Ապրիլի 30-ի դրությամբ դադարեցված է 2.304 բնակարանի գազամատակարարումը եւ հատուկենտ բաժանորդների էներգամատակարարումը

2020 թվականի ապրիլի 30-ի տվյալներով՝ Հայաստանում կոմունալ վճարները չկատարելու պատճառով դադարեցված է եղել 2 304 բնակիչ-բաժանորդների գազամատակարարումը: Տեղեկությունը հայտնել են «Գազպրոմ Արմենիա» ՓԲԸ-ից՝ պատասխանելով «Հայկական ժամանակի» հարցմանը:

«Հայաստանի էլեկտրական ցանցեր» ընկերությունից էլեկտրաէներգիայի մատակարարումը դադարեցվելու վերաբերյալ տվյալներ չեն տրամադրել: Միայն հայտնել են, որ սպառած էլեկտրաէներգիայի դիմաց վճարումները չկատարելու պատճառով մնացել են հատուկենտ հոսանքազրկված բաժանորդներ, որոնք հիմնականում ունեն դեբիտորական պարտքեր (տնտեսական փոխհարաբերությունների հետեւանքով իրավաբանական կամ ֆիզիկական անձանցից բաժանորդին հասանելիք կամ չվճարված պարտքերի գումար):

Դեռեւս նախորդ ամիս ՀՀ կառավարությունը հաստատել էր կորոնավիրուսի տնտեսական հետեւանքների չեզոքացման եվս մեկ միջոցառում, որի շրջանակներում՝ օգտագործած բնական գազի եւ էլեկտրական հոսանքի կոմունալ վճարների դիմաց աջակցություն ստացավ շուրջ 600 հազար քաղաքացի: Բայց երբ արտակարգ դրություն հայտարարվելուց մեկ ամիս հետո այդ ռեժիմը երկարաձգվեց, իսկ կոմունալ վճարումները ուշացնելու թույլտվությունը՝ ոչ, սոցիալական ցանցերում ու տարբեր լրատվամիջոցներում բազմաթիվ բողոքներ եղան, թե հազարավոր բնակարաններ հոսանքազրկված են, հարյուրավորները զրկվել են գազից: Հազարավոր ընտանիքներ էլ վճարել են վերջին եղած փողն ու սննդի գումար չունեն:

Հոսանքի եւ գազի անջատումները Հայաստանում ո՛չ նորություն էին, ո՛չ էլ արտառոց մի երեւույթ, պարզապես համավարակի այս պայմաններում արձագանքներն ու կատարվածի մասին վերաբերմունքը թերեւս առավել սուր դրսեւորվեց:

Նախքան անջատումները Կառավարությունը փոխհատուցել էր բոլոր այն ընտանիքների գազի ու էլեկտրաէներգիայի վարձավճարների հիսուն տոկոսը, որոնց փետրվար ամսվա վարձավճարները գազի սպառման դեպքում չէին գերազանցել 10 000 դրամը, իսկ էլեկտրաէներգիայի դեպքում` 5 000 դրամը: Գումարը տրվել էր ոչ թե բաժանորդներին, այլ գազ եւ էլեկտրաէներգիա մատակարարող ընկերություններին` բնակիչների հաջորդ ամիսների վարձավճարներն այդ գումարի շրջանակներում փոխհատուցելու նպատակով։

Այնուհետեւ, երբ իշխանությունները տեսան, որ սա այնքան էլ չի մեղմել սոցիալապես ծանր պայմաններում ապրող անձանց վիճակը, որոշում կայացվեց աջակցությունն ընդլայնել: Հայտարարվեց, որ աջակցություն կտրամադրվի նաեւ նրանց, ովքեր փետրվարին  ւ 5001-10 000 դրամի էլեկտրաէներգիա եւ 10 001- 30 հազար դրամի գազ են սպառել։ Այս դեպքում խոսքը 30 տոկոս փոխհատուցման եւ էլեկտրաէներգիայի 207 837, իսկ գազի 81 697 բաժանորդի մասին է:

Այս աջակցությունից հետո էլ, սակայն, բողոքներն ու անջատումները շարունակվում էին: «Հայկական ժամանակ»-ի հարցմանն ի պատասխան «Գազպրոմ Արմենիա» ՓԲԸ-ից ներկայացրած տվյալների համաձայն, ինչպես վերը նշեցինք, սույն թվականի ապրիլի 30-ի դրությամբ դադարեցված է 2 հազար 304 բնակիչ-բաժանորդների գազամատակարարումը:

Ընկերությունից նաեւ հետաքրքրվել էինք, թե օգտագործված գազի դիմաց վճարը չկատարելու պատճառով անջատումների թիվն ինչքան է եղել, օրինակ, 2019 թվականի դեկտեմբերին եւ սույն թվականի հունվարին, երբ Հայաստանում արտակարգ դրություն հայտարարված չէր, եւ բոլորն աշխատում էին: 2019 թվականի դեկտեմբերին մատակարարված գազի դիմաց վճարում չկատարելու պատճառով դադարեցված է եղել 808, իսկ 2020 թվականի հունվարին՝ 1570 բնակիչ-բաժանորդների գազամատակարարումը:

Խնդրել էինք տրամադրել նաեւ 2019, 2018 եւ 2017 թվականների ապրիլ ամիսներին ունեցած պատկերը: Ըստ այդմ, 2019 թվականի ապրիլին դադարեցված է եղել թվով 1710, 2018 թվականի ապրիլին՝ 963, իսկ 2017 թվականի ապրիլին՝ 2385 բնակիչ-բաժանորդների գազամատակարարումները:

Փաստորեն, 2017 թվականի ապրիլին եւ սույն թվականի ապրիլին անջատվել են գրեթե նույն թվով բնակիչ-բաժանորդների գազամատակարարումները:

ՀԺ-ն նմանատիպ հարցում էր արել նաեւ «Հայաստանի էլեկտրական ցանցեր» ընկերություն: Տեղեկություն էինք խնդրել վերը նշված ժամանակահատվածներում էլեկտրաէներգիայի մատակարարումը դադարեցվելու վիճակագրության մասին: Այստեղից մեզ պատասխանեցին, որ «Հայաստանի էլեկտրական ցանցեր» ընկերությունը չի կարող վիճակագրություն ներկայացնել, քանի որ բնակիչ բաժանորդների էլեկտրաէներգիայի դիմաց վճարումներ չկատարելու պատճառով էլեկտրամատակարարման դադարեցման մասով հաշվառում չի կատարում: Սակայն մեր հարցման պատասխանում նշված էր, որ այս պահին մնացել են հատուկենտ հոսանքազրկված բաժանորդներ, որոնք հիմնականում ունեն դեբիտորական պարտքեր:

«Շնորհիվ ՀՀ կառավարության ձեռնարկված միջոցառումների, մեր ընկերության կողմից արդեն իսկ հայտարարված մոտեցումների, այդ թվում՝ յուրաքանչյուր սոցիալապես անապահով բաժանորդին ցուցաբերված անհատական մոտեցման, ինչպես նաեւ բաժանորդների կողմից կատարված վճարումների (որոշ դեպքերում նաեւ՝ մասնակի) այս պահին մնացել են հատուկենտ հոսանքազրկված բաժանորդներ»,- հայտնում են ՀԷՑ-ից:

Տպել
685 դիտում

Գյումրիում հստակեցնում են շենքերի կրած վնասները. նախնական տվյալով 48 շենք է վնասել, ևս 53-ի մասին ահազանգեր կան

Դեղձուտի մոդուլային դպրոցի կառուցման համար մրցույթ է հայտարարվել

ԱԱՏՄ արձանագրած խախտումների հիմքով՝ կասեցվել է շուրջ 650 տնտեսվարողի գործունեություն

Դմիտրի Պեսկովը կորոնավիրուսից բուժվել եւ դուրս է գրվել հիվանդանոցից

Սյունիքից հակահեղափոխություն չի սկսվելու. իրավապահ համակարգը տիրապետում է իրավիճակին եւ կոշտ է արձագանքելու. պատգամավոր

Խոշոր ավտովթար Լոռիում. Բախվել են Mersedes-ն ու բեռնատարը. Mersedes-ի վարորդին դուրս են բերել փրկարարները(լուսանկարներ)

Կորոնավիրուսից ավելի հաճախ տղամարդիկ են մահանում. 70-ից բարձր անձինք քիչ են վարակվում, բայց մեծ մասամբ մահացու ելքով

ԳՇ զորքերի ծառայության վարչության աշխատանքային խումբը հանկարծակի ստուգումներ է իրականացրել մի շարք զորամասերում

Գյումրու ինֆեկցիոն հիվանդանոցում կորոնավիրուսով 47 հիվանդ է բուժվում. տնային ինքնամեկուսացման ցուցում ունի 304 քաղաքացի

ԱԱԾ տնօրեն Էդուարդ Մարտիրոսյանն այցելել է պետական սահմանը վերահսկող ուղեկալներ

Արտակարգ դրությամբ պայմանավորված, Լարսը բաց է միայն բեռնատարների համար

Կորոնավիրուսի հետ զուգահեռ ապրելու համար առաջնահերթ պետք է դրսևորել անհատական բարձր պատասխանատվություն. վարչապետ

Ոչ հերքում եմ, ոչ չեմ հերքում, չեմ մեկնաբանում. Արթուր Վանեցյանը հրավիրվել է ՀՔԾ

Ռուբեն Հայրապետյանի որդին չի կալանավորվի. դատարանը մերժել է միջնորդությունը

Շիրակի մարզի 8 գյուղական բնակավայրում անօթևանների համար 55 բնակարան կկառուցվի

Ոստիկանությունը հորդորում է առաջիկա ոչ աշխատանքային օրերին զերծ մնալ մասսայական միջոցառումներից

Կորոնավիրուսի պատճառով հետաձգվել է Չեռնոգորիայի նախագահ Միլո Ջուկանովիչի ծրագրված պաշտոնական այցը Հայաստան

Կապանում ձերբակալված երրորդ քաղաքացին եւս ազատ արձակվեց. նրա ձերբակալումը ճանաչվել է ոչ իրավաչափ

Մայիսի 27-ին դեպի Երեւան 3 չվերթ կիրականացվի՝ Մինսկից, Դամասկոսից, Սանկտ-Պետերբուրգից

Հայաստանը NBA-ի մանկապատանեկան մրցաշար անցկացնելու բացառիկ հնարավորություն է ստացել