Այդպես էլ է պատահում. Սոս Սարգսյանի իրավահաջորդը

Տպագրվել է «Հայկական Ժամանակ» օրաթերթի՝ 2006 թվականի փետրվարի 17-ի համարում

Սոս Սարգսյանի հրաժարականից հետո Կինոյի եւ թատրոնի ինստիտուտի ռեկտորի թափուր պաշտոնը երեկվանից այլեւս զբաղված է: 21 կողմ եւ 1 դեմ ձայնով երեկ Կինոյի եւ թատրոնի ինստիտուտի կառավարման խորհուրդը ռեկտոր ընտրեց նույն բուհի ուսումնական գծով պրոռեկտոր Հրաչյա Գասպարյանին: Հիշեցնենք, որ Հրաչյա Գասպարյանի թեկնածությունից բացի, կրթության եւ գիտության նախարարությունը որեւէ այլ թեկնածուի հայտ չէր ստացել: Եւ ի սկզբանե արդեն հասկանալի էր, որ ի տարբերություն մյուս բուհերի, որոնց ռեկտորների թափուր պաշտոնների համար սպասվում է խիստ լարված պայքար, այս բուհում ամեն ինչ անցնելու էր հանգիստ, առանց որեւէ միջադեպի: Անգամ 1 դեմ ձայնը, որ երեկ գրանցվեց ընտրությունների ժամանակ, բավական անսպասելի էր շատերի համար, եւ Սոս Արտաշեսովիչը հումորով Հրաչյա Գասպարյանին դեմ քվեարկած խորհրդի անդամին հորդորում էր ձեռք բարձրացնել եւ բացահայտվել:

Մեր այն հարցին, թե ով կարող էր իրեն դեմ քվեարկել, պարոն Գասպարյանը պատասխանեց. «Շատ լավ մարդ է եղել երեւի, որ դեմ է քվեարկել: Ես սպասում էի, որ ավելի շատ դեմ քվեարկողներ կլինեն: Եթե լուրջ ընտրություն է, պետք է գոնե մի 3 հոգի այդպես լինի: Կամ էլ այդ մի հոգին շշկռվել է: Հիմա ի՞նչ անենք, այդպես էլ է պատահում»: Իսկ ի՞նչ է խոստանում անել նորընտիր ռեկտորը ինստիտուտի համար: Դեռ իր նախընտրական ելույթում Հրաչյա Գասպարյանը հայտարարեց, որ թեեւ այս տարիների ընթացքում բուհում շատ բան է արվել, բայց անելիքներ դեռ շատ կան` սկսած վերանորոգումից, վերջացրած ուսումնական գործընթացով:

Ֆինանսական հոսքերի նպատակային օգտագործում, մասնագիտական ուսուցումն ապահովող անհրաժեշտ տեխնիկայի ձեռքբերում, բուհի ուսանողական խորհրդի դերի բարձրացում, մասնակցություն ուսանողական տարբեր փառատոնների, բուհի հեղինակության եւ վարկանիշի բարձրացում... սրանք նորընտիր ռեկտորի նախընտրական խոստումներն էին: Եւ բուհի խորհրդի նախագահ Սոս Սարգսյանը, որ դեռ քվեարկությունից առաջ բոլորին կոչ արեց ռեկտոր ընտրել Հրաչյա Գասպարյանին, համոզված էր, որ իր եւ Հրաչյա Գասպարյանի համատեղ ծրագիրը վերջինիս ընտրության պարագայում անպատճառ իրականություն կդառնա: «Իմ մտքում միշտ կար, որ ես պետք է գնամ եւ, իհարկե, կասկած չունեի, որ ինձ պետք է փոխարինի Գասպարյանը: Ինչ լավ բան որ արվել է այս ինստիտուտում, մենք արել ենք միասին»,- ասում էր Սոս Սարգսյանը: Քվեարկությունից առաջ հայտնի դերասանի ունեցած այս ելույթը թերեւս իր ազդեցությունն ունեցավ:

Լրագրողների այն հարցին, թե ինչ է անելու Հրաչյա Գասպարյան ռեկտորը կոռուպցիան բուհում արմատախիլ անելու համար, վերջինս պատասխանեց. «Մեր գործն այնպես է, որ եթե անշնորհք ուսանողին նշանակես, կոռուպցիան անմիջապես երեւում է: Ես քննությունների մոտ 60 տոկոսին մասնակցում եմ: Չի կարող պատահի, որ գնահատականի համար մի բան լինի, նույնիսկ բոնբոներկա: Ծաղիկ կին դասախոսներին բերում են: Բայց այն դասախոսին, որին բերում են, ավելի դաժան է լինում ուսանողի նկատմամբ: Մեծ հաշվով կոռուպցիա չկա: Ինչ-որ բաներ, անկասկած, կարող է լինեն, որ ասեն` այս ուսանողին լավ նայեք: Ես գտնում եմ, որ եթե մարդը կաշառակեր է, ուզում է մեկ միլիոն աշխատավարձ տան, նա իր երեք ռուբլին կվերցնի: Դա բարոյական չափանիշ է, ու այդ մարդկանցից ուղղակի պետք է ազատվել: Եթե ես նման բան իմանամ, այդ մարդը մյուս օրն այստեղ չի լինի»:

Ավելին, նորընտիր ռեկտորը մեզ պատմեց, որ իրենց ինստիտուտում այսքան ժամանակ կոռտուպցիայի ընդամենը մեկ դեպք է արձանագրվել եւ այն էլ շատ զավեշտական: Պարզվեց, որ դասախոսը քննություն նշանակելու համար ուսանողից ընդամենը մեկ շիշ օղի է ուզել: Ուսանողը դա բացահայտել է եւ խեղճ «կաշառակեր» դասախոսին անմիջապես ազատել են աշխատանքից: Մեր այն հարցին, թե ինչպես ստացվեց, որ Կինոյի եւ թատրոնի ինստիտուտի ռեկտորի պաշտոնի համար առաջադրվեց ընդամենը մեկ թեկնածու այն պարագայում, երբ ամիսներ առաջ շրջանառվում էին մի քանի թեկնածուների անուններ, եւ արդյո՞ք դրա պատճառն այն չէր, որ Սոս Սարգսյանը ռեկտորի պաշտոնում տեսնում էր միայն Հրաչյա Գասպարյանին, ու դրանով մյուս թեկնածուները հարցն արդեն լուծված են համարել, պարոն Գասպարյանը պատասխանեց.

«Ոչ, հարցը լուծված չէր: Ուղղակի այն մարդիկ, որ ցանկություն ունեին դառնալ այս բուհի ռեկտոր, հասկացան, որ կա մի մարդ, որն ավելի մոտ է կանգնած այս ինստիտուտին: Եթե դրսից մարդ գար, պետք է ամեն ինչ սկսեր զրոյից»: Մենք պարոն Գասպարյանից հետաքրքրվեցինք նաեւ, թե արդյոք պաշտպանության նախարար Սերժ Սարգսյանն օգնելու է բուհին, ինչպես դա արեց, երբ ռեկտոր դարձավ Սոս Սարգսյանը: «Սերժ Սարգսյանը սկզբում մեզ օգնեց, որ մենք կարողացանք շարժվել տեղից: Հետագայում մենք հասկացանք, թե ինչը ոնց պիտի անենք»,- ասաց Կինոյի եւ թատրոնի նորընտիր ռեկտորը: Մի խոսքով, ռեկտորի հաջորդ ընտրությունները մայրաքաղաքում տեղի են ունենալու Ճարտարապետաշինարարական համալսարանում փետրվարի 24-ին, որտեղ առաջադրված են 3 թեկնածուներ: 

Լուսինե Բարսեղյան