ԱՀԿ-ն կոչ է անում ավելացնել դեքսամետազոնի արտադրության ծավալները, Դելիում ու Բրազիլիայում վարակի աճը չի դանդաղում

Կորոնավիրուսի վարակը շարունակում է սպառնալիք մնալ ամբողջ աշխարհում առողջապահական համակարգերի, տնտեսությունների, աշխատատեղերի ու քաղաքացիների կյանքի համար: Աշխարհի որոշ երկրներում վարակի աճի տեմպերը թուլանում են, այլ հատվածներում՝ ահագնանում: Աշխարհում տասնյակ պետություններ շարունակում են աշխատել՝ կորոնավիրուսի դեմ պատվաստանյութի ստեղծման համար, սակայն վերջնական արդյունք դեռ գրանցված չէ: 

Դեքսամետազոնի պահանջարկը մեծանում է.

Առողջապահության համաշխարհային կազմակերպությունը կոչ է արել մեծացնել դեքսամետազոն դեղի արտադրության ծավալները: Հիշեցնենք, ապացուցվել էր այս դեղի էֆեկտիվությունը կորոնավիրուսից մահացության աճի տեմպերը նվազեցնելու գործում:

ԱՀԿ գլխավոր տնօրեն Թեդրոս Ադհանոմ Հեբրեյեսուսը  հայտարարել է, որ դեղամիջոցի պահանջարկն աշխարհում կտրուկ ավելացել է այն բանից հետո, երբ Օքսֆորդի համալսարանի գիտնականները հրապարակել էին եզրակացություն  Covid-19-ի բուժման գործում դեղի էֆեկտիվության մասին:

Կլինիկական փորձարկումների ժամանակ ապացուցվել էր, որ թոքերի արհեստական օդափոխության սարքերին միացված հիվանդների մահացության հավանականությունը նվազում է 40-ից մինչեւ 28 տոկոս՝ դեքսամետազոնի կիրառության դեպքում:

ԱՀԿ ղեկավարը հայտնել է, որ հաջորդ քայլը լինելու է դեքսամետազոնի արտադրության ծավալների ավելացումն ու հետեւողականությունը, որպեսզի այն տարածում ստանա ամբողջ աշխարհում եւ ճիշտ քանակով հայտնվի այն երկրում, որտեղ դրա կարիքը կա:

Դեքսամետազոնը բժշկության մեջ կիրառվում է արդեն ավելի քան 60 տարի: Այն հակաբորբոքային ազդեցություն ունի: ԱՀԿ-ն ընդգծում է, որ դեղամիջոցն արժե օգտագործել միայն ծանր վիճակում գտնվող հիվանդների դեպքում եւ միայն բժշկի հատուկ ցուցումով:

Լատինական Ամերիկայում վարակի տարածումը չի թուլանում.

Ջոն Հոփքինսի անվան հետազոտական համալսարանի տվյալներով, Լատինական Ամերիկայում կորոնավիրուսից մահերի ցուցանիշն արդեն գերազանցում է 100 հազարը: Այս թվի գրեթե կեսը գրանցված է Բրազիլիայում, որտեղ կորոնավիրուսով վարակման եւ մահացության տվյալները զիջում են միայն ԱՄՆ-ին:

Մեքսիկայում մահացել է ավելի քան 23 հազար մարդ, սակայն Բրազիլիայի եւ Մեքսիկայի ղեկավարությունները այդպես էլ չեն անցել կոշտ կարանտինային սահմանափակումների: Շատ են վարակից զոհերը  նաեւ Պերուում եւ Չիլիում՝ համապատասխանաբար գրեթե  8400 եւ 4500 մահվան դեպք:

Դելիում հնարավոր է՝ կրկին անցնեն խստացումների.

Հնդկաստանի մայրաքաղաք Դելիում գրանցվել է համաճարակի բռկումից ի վեր կիորոնավիրուսով վարակման ամենամեծ մեկօրյա ցուցանիշը՝ գրեթե 4 հազար դեպք 1 օրում: Ընդհանուր առմամբ, համաճարակի ամբողջ ժամանակահատվածում Դելիում կորոնավիրուս է հաստատվել ավելի քան 66 հազար մարդու մոտ: Սա ամենամեծ ցուցանիշն է երկրում՝ Մումբայից հետո:

Հնդկաստանի մայրաքաղաքում վարակման կորը շարունակում է աճել, իշխանությունները հավաստիացնում են՝ կանցնեն ավելի խիստ կարանտինային միջոցառումների եւ ամենախիստ ձեւով կհսկվի կոնտակտավոր մարդկանց տեղաշարժը:

Ավելի վաղ երկիրը թուլացրել էր կարանտինային սահմանափակումները, սակայն վարակի տարածման տեմպերը սկսել էին ահագնանալ: Ընդհանուր առմամբ, Հնդկաստանում կորոնավիրուսի  ավելի քան 440 հազար դեպք է հաստատվել, մոտ 14.400 մարդ մահացել է:

ԵՄ-ն ու Մալդիվները բացվում են զբոսաշրջիկների համար.

Հուլիսի 15-ից Մալդիվյան կղզիները կրկին բաց կլինեն զբոսաշրջիկների համար: Այս մասին հայտնել է նախագահ Իբրահիմ Սոլիխը: Ընդ որում, օտարերկրացիներից ոչ մեկի համար պարտադիր չի լինելու կորոնավիրուսի թեստ հանձնելը:

Մալդիվների համար զբոսաշրջությունը համարվում է եկամտի հիմնական աղբյուրը, մարտ ամսից դադարեցվել էր դեպի կղզիներ միջազգային հաղորդակցությունը: Ամբողջ ժամանակահատվածի ընթացքում  կորոնավիրուս է հաստատվել երկրի 2200 բնակչի մոտ:

Եվրամիությունում քննարկում են հուլիսի 1-ից սահմանները բացելու հարցը: Բացառություն են կազմում երկրները, որտեղ նախկինի նման դիտվում է վարակվածության բարձր ցուցանիշ: Մասնավորապես, առաջարկվում է Եվրոպայի սահմանները փակ պահել ԱՄՆ-ից եւ Ռուսաստանից  ժամանողների համար:

Եվրամիությունը ծրագրում է հստակ չափորոշիչներ սահմանել, թե որ երկրներն են համարվում անվտանգ: Բացի ԱՄՆ-ից եւ Ռուսաստանի Դաշնությունից, ԵՄ երկրները վտանգավոր են համարել նաեւ Բրազիլիայի քաղաքացիների մուտքը դեպի ԵՄ տարածք:

ԱՄՆ-ում էլ, հուլիսի 1-ից թույլատրվում է Նյու-Յորքի լողափերում հանգիստն ու ծովում լողալը: Այս մասին թվիթերի իր էջում հայտնել է Նյու-Յորքի քաղաքապետ Բիլլ դե Բլազիոն: Նա նաեւ խորհուրդ է տվել պահպանել սոցիալական հեռավորություն եւ կրել դիմակներ լողափին: Լողափերը սկսել էին  բացվել մայիսի 25-ից, սակայն ծովը մտնելը արգելված էր մինչ օրս: