Նոր դպրոցի համար կառուցվելիք վերգետնյա անցումը թթվածնի նման անհրաժեշտ է աշակերտներին

Վանաձոր քաղաքի համար 7 հիմնական դպրոցը, որ վերակառուցվեց եւ շահագործման հանձնվեց վերջերս, վերգետնյա հետիոտնային անցում կունենա՝ աշակերտների անվտանգության նկատառումներից ելնելով: Դպրոցը վթարային էր դարձել երկրաշարժի ժամանակ, այնուհետ պայթեցվել: 2017թ-ին դպրոցի հին տեղում կառուցվեց նորը: Շենքը գտնվում է Մ-6 միջպետական ճանապարհի հարեւանությամբ: Սա այն ճանապարհն է, որտեղ հաճախ են վթարներ ու վրաերթեր գրանցվում, հաճախ նաեւ՝ մահվան ելքով: Թեպետ տարածքում արագաչափեր են տեղադրված, սակայն որոշ վարորդներին դա այդքան էլ չի հետաքրքրում: Դպրոցը նախատեսվում է շահագործման հանձնել այս տարի: Ծնողների հիմնական մտահոգությունը երեխաների անվտանգության հարցն էր, որը կարծես թե լուծվում է:

Վանաձորի քաղաքապետարանի քաղաքաշինության եւ ճարտարապետության բաժնի պետ Սուրեն Աբովյանը ՀԺ-ի հետ զրույցում հայտնեց, որ նախագիծն իրականացվել է Վանաձորի քաղաքապետարանի կողմից, շինարարությունը կրականացվի տարածքային զարգացման հիմնադրամի միջոցներով, մրցույթը կայացել է, մոտ օրերս արդեն աշխատանքները կմեկնարկեն: «Նախատեսված է, որ մինչեւ ուսումնական տարվա սկիզբ աշխատանքները պետք է ավարտված լինեն, ընդհանուր գումարը մոտ 35 մլն դրամ է, աշխատանքները ամբողջությամբ կիրականացվեն պետական միջոցներով»,- ասաց Սուրեն Աբովյանը, հավելելով, որ նախագծի իրականացման ընթացքում ստացվել են բոլոր անհրաժեշտ համաձայնեցումները, քանի որ դպրոցը կառուցված է միջպետական ճանապարհի հարեւանությամբ:

Քաղաքի գլխավոր ճարտարապետի փոխանցմամբ՝ դպրոցի շինարարությունը մեկնարկել էր 2017թ-ի մայիսին, շահագործման հանձնելու վերջնական ակտը հաստատվել է 1 շաբաթ առաջ:

Թիվ 7 հիմնական դպրոցի տնօրեն Լուսիկ Սարգսյանը ՀԺ-ի հետ զրույցում վստահեցրեց՝ նոր ուսումնական տարին կդիմավորեն նոր դպրոցում. «Հին դպրոցն արդեն հանձնել ենք, գույքը տեղափոխել ենք նոր դպրոց»:

Ներկա դրությամբ 7-րդ դպրոցը 289 աշակերտ ունի: Տնօրենը հիշում է՝ վթարային դարձած, այնուհետ արդեն քանդված դպրոցից նոր դպրոց տեղափոխվել էին 1999 թ-ին մինչեւ այս տարի. «Պայմանները լավ չէին, դպրոցը գործում էր «Տեխնոսարք» գործարանի մասնաշենքերից մեկում, հարմարեցրել էինք որպես դպրոց, հարթ տանիք ուներ, անձրեւաջրերը միշտ թափվում էին, անգամ հասնում էին 1-ին հարկ…մեր միջոցներով վիճակը բարելավել էինք, որ աշակերտներ չկորցնենք: Ի սկզբանե մասնաշենքը հարմար չէր որպես դպրոց, նախ տեղը լավը չէր՝ թաղամասից կտրված, բնակելի տներ չկային, գետի կողքին, գործարանի տարածքում, հետո գործարանը քանդեցին, մասնավորին տվեցին, մնացինք ավերակների մեջ…»:

Դպրոցում սովորում են նաեւ ներառական կրթություն ստացող երեխաները, մինչդեռ, նոր կառուցվելիք վերգետնյա անցումը նրանց կարիքներին համապատասխանեցված չէ: Տնօրենն այս ուղղությամբ ասաց՝ քննարկումներ արվել են. «Հենաշարժողական խնդիր ունեցող երեխա, այո, ունենք: Լուծման տարբերակներ առաջարկվել է, հուսանք՝ մի օր էլ դա կլինի»:

Լուսիկ Սարգսյանը հիշում է բոլոր այն վթարներն ու վրաերթերը, որ եղել են դպրոցի հարակից միջպետական ճանապարհի վրա, ասում է՝ վերգետնյա անցումը թթվածնի նման անհրաժեշտ էր դպրոցին ու դպրոց հաճախող երեխաներին. «Մենք ի սկզբանե, դպրոցի կառուցման ժամանակ այդ հարցը բարձրացրել ենք… եթե վերգետնյա անցումը չլիներ, ապա… սա հրաշալի որոշում էր, շնորհակալ ենք կառավարությանն ու բոլոր շահագրգիռ կառույցներին, որ գումար հատկացրեցին ու անցումը կկառուցվի, ու մինչեւ դպրոցի գործելը կլինի արդեն անցումը»:

Սուրեն Աբովյանի փոխանցմամբ՝ վերգետնյա անցումը հենաշարժողական խնդիրներ ունեցող անձանց հարմարեցնելու հարցը քննարկվել է համապատասխան մարմինների հետ, ասում է՝ լուծումը վերելակ տեղադրելն է, որը լրացուցիչ գումար է պահանջում: Թեպետ ներկա փուլում դա չի լինի, սակայն աշխատանքներն այնպես կարվեն, որ ցանկացած պահի հնարավոր կլինի վերելակը տեղադրել. «Եթե մենք հիմա որոշենք, որ մեկ տարի էլ պետք է վերելակի տեղադրմանը սպասենք, ապա դպրոցն այս տարի էլ չի գործի, ավելի լավ է հիմա անցումը արագ կառուցենք, հետո արդեն աշխատենք վերելակի տեղադրման ուղղությամբ»:

Տպել
1273 դիտում

Պայքարի օրենքը. Սևրի պայմանագրի 100-ամյակը

«Նոան» դարձավ Հայաստանի սուպերգավաթակիր՝ կրկին «քամբեք» անելով «Արարատ-Արմենիայի» դեմ խաղում

ՎՏԲ-Հայաստան Բանկը բարելավել է սպառողական վարկերի պայմանները

Նոր դաստիարակները մասնագիտական նրբություններով կկիսվեն երիտասարդ երկաթուղայինների հետ

Գնացքների երթևեկության անվտանգությունը՝ տրանսպորտային անվտանգության բաղադրիչ

IDBank -ում համավարակի ընթացքում աշխատանքն ընթանում է ամբողջ թափով

Վիվա-ՄՏՍ-ն ավելացնում է սպասարկման կենտրոնների թիվը

ԳեոՊրոՄայնինգ Գոլդ ընկերությունը շնորհավորում է երկաթուղային գործընկերներին մասնագիտական տոնի կապակցությամբ

Յունիբանկի դոլարային պարտատոմսերը ցուցակվել են Մոսկվայի բորսայում

Վիվա-ՄՏՍ. անվճար զանգի հնարավորություն՝ ընկերությունների հաճախորդների համար

ՎՏԲ-Հայաստան Բանկը Renault Armenia-ի հետ համատեղ առաջարկում են ավտովարկավորման ամենաշահավետ պայմանները շուկայում

Այգեպարում վերսկսվել է կիսակառույց տան շինարարությունը

Արտագնա աշխատանքի հնարավորությունից զրկված քանի հոգի է դիմել Հայաստանում աշխատելու համար. մարզերում թվերը շատ տարբեր են

Կորոնավարակը, աշխարհն ու մենք

Տավուշի և Լոռու հանգստյան տներից մի քանիսի սննդի օբյեկտներում խախտումներ են գրանցվել, բայց կա դրական առաջընթաց

Տրանսֆերային գնագոյացման կարգավորումները տարածվում են շահութահարկի, ԱԱՀ-ի եւ ռոյալթիի նկատմամբ․ Ավետիսյան

Երևանի Կենտրոն վարչական շրջանում ՔՏՀԱՏՄ-ի կողմից խախտումներ չեն հայտնաբերվել

Մտահոգիչ խախտումներ՝ Ծաղկաձորի խոշոր հյուրանոցներում․ ՍԱՏՄ-ն կրկին կասեցման միջնորդություններ կներկայացնի

Որքան աշխատավարձ կստանան նոր պարեկային ծառայության պարեկները․ ոստիկանությունը քննարկման է դրել սահմանաչափերը

Խախտումներ են արձանագրվել Սպիտակի բենզալցակայաններում ու շինանյութի առևտրի կետերում. ՇՎՏՄ մշտադիտարկումներ