Եթե համակեցության նոր կանոններ չորդեգրենք, վարակը կարող է հանգեցնել հումանիտար աղետի. Նիկոլ Փաշինյան

Քանի դեռ չի հայտնաբերվել պատվաստանյութ, կորոնավիրուսը չի անհետանալու, եւ մենք ունենալու ենք վարակված քաղաքացիներ։ Այս մասին այսօր հեռուստատեսային ուղերձի ժամանակ ասաց ՀՀ վարչապետ Նիկոլ Փաշինյանը։ Նա նշեց, որ իրենց ռազմավարական խնդիրն է այնպես անել, որ վարակվածների թիվը լինի հնարավորինս քիչ եւ առողջապահական համակարգի համար՝ տանելի։ Միեւնույն ժամանակ վարչապետը նկատեց նաեւ, որ մենք չենք կարող անվերջ փակված լինել եւ անվերջ ապրել կարանտինի կամ արտակարգ դրության պայմաններում։ «Հետեւաբար մեր ռազմավարական խնդիրն է ապրել կորոնավիրուսին զուգահեռ, ըստ անհրաժեշտության՝ նրա հետ համատեղ, եւ արտակարգ դրության առաջիկա ժամանակաշրջանը մենք պետք է օգտագործենք հենց սրա համար՝ անհրաժեշտ հմտություններ ձեռք բերելու նպատակով»,- ասաց վարչապետը։ Նրա խոսքով՝ սա նշանակում է, որ փուլ առ փուլ թույլատրելու են տնտեսական գործունեության վերսկսումը զանազան ոլորտներում, բայց եւ հատուկ պատասխանատվություն են ակնկալում գործատուներից, որոնք պետք է ապահովեն գործարաններում, արտադրամասերում, շինհրապարակներում կորոնավիրուսային անվտանգության հատուկ պայմաններ։ «Հակառակ դեպքում մենք ստիպված կլինենք ոչ թե մեղմացնել, այլ՝ խստացնել սահմափակումները»,- հայտարարեց Փաշինյանը։

Նրա պնդմամբ՝ այսօրվանից արդեն բոլոր տնտեսվարողները պետք է կորոնավիրուսային անվտանգության ապահովման պլաններ ունենան նաեւ իրենց՝ ապագայում վերաբացվելիք խանութների, սրճարանների, ռեստորանների համար։

«Կոչ եմ անում, խնդրում եմ կարանտինային առաջիկա ժամանակաշրջանն օգտագործել՝ հենց այս խնդիրը լուծելու համար։ Համաճարակային այս ժամանակաշրջանն առանձնահատուկ պատասխանատվություն է դնում մեզնից յուրաքանչյուրի վրա։ Մեզնից յուրաքանչյուրը պետք է անի առավելագույնը՝ նախ, չվարակվելու, ապա եւ ուրիշներին չվարակելու համար»,- ասաց վարչապետը՝ առաջարկելով բանաձեւ, որի կիրառման պարագայում կկարողանանք երաշխավորել ինքներս մեզ եւ մեր հարազատներին։ Նրա խոսքով՝ կորոնավիրուսով չվարակվելու համար անհրաժեշտ է ապահովել 3 պարզագույն կանոն.

1. իրար հետ շփվելիս պահպանել առնվազն 2 մետր սոցիալական հեռավորություն,

2. դեմքին դիպչել միայն ախտահանված ձեռքերով,

3. օգտվել միայն մաքուր սպասքից եւ ախտահանված վարսավիրական գործիքներից։

Փաշինյանը վստահեցրեց, որ այս պայմանների ապահովման դեպքում գրեթե երաշխավորված կլինենք կորոնավիրուսով չվարակվելուց։ Միեւնույն ժամանակ նա ընդգծեց նաեւ, որ այս կանոնները պահպանելու համար մեզնից առանձնահատուկ եւ հավաքական ջանքեր են պահանջվելու։ «Նկատի ունեմ՝ ինչպես մեր ու մեր ընտանիքների, այնպես էլ՝ հանրային սննդի ոլորտի եւ գեղեցկության սրահների ոլորտում աշխատող տնտեսվարողների ջանքերը։ Կորոնավիրուսի համավարակը բոլորիս պարտադրում է վարքագծի նոր կանոններ եւ ռեֆլեքսներ։ Ի վերջո, մեր վարքագծի բազմաթիվ կանոններ, բազմաթիվ ռեֆլեքսներ ձեւավորվել են ժամանակի ընթացքում՝ տարբեր գործոնների ազդեցության ներքո, եւ թերեւս հիմա ապրում ենք այսպիսի ժամանակներ, երբ իրավիճակն անխուսափելիորեն փոփոխություններ է մտցնելու մեր սովորույթների, շփման ձեւերի, առօրյա շարժուձեւերի մեջ»,- ասաց Փաշինյանը։

Նա շեշտեց, որ կառավարության հակահամաճարակային գործողությունները նախնական արդյունքներ տվել են, բայց սա պետք է ոչ թե թուլացնի մեր զգոնությունը, այլ, ընդհակառակը, առավել եւս արտակարգ դրության առաջիկա շրջանում մենք պետք է կրկնակի զգոնություն դրսեւորենք եւ եթե այդպես վարվենք, արդեն մայիսի 14-ից փուլ առ փուլ կվերադառնանք բնականոն կյանքի։ Իսկ եթե այդպես չվարվենք, համակեցության նոր կանոններ չորդեգրենք, Փաշինյանի խոսքով, վարակը կարող է ծավալվել նոր թափով եւ մեզ բոլորիս հանգեցնել հումանիտար աղետի։

«Եվ այստեղ է, որ իմ առաջարկած հայտնի կարգախոսը չի փոխվում։ Հայաստանի ապագան կախված է մեկ մարդուց, եւ այդ մեկ մարդը դու ես։

Սիրում եմ բոլորիդ, հպարտանում եմ բոլորովդ, խոնարհվում եմ բոլորիդ առաջ, եւ իմացեք՝ ձեր բոլոր ցավերն իմ սրտում են, ձեր բոլոր կարիքներն իմ մտքում են, ձեր բոլոր երազանքներն իմ հոգում են, եւ մենք միասին հաղթահարելու ենք այս ճգնաժամը եւ նրանից դուրս ենք գալու շատ ավելի ուժեղ եւ ինքնավստահ։ Եւ ուրեմն՝ կեցցե՛ ազատությունը, կեցցե՛ Հայաստանի Հանրապետությունը, կեցցե՛ Արցախի Հանրապետությունը, կեցցե՛նք մենք եւ մեր երեխաները, որ ապրում ենք եւ ապրելու ենք ազատ եւ երջանիկ Հայաստանում, դուխո՛վ, ժողովո՛ւրդ ջան»,- իր ուղերձը եզրափակեց վարչապետը։