Ծխելը բարերա՞ր ազդեցություն է ունենում կորոնավիրուսի բուժման վրա. ԱՀԿ-ն ուսումնասիրություն է պատվիրել և ստացել պատասխանը

Վերջին օրերին թե՛ ողջ աշխարհում եւ թե՛ մեր երկրում պարբերաբար շրջանառվում են հոդվածներ, որ վստահեցնում են, թե ծխելը բարերար ազդեցություն է ունենում կորոնավիրուսի բուժման վրա, կարող է լինել նաեւ կանխարգելիչ գործոն: Նշվում են գիտնականների տեսակետներ, կարծիքներ, նկարագրվում են ծխի ու ախտահարված թոքերի վիճակի փոփոխության պատկերներ հիմնավորելու համար, որ ծուխը կարող է ախտահանիչ գործառույթ իրականացնել: Քիչ չեն նաեւ հակադարձող գիտնականները: Նրանք հիշեցնում են, որ ծխելն էլ, կորոնավիրուսն էլ ախտահարում են թոքերը, եւ ողջամիտ չէ մտածել, թե երկու կողմից տրվող հարվածներին դիմակայելն ավելի հեշտ է:

Եվ ահա տարակարծությունները հետազոտության ապացույցներով ամփոփելու նպատակով Առողջապահության համաշխարհային կազմակերպությունը (ԱՀԿ) ապրիլի 29-ին պատվիրել է գիտական ուսումնասիրություն. եզրահանգումը ներկայացված է ԱՀԿ կայքում: Ըստ դրա՝ կազմակերպության հրավիրած հանրային առողջապահության մասնագետների ուսումնասիրությունների արդյունքում պարզվել է, որ ծխողների մոտ ավելի հավանական է, որ COVID-19-ով վարակվելու արդյունքում զարգանա ծանր հիվանդություն:

Աշխարհում ամեն տարի ծխախոտի ուղղակի օգտագործումից մահանում է ավելի քան 7 միլիոն մարդ, եւս 1.2 միլիոն մարդ զոհ է դառնում երկրորդային ծխի ազդեցությանը: Ծխելը հայտնի ռիսկի գործոն է բազմաթիվ շնչառական վարակների համար եւ ավելացնում է շնչառական հիվանդությունների ծանրությունը:

ԱՀԿ-ն ընդգծում է, որ COVID-19-ը վարակիչ հիվանդություն է, որը հիմնականում ախտահարում է թոքերը: Ծխելը խաթարում է թոքերի նորմալ կենսագործունեությունը, ինչը դժվարացնում է օրգանիզմի պայքարը կորոնավիրուսների եւ այլ հարուցիչներով պայմանավորված հիվանդությունների դեմ: Ծխախոտը նաեւ հիմնական ռիսկային գործոն է ոչ վարակիչ հիվանդությունների համար, ինչպիսիք են սիրտ-անոթային հիվանդությունը, քաղցկեղը, շնչառական հիվանդությունը եւ շաքարախտը, որոնք կորոնավիրուսակիր մարդկանց ավելի մեծ ռիսկի են ենթարկում՝ հիվանդության զարգացման եւ ծանրացման առումով: Առկա հետազոտությունները միանշանակ վկայում են, որ հիվանդության բարդացումն ու մահվան հավանականությունն ավելի մեծ է ծխողների համար:

Նշվում է, որ ԱՀԿ-ը մշտադիտարկում է COVID-19-ի եւ ծխախոտի կապը: Գնահատականների հիմքում դրվում են տվյալներն այն հետազոտությունների, որ շարունակաբար այս նոր հիվանդության զարգացման ու նիկոտինի կապն են ուսումնասիրում:

Հետազոտողներին, գիտնականներին եւ լրատվամիջոցներին ԱՀԿ-ն հորդորում է զգույշ լինել ծխախոտի կամ նիկոտինի՝ COVID-19-ի ռիսկը նվազեցնելու մասին չճշտված պնդումներ տարածելու առումով: COVID-19-ի կանխարգելման կամ բուժման գործընթացում նիկոտինի դրական ազդեցության մասին տեղեկատվությունը հավաստի ու ողջամիտ չէ:

Այս՝ արտակարգ դրության, կարանտինային նորմերի շրջանը նաեւ հարմար պահ է դիտարկվում ծխելը թողնելու համար: ԱՀԿ-ն խորհուրդ է տալիս ծխողներին անհապաղ քայլեր ձեռնարկել՝ օգտվելով ապացուցողական բժշկության արդյունավետ մեթոդներից: Տարբեր երկրներում դրանք տարբեր են՝ զանգերի-հաղորդագրությունների միջոցով խորհրդատվության եւ հոգեբանական օգնության ստացում, նիկոտինի փոխարինման մեթոդներ, օրինակ՝ մաստակայինը եւ այլն:

Նշելով, որ գլանակը հանգցնելուց հետո մոտ 20 րոպեի ընթացքում խաղաղվում է սրտի աշխատանքը, իջնում արյան ճնշումը, իսկ 12 ժամ անց արյան մեջ ածխաթթու գազի մակարդակը դառնում է նորմալ՝ ԱՀԿ-ն ընդգծում է, որ թոքերի գործառույթը կարգավորվում է 2-12 շաբաթվա ընթացքում, իսկ քրոնիկ հազը եւ շնչառության թուլությունն անցնում են 1-9 ամիս հետո:

Իսկ մենք հավելենք, որ COVID-19-ի բուժման եւ կանխարգելման գիտահետազոտական փնտրումներին զուգահեռ հանրության մեջ պարբերաբար լայն տարածում են գտնում ամենատարօրինակ ու անհեթեթ առաջարկներ: Երբեմն դրանք հնչում են բժիշկների ու քաղաքական բարձրագույն պաշտոններն զբաղեցնողների շուրթերից, եւ հանրությունը տարակուսանքով, բայց ակամա հավատ է ընծայում դրանց: Օրինակ՝ ԱՄՆ նախագահ Դոնալդ Թրամփը տեսախցիկների առաջ կարծիք էր հայտնել, թե ախտահանիչ միջոցները կարելի է ներարկվել կամ խմել. դրանք կմաքրեն օրգանիզմը ներսից: Մինչ բժիշկները նետվել էին հերքելու, համոզելու, որ մարդիկ հանկարծ նման բան չանեն, ոմանք հասցրել էին փորձել: Մի ռուս բժիշկ էլ հայտարարել էր, որ լիովին հնարավոր է կանխել կորոնավիրուսի զարգացումն օրգանիզմում, եթե առաջին ախտանշանները զգալուն պես մարդն սկսի սպիրտ շնչել: Բժիշկը հավաստել էր, որ ինքն իրեն բուժել է սպիրտով թրջած թանզիֆե դիմակ կրելով: Պակաս վտանգավոր այս մեթոդը շատ ռուսների սրտով էր եղել, պաշտոնական հերքումն էլ ընդունվել էր պակաս ոգեւորությամբ:

Ինչեւէ, հետաքրքիր ու շատ դյուրին բուժման մեթոդի մասին լսելիս ողջամիտ է անպայման դա ճշտել տեղեկատվության հավաստի աղբյուրներից, հետո միայն խորհել կիրառելու մասին: