերին: Ուղեգիրը կվիճարկի Օվկիանիայի հաղթողի՝ Նոր Զելանդիայի հետ: Չիլին, որը մինչեւ 18-րդ տուրը 3-րդն էր 26 միավորով, երեկ պարտվեց Բրազիլիային (0:3) եւ դուրս մնաց աշխարհի առաջնությունից:

Եվրոպայում բոլորը հետեւում էին Պորտուգալիայի ճակատագրին. արդյո՞ք թիմն աշխարհի առաջնության ուղիղ ուղեգիր ձեռք կբերեր, թե՞ ստիպված կլիներ մասնակցել անցումային խաղերին: B խմբի վերջին՝ 10-րդ տուրից առաջ Պորտուգալիան 2-րդն էր 24 միավորով: 3 միավորով ետ էր մնում առաջատար Շվեյցարիայից, որի հետ էլ 10-րդ տուրում պետք  է վիճարկեր 1-ին հորիզոնականը: Երեկ կայացած խաղում Շվեյցարիային բավական էր ընդամենը չպարտվել, սակայն չկարողացավ: Թիմը մրցակցի հարկի տակ 2 անպատասխան գնդակ բաց թողեց: Առաջինն ինքնագոլ էր: 41-րդ րոպեին սեփական դարպասը գրավեց Ժոան Ջուրուն: 51-րդ րոպեին աչքի ընկավ պորտուգալացիների հարձակվող Անդրե Սիլվան:

Եվրոպական գոտուց աշխարհի 2018 թ. առաջնությանը որակավորվեցին Ֆրանսիան (ընտրական A խումբ), Պորտուգալիան (B), Գերմանիան (C), Սերբիան (D), Լեհաստանը (E), Անգլիան (F), Իսպանիան (G), Բելգիան (H), Իսլանդիան (I):

9 խմբերում 2-րդ տեղերը զբաղեցրած 8 թիմերն անցումային խաղերում կպայքարեն 4 ուղեգրի համար: Այդ թիմերն են Շվեդիան (A), Շվեյցարիան (B), Հյուսիսային Իռլանդիան (C), Իռլանդիան (D), Դանիան (E), Իտալիան (G), Հունաստանը (H) եւ Խորվաթիան (I): F խմբում 2-րդ տեղը զբաղեցրած Սլովակիան, 2-րդ տեղը զբաղեցրած թիմերի թվում ունենալով ամենացածր ցուցանիշները, դուրս մնաց հետագա պայքարից:

Այս 8 թիմերը բաժանվել են 2 զամբյուղի: Շվեյցարիան, Իտալիան, Խորվաթիան եւ Դանիան 1-ինում են, մյուսները՝ 2-րդում: Անցումային խաղերի վիճակահանությունը կկայանա հոկտեմբերի 17-ին Ցյուրիխում։ 4 զույգերը 2-ական հանդիպում կանցկացնեն՝ տանը եւ դրսում: 1-ին խաղերը կկայանան նոյեմբերի 9-11-ը, իսկ պատասխան խաղերը՝ նոյեմբերի 12-14-ը։ Զույգերի հաղթողներն աշխարհի առաջնության ուղեգիր կստանան:   

Եվրոպական գոտու մեծագույն հիասթափությունը Հոլանդիայի հավաքականն էր: Թիմն A խմբում Շվեդիայի հետ հավասար՝ 19 միավոր վաստակեց, սակայն դուրս մնաց հետագա պայքարից: Երեկ սեփական հարկի տակ կարողացավ հաղթել Շվեդիային (2:0), սակայն զիջեց լրացուցիչ ցուցանիշներով:

ԿՈՆԿԱԿԱՖ-ից իր երկրպագուներին հիասթափեցրեց ԱՄՆ հավաքականը: Այս գոտու ընտրական 5-րդ փուլում թիմը զբաղեցրեց 5-րդ տեղը եւ չի մասնակցի անգամ անցումային խաղերին: Երեկ 5-րդ փուլի վերջին խաղում պարտվեց խմբի հետնապահ Տրինիդադ եւ Տոբագոյից ու մնաց 12 միավորով: 1986 թվականից ի վեր ԱՄՆ-ն 1-ին անգամ չի մասնակցի աշխարհի առաջնությանը: Խմբից 1-ին տեղով ուղեգիր ստացավ Մեքսիկան (21 միավոր), 2-րդ տեղով՝ Կոստա Ռիկան (16), 3-րդ տեղով՝ Պանաման (13): Պանաման իր պատմության մեջ 1-ին անգամ մունդիալին մասնակցելու հնարավորություն ստացավ: Հոնդուրասը նույնպես 13 միավոր վաստակեց, սակայն զբաղեցրեց 4-րդ տեղը, ինչն անցումային խաղերին մասնակցելու իրավունք է տալիս: Թիմն ուղեգրի համար կպայքարի ասիական գոտում անցումային խաղերին մասնակցելու իրավունք ստացած Ավստրալիայի դեմ:

Ասիայից ուղեգիր են նվաճել Իրանը, Հարավային Կորեան, Ճապոնիան, Սաուդյան Արաբիան: Ավստրալիան, ինչպես նշվեց, կմասնակցի անցումային խաղերին: Աֆրիկայում դեռ պետք է կայանան 3-րդ՝ խմբային փուլի վերջին տուրի հանդիպումները: Այս գոտուց ուղեգիր արդեն նվաճել են Եգիպտոսը եւ Նիգերիան:

Աշխարհի 2018 թ. առաջնության եզրափակիչ փուլի վիճակահանությունը կկայանա դեկտեմբերի 1-ին Կրեմլում, երբ արդեն հայտնի կդառնան բոլոր մասնակիցները: Աշխարհի 2018 թ. առաջնությունը կկայանա հունիսի 14-ից հուլիսի 15-ը: