Կառավարությունն արտոնություն տրամադրեց «Գրին ֆարմեր» եւ «Նանման» ՍՊԸ-ներին․ ընդհանուր կստեղծվի 40-ից ավելի աշխատատեղ

ՀՀ Կառավարությունն այսօրվա նիստում որոշում կայացրեց արտոնություն տալ «Գրին ֆարմեր» եւ «Նանման» ՍՊԸ-ներին։

«Գրին ֆարմեր»-ի համար ծրագրի շրջանակներում 3 տարով հետաձգվում է 2020-ի մայիսի 22-ից մինչեւ 2021-ի դեկտեմբերի 31-ը ներառյալ ներմուծվող ապրանքների ավելացված արժեքի հարկի վճարման ժամկետը։

Նշենք, որ ընկերությունը հիմնադրվել է 2016 թվականին։ 2019թ. տարեսկզբին Գեղարքունիքի մարզի Դդմաշեն համայնքում հիմնվել է 30 հա ընդհանուր մակերեսով խնձորի այգի, ինչպես նաեւ նույն վայրում ընթանում է 4400 ք/մ ընդհանուր մակերեսով եւ 3000 տոննա տարողությամբ գազային կարգավորվող միջավայրով սառնարանային տնտեսության շինարարություն, որի 1/3 մասը կհանձնվի շահագործման 2020թ.-ի երրորդ եռամսյակում եւ ավարտին կհասնի 2022թ.-ին՝ խնձորի բերքի աճին համապատասխան:

1-ին փուլով կառուցվելիք 1.100 ք/մ մակերեսով սառնարանը շահագործման հանձնելու համար անհրաժեշտ է ընդամենը 1,5 մլրդ ՀՀ դրամ, որից 725 հազար եվրոյին համարժեք՝ մոտ 435 մլն ՀՀ դրամը՝ Հայաստանի զարգացման եւ ներդրումների կորպորացիա ՈՒՎԿ ՓԲԸ-ի հետ լիզինգային սուբսիդավորվող ծրագրի շրջանակներում: Նմանատիպ սառնարանային տնտեսությունը նման տեխնոլոգիայով միակն է ՀՀ-ում եւ իր տեխնիկական տվյալների շնորհիվ հնարավորություն կտա մինչեւ 14 ամիս պահել խնձորը թարմ վիճակում: Այսպիսով խնձորի մեծածախ վաճառքը հնարավոր կլինի իրականացնել տնտեսապես ամենահարմար պահին:

Մեկ այլ որոշմամբ կառավարությունը ներդրումային ծրագրի շրջանակներում ազատեց «Գրին ֆարմեր» ընկերությանը ներմուծվող ապրանքների մաքսատուրքից:

Ընկերության կողմից ներմուծվող ապրանքները օգտագործվելու են խնձորի այգում սառնարանային տնտեսությանն ուղղված շինարարական աշխատանքների իրականացման համար:

Ընկերությունը 2017 եւ 2018 թվականներին ՀՀ Կառավարության որոշումներով ստացել է մաքսատուրքից ազատման արտոնություն, որոնց շրջանակներում իրականացրել է 2 մլրդ դրամի ներդրում եւ ստեղծել 117 նոր աշխատատեղ:

Ծրագրի շրջանակներում կատարվել է մոտ 550 մլն դրամի ներդրումներ՝ տեղանքի նախապատրաստման, ինֆրաստրուկտուրայի կառուցման աշխատանքների, ներառյալ՝ ջուր, էլեկտրաէներգիա եւ գազ։ Նախատեսվում է կատարել եւս 950 մլն դրամի ներդրումներ, որից 515 մլն դրամի ձեռք է բերվելու սառնարանային տնտեսության սարքավորումներ եւ բաղկացուցիչ մասեր սեփական միջոցներով, իսկ 435 մլն դրամի (համարժեք է 725,000 եվրոյին) սառնարանային տնտեսության բաղկացուցիչ մասերը ձեռք է բերվելու ADVICE AND CONSULTING SRL ընկերությունից լիզինգով Հայաստանի զարգացման եւ ներդրումների կորպորացիա ՈՒՎԿ ՓԲԸ-ի հետ համատեղ։

Ներկայումս առկա է 240 աշխատատեղ: Նախատեսվում է ներդրումային ծրագրի շրջանակում ստեղծել 40 նոր աշխատատեղ՝ 170 հազար դրամ միջին աշխատավարձով։

Ծրագրով նախատեսված արտադրանքի ընդհանուր ծավալը կկազմի 1 մլրդ 960 մլն դրամ, որից 726 մլն դրամի արտադրանքը կիրացվի ՀՀ տարածքում, 1 մլրդ 234 դրամի արտադրանքը՝ ԵԱՏՄ այլ անդամ երկրների տարածքում:

Արտոնություն ստանալու համար ներկայացված ապրանքների արժեքը կազմում է 339.2 մլն դրամ: Մաքսատուրքից ազատման արտոնությունը կազմում է 28.5 մլն դրամ:

Մյուս որոշմամբ արտոնություն տրամադրվեց «Նանման» ընկերությանը։ Արտոնությունը վերաբերում է գերակա ոլորտում իրականացվող ներդրումային ծրագրի շրջանակներում ներմուծված սարքավորումները, դրանց բաղկացուցիչ ու համալրող մասերը, հումքը մաքսատուրքից ազատելուն։

Ընկերության կողմից ներմուծվող ապրանքները օգտագործվելու են ջինսե հագուստի արտադրության համար (Կոտայքի մարզ)։

Ընկերությունը 2018 թվականի դեկտեմբերի 20-ին ՀՀ Կառավարության որոշմամբ ստացել է մաքսատուրքից ազատման արտոնություն, որի արդյունքում փաստացի իրականացրել է 100 մլն դրամի ներդրում եւ ստեղծել է 9 նոր աշխատատեղ:

Նոր ծրագրով նախատեսվում է իրականացնել 155 մլն դրամի ներդրում ցանկում ներկայացված ներմուծվող հումքի, իսկ մնացած մասը՝ նոր սարքավորումների ձեռքբերման համար: Ներկայումս առկա է 22 աշխատատեղ: Նախատեսվում է ներդրումային ծրագրի շրջանակում ստեղծել 3 նոր աշխատատեղ՝ 105 հազար դրամ միջին աշխատավարձով։

Ծրագրով նախատեսված արտադրանքի ընդհանուր ծավալը կկազմի 201 մլն 450 հազար դրամ, որից 91 մլն 250 հազար դրամի արտադրանքը կիրացվի ՀՀ տարածքում, 110 մլն 200 հազար դրամի արտադրանքը՝ ԵԱՏՄ այլ անդամ երկրների տարածքում:

Արտոնություն ստանալու համար ներկայացված ապրանքների արժեքը կազմում է 130 մլն դրամ: Մաքսատուրքի ազատման արտոնությունը կազմում է 13 մլն դրամ: