Մահացե՞լ է, թե՞ չի մահացել. ուր է անհետացել Հյուսիսային Կորեայի առաջնորդն ու ինչ է կատարվում երկրում

«Հյուսիսկորեական առաջնորդ Կիմ Չեն Ընը սրտի անհաջող վիրահատության հետեւանքով մահացել է»: Այս վերնագրով մի քանի տասնյակ հրապարակումներ արվեցին երեկ միջազգային լրատվամիջոցներում, ընդ որում՝ այդ մասին գրեցին հեղինակավոր պարբերականներ:

ԿԺԴՀ-ից շտապեցին հերքել տեղեկատվությունը՝ արձագանքելով աղմկոտ լուրերին եւ պաշտոնապես հայտարարելով, որ իրենց առաջնորդը չի մահացել, այլ «ակտիվ քաղաքական կյանք է վարում»: Այս արձագանքն էլ արագորեն տարածվեց լրատվամիջոցներում, սակայն մի շարք փորձագետներ գտնում են, որ Հյուսիսային Կորեայի իշխանությունները փորձում են իրականում թաքցնել Կիմ Չեն Ընի մահը՝ իշխանության հաջորդ ներկայացուցչի հաստատման համար ժամանակ շահելու նպատակով:

Կորեական ընկերությունների ասոցիացիաների ղեկավար, քաղաքական գործիչ Կաո դե Բենոսը հայտարարել է, որ Ընի մահվան մասին լուրերը զուրկ են հիմնավորումներից, նա ողջ է եւ ապրում է առօրյա քաղաքական հոգսերով, փոխանցում է Bloomberg-ը:

Կորեական հեռուստաընկերություններով երեկ եւ այսօր ակտիվորեն տարածվում են երկրի ղեկավարի մասին արխիվային տեսանյութեր: Հարկ է նշել, որ վերջին անգամ Կիմ Չեն Ընը հանրության առաջ հայտնվել է ապրիլի 11-ին, երբ նախագահել է ԿԺԴՀ-ի իշխող կուսակցության քաղբյուրոյի նիստը, իսկ երեկ եւ այսօր ցուցադրվող բոլոր տեսանյութերը նկարահանված են մինչ այդ նիստը: Ըստ BBC-ի, Ընի մահվան կամ ծանր լինելու մասին լուրերն առավել սրվեցին, երբ ապրիլի 15-ին նա բացակայեց իր պապի՝ Կիմ Իր Սենի ծննդյան արարողությունից, որը ԿԺԴՀ-ում  մեծ տոն է համարվում, քանի որ Իր Սենը վայելում է «Ազգության արեւ» տիտղոսը՝ համարվելով երկրի հերոսներից մեկը:

Պետական մակարդակով արված հայտարարության մեջ նշվում է.  «Մեր մարշալի առողջության՝ ծանր վիճակում լինելու մասին լուրերը եւս սխալ են եւ մեր երկրի համար վնասատու»:

Մի շարք փորձագետներ եւ լրատվականներ հայտնում են, որ այժմ Կորեայում բարդ գործընթացներ են տեղի ունենում եւ հնարավոր է Կիմ Չեն Ընի մահը հմտորեն փորձեն թաքցնել՝ մինչեւ երկրի ներսում նոր առաջնորդի հարցում վերջնական հայտարարի գան: Այս ենթադրություններն առավել ցցուն է դարձնում  այն փաստը, որ արդեն 2 շաբաթ է՝ առաջնորդի մասնակցությամբ ոչ մի նոր տեսագրություն չկա, որտեղ կարող էր երեւալ Ընի «ակտիվ քաղաքական կյանքը»:

«New York Post»-ը հայտնում էր, որ Կիմ Չեն Ընի մահվան պատճառ է հանդիսացել սրտի վիրահատության ժամանակ թույլ տրված սխալը, որի հետեւանքով նա սկզբում կոմայի մեջ է հայտնվել, այնուհետ՝ մահացել: Ընդ որում՝ նախքան մահվան մասին լուրերը, սկզբում ակտիվորեն շրջանառվեցին լուրեր այն մասին, որ հյուսիսկորեական առաջնորդի վիճակը ծանր է: Այս կապակցությամբ ԶԼՄ-ներին տրված մեկնաբանության մեջ նշվել , որ Կիմ Չենը հիվանդանոցում է, սակայն վիճակը ծանր չէ, հոսպիտալացման անհրաժեշտություն է առաջացել՝ «չափից շատ ծխելու, ավելորդ քաշի հետ կապված խնդիրների եւ գերհոգնածության պատճառով»:

