Ուրախ եմ, որ բոլորիդ դիմակներով եմ տեսնում. ճանաչողական այցով Գյումրիում էր առողջապահության նախարարը (լուսանկարներ)

«Ուրախ եմ, որ բոլորիդ դիմակներով եմ տեսնում»,- գյումրեցի լրագրողներին դիմեց ՀՀ առողջապահության նախար Անահիտ Ավանեսյանն այսօր Գյումրի կատարած ճանաչողական այցի ժամանակ:

Նախարարն ասաց՝ Շիրակն առաջին մարզն է, որից սկսել է պաշտոնական այցերն ու խնդիրներին ծանոթանալու ընթացքը: Այնուհետ Շիրակի մարզպետ Հովհաննես Հարությունյանի ուղեկցությամբ մասնակցեց բժշկական կենտրոնի թթվածնային կայանի և ռենտգեն կոնտրաստային նոր համակարգչային տոմոգրաֆիայի կաբինետի բացմանը։

Թթվածնային կայանը կառուցվել է կառավարության ֆինանսավորմամբ՝ 100 մլն դրամի շրջանակներում: Այն կապահովի ոչ միայն բժշկական կենտրոնի թթվածնի պահանջարկը, այլև անհրաժեշտության դեպքում բուժհաստատությունը թթվածին կմատակարարի այլ հիվանդանոցների ևս։

«2020 թվականին քովիդի բաժանմունքը երբ բացվեց, մենք ունեցանք թթվածին ապահովելու լուրջ խնդիր, քանի մարզի թթվածին ապահովելու հնարավորությունները 140-ից 170 բալոն է, իսկ մենք սկսեցինք օգտագործել 200 և ավելի բալոն: Օր է եղել, նույնիսկ 270 բալոն: Հիմա այս սարքն արդեն ի վիճակի է օրական 240 բալոն թթվածին արտադրել: Կայանն էլ կա և վերալիցքավորում է: Այսինքն, մարզն այլևս թթվածնի խնդիր չի ունենա: Հարկ եղած դեպքում այլ մարզերին կարող ենք մատակարարել»,- լրագրողների հետ զրույցում տեղեկացրեց ԲԿ տնօրեն Արմեն Իսահակյանը:

Տոմոգրաֆիկ նոր սարքավորումը կենտրոնը ձեռք է բերել լիզինգային ծրագրի շրջանակներում: Սարքավորման  առկայությունը հնարավորություն կտա մարզի ազգաբնակչությանը անհետաձգելի մի շարք հետազոտություններ անցնել Գյումրիում  և չհասնել մայրաքաղաք։ Արմեն Իսահակյանն ասաց՝ տնօրեն դառնալու առաջին օրվանից է ցանկացել, որ գյումրեցին մնա ու բուժվի տեղում: Իսկ այս նոր սարքը հնարավորություն կտա ապրիլ-մայիսից կենտրոնում իրականացնել կյանք փրկող նոր ծրագիր, և սրտամկանի ինսուլտ ստացած հիվանդ, օրինակ, էլ չի հասցվի մայրաքաղաք: Տեղում, շատ արագ անոթը կուսումնասիրվի, բուժումն արագ կկազմակերպվի»,- ասաց Իսահակյանը:

Տոմոգրաֆիկ սարքավորումը նոր է գործարկվում, բայց արդեն կոնտրաստ նյութով հետազոտվելու համար գրանցվածներ կան: Ամեն ամիս այդ հետազոտության համար «Գյումրի» ԲԿ-ից մայրաքաղաք է ուղեգրվում 10-15 հիվանդ, տաերկան 200 մարդու մասին է խոսքը: Հիմա արդեն չեն գնա, կհետազոտվեն Գյումրիում: Այս թվի մեջ չեն մտնում նրանք, որոնք ինքնուրույն են գնացել Երևան, և Շիրակի մարզի տարբեր համայնքներից են:

Նախարար Անահիտ Ավանեսյանը ողջունելով իրականացված ծրագրերը՝ ասաց, ամեն ինչ արվելու է, որպեսզի մարզերի բուժհաստատությունները էլ ավելի կայունանան:

«Չնայած անցած տարի չգնաժամային էր, այնուամենայնիվ մենք մեծ աշխատանք կատարեցինք բուժհաստատությունները սարքավորումներով համալրելու: Դրանք կլինեն շարունակական»,-ասաց Ավանեսյանը:

Ներկա պահին նախարարության բազմաթիվ ծրագրերից Ավանեսյանն ընդգծեց կորոնավիրուսիի պատվաստանյութի ներկրումն ու պատվաստման գործընթացի կազմակերպումը: «Մի քանի հարթակով բանակցում ենք Հայաստանի համար լավագույն պայմաններով ապահովելու պատվաստանյութը: Արդեն վերջնական փուլին ենք հասել ռուսական «Սպուտնիկ»-ի ձեռք բերման հարցում: Փոքր խմբաքանակ է բերվել, դա նվեր է, ավելի մեծ խմբաքանակի սպասում ենք մոտ ժամանակներում»,- տեղեկացրեց նախարարը:

Եղել են պատվաստվողներ՝ հարցին, պատասխանեց՝ այո (առաջին պատվաստվողներից մեկը առողջապահության նախկին նախարար Արսեն Թորոսյանն է եղել ու փոխնախարարները- խմբ.): Պատվաստվել են, կոմնակի ազդեցություններ չեն եղել, հանգիստ է եղել ընթացքը: Պատվաստման ծրագրում առաջնային օղակը ռիսկային խմբերն են լինելու: Բայց պատվաստումը կրելու է կամավոր բնույթ: Ոչ մեկին ոչինչ չի պարտադրվի:

Այս պահին, ըստ նախարարի, կորոնավիրուսի թվերը բարձր չեն, սակայն զգոնությունը պետք չէ թուլացնել:

«Մեզ հաջողվեց վարակը բերել կառավարելի շրջան, և մենք որևէ խնդիր չունենք ճիշտ ժամանակին բժշկական օգնություն տրամադրելու հարցում: Բայց ասել, որ կորոնային հրաժեշտ ենք տվել, շատ վաղ է: Եվ կանխատեսումներ անելը բավականին բարդ է: Շատ կարևոր է, այն փոքրաթիվ միջոցառումներին, որոնք որ դեռ առկա են, բնակչությունը հետևի, եթե պատվաստումների ընթացքը բարեհաջող սկսվի, և ռիսկային խմբերը պատվաստվեն, պիտի որ նման բարձր ալիքներ արդեն չունենանք»,-ասաց նախարարը:

Անահիտ Ավանեսյանն այնուհետ այցելեց Գյումրու մոր և մանկան ավստրիական մանկական հիվանդանոց:

Լուսանկարները «Հայկական ժամանակի»