Գնալով Հայաստանում ներքաղաքական կյանքը թեժանում է: Մարտի 2-ին նախագահի, իսկ ապրիլի 17-ին վարչապետի ընտրություններն են: Սրան զուգահեռ՝ ընդդիմադիր ուժերը հայտարարում են, որ «ձեռքները ծալած» չեն նստելու: Մասնավորապես՝ խորհրդարանական ԵԼՔ դաշինքը եւ արտախորհրդարանական Ժառանգություն կուսակցությունը նշել են, որ պայքարելու են Սերժ Սարգսյանի վերարտադրության դեմ: Ծառուկյան խմբակցությունում, թեեւ կարծում են, որ փողոց դուրս գալու համար պետք է լուրջ պատրաստվել: Մասնավորապես, Սերգեյ Բագրատյանը ՀԺ-ի հարցին պատասխանելով նշեց, որ մինչեւ փողոց դուրս գալը լայնամասշտաբ գործողությունների պլան պետք է մշակել:

«Դա բավականին բարդ գործընթաց է եւ պետք է հասարակությանը պատրաստել: Եթե հայտարարենք, որ վաղը ժողովուրդը պետք է փողոց դուրս գա, առանց հիմնավորման, դա բարդ կլինի եւ ի սկզբանե կարող է ձախողվել: Փողոցային հուժկու ակցիայի համար պետք է երկարատեւ նախապատրաստական աշխատանքներ տանել: Հանպատրաստի փողոց դուրս գալը կարող է հանգեցնել անհաջողության եւ հիասթափության: Պետք է հասկանալ, թե ինչի համար են անում այդ պայքարը: Մենք դեռ չգիտենք, թե ով է ՀՀԿ-ի թեկնածուն, բայց եթե կանխարգելիչ պայքար են սկսում եւ հավաքվում է 200 մարդ, դա կհամարվի, որ Սերժ Սարգսյանին չե՞ն ուզում»,- ասաց նա:

ՀՀԿ-ի գործընկեր՝ ՀՅԴ-ի ներկայացուցիչ Արմեն Ռուստամյանը համամիտ չէ, որ քաղաքացիները դժգոհ են ներկա իրավիճակից, որ հասարակությունում անհանգիստ են եւ պատրաստ են փողոց դուրս գալ: Իսկ, ահա իշխող ՀՀԿ-ում չեն բացառում, որ հնարավոր է ներքաղաքական խմորումներ՝ ցույցերի, հանրահավաքների եւ երթերի տեսքով, բայց ՀՀԿ խմբակցության քարտուղար Գագիկ Մելիքյանը դժվարանում է ասել, թե ընդդիմության փողոց դուրս գալն ինչ արդյունք է տալու:

«Հնարավոր է, որ տեղի ունենան երթեր, միտինգներ: Ժողովրդավարության ժամանակները զարգանում են եւ երթեր տեղի կունենան, չի բացառվում, հատկապես այն դեպքում, երբ նման ցանկություն էլ հայտնել են: Չեմ կարող ասել, թե ինչ արդյունք կտա, որովհետեւ չգիտեմ, թե ինչ են հասկանում արդյունք ասելով»,- ասում է Գագիկ Մելիքյանը եւ նշում, որ վարչապետի իրենց թեկնածուն անհայտ է:

Հարցին, թե՝ ընդհանրապես փողոցային պայքարն արդյունք տալի՞ս է, ՀՀԿ խմբակցության քարտուղարն առաջարկում է նախաձեռնող ընդդիմությունից ճշտել: «Վերջին շրջանում տեսնում ենք, որ ընդդիմության ցույցերն այնքան էլ հաջող չեն անցնում»:

Մարտի 5-ին նախատեսվում է ԵԼՔ խմբակցության ղեկավար Նիկոլ Փաշինյանի եւ քաղհասարակության հանդիպումն Ազատության հրապարակում: Գագիկ Մելիքյանն ասում է, որ քաղհասարակության եւ ընդդիմության հանդիպումները չեն կարող իշխանությանն անհանգստացնել, քանի դեռ կառուցողական առաջարկություններ չեն հնչել:

«Չեմ կարծում, որ վերացական երթեր կազմակերպելը որեւէ մեկին մտահոգում է եւ չեմ կարծում, որ դա կազմակերպիչներին բավարարում է»,- ասում է Մելիքյանը եւ նշում, որ իրենք եւս պատրաստ են քաղհասարակության կողմից հնչող կառուցողական առաջարկները քննարկել:

Հարցին էլ՝ ՀՀԿ-ն պատրա՞ստ է վերջնական քննարկումների արդյունքում Սերժ Սարգսյանին առաջարկել հրաժարվել 2014 թվականի իր հայտնի խոսքերից՝ վարչապետ չդառնալու մասով: Գագիկ Մելիքյանն այս հարցին շրջանցիկ պատասխաններ էր տալիս, սակայն հաստատեց, որ կուսակցության կանոնադրությունը թույլ է տալիս ԳՄ-ին եւ խորհրդին անհատների որոշումները քննարկման առարկա դարձնել՝ հանուն պետական շահի:

«Պետության շահերից ելնելով մենք միշտ քվեարկում ենք այն նախաձեռնությունների օգտին եւ այն անձանց օգտին, ում նպատակահարմար է գտնում պետական շահը: Այո, իհարկե կուսակցության գործադիր մարմինն ունի այդ լիազորությունը՝ առաջարկություններ եւ քննարկումներ անելու, կուսակցության խորհուրդը եւս նման առաջարկություններ անելու իրավունք ունի: Կարծում եմ, որ գործադիր մարմինը եւ խորհուրդը, առաջնորդվելով իրեն վերապահված իրավունքներից, այն կիրացնի ճիշտ ժամանակին», - ասաց Մելիքյանը եւ ըստ էության՝ հաստատեց, որ Սերժ Սարգսյանի խոսքերը բեկանելու են:

ՀՀԿ-ից Կարեն Ավագյանն էլ կարծում է, որ վարչապետի թեկնածուի առաջադրումը եւ ընտրությունը օրենքով վերապահված է ՀՀԿ-ին, ուստի փողոց դուրս գալու անհրաժեշտություն չկա:

«Քաղաքական զարգացումներն ինքնանպատակ չպետք է լինեն, եթե օրենքի խախտում չկա, ուրեմն ես չեմ կարծում, որ մարդկանց ցանկություններով հասարակությունը պետք է դուրս գա փողոց: Այդ փողոց դուրս գալացողները քանի՞ հոգի են, հաստատ այնքան չեն, որքան ՀՀԿ-ին քվե եւ իշխանություն տվածները: Սա է կառավարության ցանկությունը, մնացածը կարծիքներ են»,- ասաց Կարեն Ավագյանը: Վերջին մեր այն հարցին, թե հնարավո՞ր է, որ ՀՀԿ-ն Սերժ Սարգսյանին խնդրի հանուն պետական շահի հրաժարվել 2014-ի իր խոսքերից, պատասխանեց, որ նման հարցերը քննարկվում են ՀՀԿ ԳՄ-ում:

Նյութը տպագրվել է «Հայկական ժամանակ» օրաթերթի մարտի 1-ի համարում:

Տպել
2994 դիտում

Լեդի Գագայի նոր տեսահոլովակում Փարաջանովի «Նռան գույնը» հիշեցնող պատկերներ կան ու հայերեն բառեր

Մեծամորի ատոմակայանը հրթիռակոծելու Ադրբեջանի մտադրությունն ի ցույց է դնում այդ պետության իրական դեմքը

Մորուքով ՀՀ վարչապետն ու ռուս գործակալները․ ովքե՞ր են գաղտնի փաստաթղթերում հայտնված Կանդիդատը, Սվետլանան ու Միշան

Պարոն Բադասյանը իրեն օրենքից ավելի բարձր դասեց. Հայաստանի ազգային արխիվի աշխատակիցը բաց նամակով դիմել է վարչապետին

«Ֆորդ Տրանզիտ»-ում 5 խմ ապօրինի փայտանյութ է հայտնաբերվել (տեսանյութ)

Աշնանացանի համար նպաստավոր տարի է, սակայն գյուղացիները ոչ միշտ են կարողացել գտնել մատակարարներին

Մայր Տաճարը վերականգնող ճարտարապետները բացահայտել են 4-5-րդ դարերի կղմինդրածածկի շարվածքի տեխնոլոգիան

Արթիկում 440 մ երկարությամբ և 5 մ լայնությամբ փողոցը նորոգվում է տուֆով. ծրագրի արժեքը 41 մլն 232 հազար դրամ է

Ինչպես է վերականգնվում համաշխարհային տնտեսությունը համաճարակից հետո. կանխատեսումներ եւ իրականություն

ԱՄՆ Եվրոպական հրամանատարության կողմից բժշկական պարագաներ են հատկացվել Արմավիրի մարզպետարանին

Ականի պայթյունի հետևանքով Ճամբարակի ԱԿ հոսպիտալացված զինծառայողը տեղափոխվել է Մուրացանի զինվորական հոսպիտալ

Ներկայացումից հետո դերասանը մատուցող է աշխատում այն մարդու մոտ, որը մեկ ժամ առաջ ծափահարում էր իրեն. Ռաֆայել Երանոսյան

Բարձրաշենի միջնակարգ դպրոցն ամբողջությամբ կբարեկարգվի

Սեպտեմբերի 18-ից 22-ը փակ կլինի «Զվարթնոց» պատմամշակութային արգելոց-թանգարանը

Զորամիավորումներում շարունակվում են նորակոչիկ զինծառայողների մարզումները

ՀՀ տարածքում ավտոճանապարհներն անցանելի են. Լարսը բաց է միայն բեռնատարների համար

Հրազդանում նախատեսվում է սանիտարական աղբավայր կառուցել. հանդիպել են Ռոմանոս Պետրոսյանն ու տիկին Ահլամ ԱլՍալամին

Սմբուկի և պղպեղի արտադրությամբ զբաղվող ֆերմերների խնդիրն ամբողջությամբ կարգավորվել է

Ականատես ենք լինում Ադրբեջանում թուրքական ռազմական շարունակական կուտակման. ԱԳ նախարարի հարցազրույցը «ալ-Ախբար» թերթին

Այնթապ գյուղի կամրջի տակ քաղաքացին փամփուշտ և զենք է թողել (տեսանյութ)