Հատկանշական է, որ ԿԺԴՀ առաջնորդը դեռ 2019-ի օգոստոսին առողջության վատթարացում էր ունեցել սիրտ-անոթային համակարգի խնդիրների պատճառով: Նրա վիճակը ավելի էր սրվել, երբ մի քանի անգամ հաղթահարել էր Փեքթուսան լեռան բարձունքը:

ԿԺԴՀ-ի առաջնորդի պաշտոնական կայքէջում դրված վերջին լուրը Չեն Ընի անունից արվել է ապրիլի 23-ին, այն պաշտոնական ուղերձ է՝ ուղղված Սիրիայի նախագահին, իսկ նրա մասնակցությամբ վերջին թարմ լուսանկարը տեղադրվել է ապրիլի 12-ին՝ բանակային կորպուրսներից մեկի հրամանատարության հետ:

ապրիլի 12-ին արված լուսանկարը

Reuters-ի փոխանցմամբ, երեկ Չինաստանից դեպի ԿԺԴՀ է ուղեւորվել չինացի բժիշկների՝ հրատապ նշանակության ինքնաթիռը, ինչը թույլ է տալիս ենթադրել, որ հյուսիսկորեացի առաջնորդը դեռ ողջ է, սակայն նրա վիճակն այդքան էլ հուսադրող չէ:

Ճապոնական Yomiuri թերթը, վերլուծելով Կիմ Չենի առողջական վիճակի մասին բոլոր լուրերը, գրել էր, որ Կիմ Չեն Ընի կրտսեր քույրը՝ Կիմ Ե Չժոնը կարող է դառնալ երկրի նոր առաջնորդ, եթե երկրում արտակարգ իրավիճակ լինի: Ըստ թերթի, Հյուսիսային Կորեայում արդեն պատրաստվում են այս փոփոխությանը:

Երկրում իշխանափոխության եւ երկրի առաջնորդի փոփոխությամբ հետաքրքրված են ոչ միայն ԿԺԴՀ-ում, այլ ամբողջ աշխարհում, շատերն են քննարկում՝ ով է լինելու նոր առաջնորդը: Պաշտոնական հերքման տեքստին ոչ բոլորն են հավատում, մանավանդ, որ Կիմ Չենի մահը հերքող ապացույցներ դեռեւս չեն հրամցվում հանրությանը:

Այժմյան ղեկավարը թեեւ բավական երիտասարդ է՝ 36 տարեկան, սակայն շատերը գիտեն վերջինիս՝ վնասակար սովորություններ ունենալու մասին: «Փակ» երկրներում իշխանության փոխանցումը երբեմն շատ ցավոտ է լինում, անցնում բարդ փուլերով, առավել եւս, եթե այն Հյուիսային Կորեայի նման «միջուկային» պետություն է:

Վերջին օրերին շատ հաճախ է շրջանառվում Կիմ Ե Չժոնի անունը, նա համարվում է առաջնորդի ամենահավանական թեկնածուն: Նա ապրում է ակտիվ քաղաքական կյանքով, ամեն ինչին տեղյակ է «ներսից», քանի որ հյուսիսկորեական իշխող կուսակցության պրոպագանդայի բաժինն է ղեկավարում եւ եղբոր , բառացիորեն,  աջ ձեռքն է: Նա երիտասարդ է, 32 տարեկան, եղբոր հետ միասին կրթություն է ստացել Շվեյցարիայում: Չժոնի անձնական կյանքի մասին տվյալներ գրեթե հայտնի չեն, սակայն որոշ տեղեկատվության համաձայն, թեպետ նա ամուսնացած չէ, բայց ունի դեռահասության տարիքի որդի:

Կիմ Չեն Ընը քրոջ՝  Կիմ Ե Չժոնի հետ

32-ամյա Կիմ Ե Չժոնը