Մենք արդեն իսկ պետք է տեղեկացված լինեինք Ռուստամ Բադասյանի պաշտոնանկության մասին․ Արման Բաբաջանյան

Այն, ինչ տեղի է ունենում Հայաստանի քաղաքական դաշտում, ամենեւին պատահական չէ։ Այս մասին այսօր ԱԺ-ում ՀՀ մարդու իրավունքների պաշտպանի զեկույցի քննարկման ժամանակ ասաց անկախ պատգամավոր Արման Բաբաջանյանը։ Նրա խոսքով՝ երեւույթները, որոնք կատարվում են առանձին-առանձին, թվում է, թե կապ չունեն միմյանց հետ, բայց կապված են իրար հետ պատճառահետեւանքային կապով ու նպատակային ընդհանրությամբ։ Բաբաջանյանի համոզմամբ՝ նպատակը մեկն է՝ ամեն գնով արժեզրկել, նսեմացնել կարեւորագույն պետական ինստիտուտի՝ Ազգային ժողովի կշիռը, նշանակությունը, որպեսզի այն անընդունակ դառնա ստանձնել այնպիսի հիմնարար խնդիրների լուծումը, որոնք անշրջելիորեն երկիրը կկտրեն անցյալից։

Այն, որ այսօր հնարավոր են նման իրադարձություններ ու քաղաքական գործընթացներ, պատգամավորի կարծիքով, մեծապես պայմանավորրված է ԱԺ-ի մեծամասնությունից՝ «Իմ քայլը» խմբակցությունից։ Նա նաեւ պնդեց, որ դա կապ ունի առհասարակ գործող իշխանության վարքագծով, բարեփոխումների հարցում հանցավոր դանդաղկոտությամբ, ապագայի օրակարգերի փոխարեն անցյալի հետ անպտուղ բանավեճի մեջ մտնելու պատճառով։

«Կարծում եմ՝ ժամ առաջ պետք է գիտակցել այսօրվա իրավիճակի հարցում մեր բոլորիս բաժին հասած պատասխանատվության եւ մեղքի մասն ու համապատասխան հետեւություններ անել, այլապես պետությանը հասցվող հարվածների քանակն ու խորությունն ավելանալու են՝ վտանգի տակ դնելով Հայաստանն ավելի ժողովրդավար երկիր դարձնելու մեր պատմական այս եզակի հնարավորությունը»,- ասաց Բաբաջանյանը եւ շեշտեց, որ ծրագրել էր բոլորովին այլ ելույթ, բայց երեկ տեղի ունեցած որոշ զարգացումներ հօդս ցնդեցրին այն։ Նա ասաց, որ խոսքը վարչապետի եւ արդարադատության նախարար Ռուստամ Բադասյանի հանդիպման մասին է։ «Ո՞վ կմտածեր, որ հեղափոխությունից 2 տարի անց կարող է հնարավոր լինել նման բան՝ հեղափոխության խոստումներից գլխավորներից մեկի՝ դատական համակարգի առողջացման փոխարեն այսպիսի շրջադարձ։ Բադասյանը երեկ վարչապետի քննարկման ժամանակ ջանք ու եռանդ չխնայեց՝ վարչապետին ապացուցելու համար, թե ինչու եւ ինչպես ՀՀ-ում հնարավոր չէ իրականացնել դատավորների համատարած վեթինգ ու անցումային արդարադատություն»,- ասաց պատգամավորն ու հավելեց, որ Բադասյանը երեկ ռեկորդ սահմանեց այն հարցում, թե ինչպես կարելի է հեղափոխության առանջորդին համոզել, որ ճիշտը ոչ թե հեղափոխական փոփոխություններն են, այլ այն ամենի պահպանումը, հանուն որոնց փոփոխության տեղի է ունեցել հեղափոխությունը։ «Եվ սա այն դեպքում, երբ մենք այսօր Նիկոլ Փաշինյանի եւ ձեր քաղաքական մեծամասնության արդարադատության նախարարից պետք է լսեինք դատական համակարգում լայնածավալ բարեփոխումներ իրակացնելու ռազմավարություն մշակելու մասին, բայց փոխարենը մենք լսեցինք, թե ինչպես արդարադատության նախարարը վարչապետին զեկուցեց, որ ամբողջությամբ տապալել են նրա իսկ տված հանձնարարականի կատարումը»,- ասաց Բաբաջանյանն ու շարունակեց, որ, ըստ այդ զեկույցի, Բադասյանն արձանագրեց, որ այլեւս պետք է մոռանալ իրական վեթինգի, իրական անցումային արդարադատության ու բարեվարքության կանոնների մասին։

Բաբաջանյանի խոսքով՝ կարելի է ենթադրել, որ վարչապետին բավարարում են Բադասյանի՝ դատական համակարգը հեղափոխությունից հեռու պահելու մասին հիմնավորումները, որոնք գրեթե նույնական են մեր երկրում արդարադատությունը բռնաբարած արդարադատության նախարարներ Արփինե Հովհաննիսյանի, Դավիթ Հարությունյանի, Հրայր Թովմասյանի փաստարկների ու բերած ապացույցների հետ։ «Վարչապետի կողմից այդ մանիպուլյացիաները որպես բարեփոխումների տապալման հիմնավորումներ չընդունելու պարագայում մենք արդեն իսկ պետք է տեղեկացված լինեինք Ռուստամ Բադասյանի պաշտոնանկության մասին»,- ասաց Բաբաջանյանն ու նկատեց, որ դեռ չկա այդպիսի տեղեկություն, ինչը նշանակում է, որ Փաշինյանը եւ ԱԺ մեծամասնությունը հավասարապես պատասխանատվություն են կրում դատական համակարգի բարեփոխումների տապալման համար։