Ամբաստանյալներին մեղսագրվում են արարքներ, որոնք կատարելու լիազորություններով նրանք օժտված չեն եղել. դատախազն առարկեց

Երեւանի ընդհանուր իրավասության դատարանում Ռոբերտ Քոչարյանի եւ մյուսների գործով դատական նիստին մեղադրող կողմն առարկեց ամբաստանյալների նկատմամբ քրեական հետապնդումը դադարեցնելու միջնորդության դեմ՝ ասելով, որ դրանց հիմքում դրված փաստական հանգամանքները բազմազան էին՝ սկսած իրավականից, ընդհուպ մինչեւ քաղաքական:

Նախորդ նիստին, հիշեցնենք, նման միջնորդությամբ հանդես էր եկել ամբաստանյալ Արմեն Գեւորգյանի պաշտպան Էրիկ Ալեքսանյանը: Դրանից հետո նույնաբովանդակ միջնորդություն ներկայացրել էր նաեւ Ռոբերտ Քոչարյանի պաշտպան Հովհաննես Խուդոյանը, որին էլ այսօր շարունակեց պաշտպան Արամ Վարդեւանյանը:

Առարկությունը ներկայացնելիս մեղադրող դատախազ Գեւորգ Բաղդասարյանը նախ անդրադարձավ պաշտպանների այն պնդմանը, թե ամբաստանյալներին մեղսագրվող արարքը հանցագործություն չի եղել դրա կատարման ժամանակ, եւ միայն այդ արարքների կատարումից հետո՝ 2009 թվականին է Քրեական օրենսգրքով նախատեսվել նոր հանցագործություն, քրեականացվել նոր արարք, հետեւաբար անձի վիճակը վատթարացնող նորմին տրվել է հետադարձ ուժ. «Հին օրենքով՝ պետական իշխանությունը յուրացնելու հանցակազմը ունեցել է հնարավոր չորս դրսեւորումներ, որոնցից մեկն էլ սահմանադրական կարգը բռնությամբ տապալելուն ուղղված գործողություններն են: Ավելի պարզ ասած՝ սահմանադրական կարգը բռնությամբ տապալելուն ուղղված գործողությունները 2008 թվականին՝ արարքները կատարելու պահին, նախատեսված են եղել որպես պատժելի արարք, դրանք չթույլատրված են եղել Քրեական օրենսգրքով»: Հետագայում այդ չորս դրսեւորումները Քրեական օրենսգրքով առանձնացվել են որպես առանձին հոդվածներ:

Դատախազը շեշտեց, որ անգամ Վենետիկի հանձնաժողովն է արձանագրել, որ 300.1-րդ հոդվածով նախատեսվել է առանձին հանցագործություն, ոչ թե նոր. «Այսինքն՝ դրույթն է նորը, դրանով նախատեսված արարքը նոր չէ»: Դատախազի խոսքով՝ Վենետիկի հանձնաժողովը արձանագրել է նաեւ, որ նոր օրենքով անձինք կարող են պատժվել մինչ դրա ընդունումը կատարած արարքների համար, եթե այն ավելի բարենպաստ է, եւ դատախազն ու դատավորն են գնահատողը՝ ադյոք ավելի բարենպաստ նորմի վրա մեղադրյալի նկատմամբ կարող է կայացվել մեղադրական կամ արդարացման դատավճիռ թե ոչ: Դատախազը պնդեց՝ Սահմանադրական կարգը բռնությամբ տապալելը հանցագործություն էր թե՛ նախկինում, թե՛ հիմա, ուստի դրա վաթարացնող լինելու մասին խոսք լինել չի կարող:

Դատախազն անդրադարձավ նաեւ պաշտպանների այն պնդմանը, թե 300.1-րդ հոդվածը մեկնաբանվել եւ կիրառվել է խտրական ձեւով: Մեջբերելով Քոչարյանի պաշտպաններից Արամ Վարդևանյանի այն խոսքերը, թե նախկինում 7-ի գործով դատախազները այլ բան են ասել, այս գործով դատախազները՝ մեկ այլ, Բաղդասարյանն ասաց․ «Ես հաստատում եմ, որ Դատախազության համակարգը միասնական համակարգ է, բայց դա չի զրկում դատախազներին իրավունքի նորմը սեփական տեսանկյունից ներկայացնել։ Թե որ մեկնաբանությունն է ճիշտ, կորոշի այդ վեճը լուծող անձը»:

Ինչ վերաբերում է նախագահի անձեռնմխելիությանը, Գեւորգ Բաղդասարյանն ասաց. «Վճռաբեկ դատարանն արձանագրել է, որ պաշտոնաթող նախագահը կարգավիճակի հետ կապ չունեցող գործողությունների համար չի օգտվում անձեռմխելիության երաշխիքից եւ ենթարկվում է պատասխանատվության ընդհանուր դրույթներով: Այդպիսի արարքներ կարող ե լինել ոչ միայն այնպիսիք, որոնք անձը կատարում է որպես քաղաքացի, այլ այնպիսիք, որոնց կատարման իրավասություն նախագահը չունի կամ կատարում է վերապահված լիազորությունների անցմամբ»: Բաղդասարյանը պնդեց՝ ամբաստանյալներին մեղսագրվում են արարքներ, որոնք կատարելու լիազորություններով նրանք օժտված չեն եղել:

Մեղադրող դատախազ Պետրոս Պետրոսյանը ամբողջությամբ միացավ Գեւորգ Բաղդասարյանի առարկությանը՝ նշելով, որ պաշտպանների միջնորդությունը հիմնազուրկ է և ենթակա է մերժման. «Դատարանի առաջ բարձրացված հարցերը արդեն իսկ մի քանի անգամ ենթարկվել են դատական ստուգման, գնահատման արժանացել, եւ նաեւ այս դատարանն է անդրադարձել այդ հարցերին»: Պետրոսյանի խոսքով՝ խափանման միջոցի քննարկման ժամանակ անգամ Վերաքննիչ եւ Վճռաբեկ դատարաներն են անդրադաձել թե հին եւ նոր օրենքներին, թե հետադարձ ուժին, թե նախագահի անձեռնմխելիության հարցերին՝ դրանց տալով պատշաճ քրեաիրավական եւ քրեադատավարական գնահատականներ. «Ուստի այսօր այս միջնորդությունը ներկայացնելը այդ նույն պրոցեսի կրկնությունն է»,- ամփոփեց դատախազը:

Աշխատանքային օրվա ավարտով պայմանավորված միջնորդության քննությունը հետաձգվեց: Այն կշարունակվի փետրվարի 18-ին՝ ժ. 13:00-ին: