Ռուսաստանը, Թուրքիան ու Քաթարը Սիրիայի հարցով բանակցությունների նոր փուլ են սկսում

Ռուսաստանը, Թուրքիան և Քաթարը պայմանավորվել են նոր  բանակցային գործընթաց սկսել Սիրիայում զինված հակամարտությունը դադարեցնելու համար: Այս մասին հինգշաբթի օրը ՝ մարտի 11-ին, հայտարարել է Թուրքիայի արտգործնախարար Մևլութ Չավուշօղլուն ՝ Ռուսաստանի Դաշնության իր գործընկերներ Սերգեյ Լավրովի և Քաթարի գործընկեր ՝ Մուհամեդ բեն Աբդել Ռահման Ալ Թանիի հետ Դոհայում կայացած հանդիպումից հետո: Թուրք դիվանագետի խոսքով ՝ բանակցությունների նպատակը կլինի Սիրիայում երկարաժամկետ խաղաղության հաստատմանը նպաստելը, փոխանցում է Deutch Welle պարբերականը:

Նախարարները համոզված են, որ սիրիական հակամարտությունը ռազմական լուծում չունի և մտադիր են խթանել Սիրիայում քաղաքական գործընթացները ՄԱԿ-ի օժանդակությամբ: Այս մասին ասված է ՌԴ ԱԳՆ կայքում հրապարակված համատեղ հայտարարության տեքստի մեջ: Երկրները նաև շեշտել են ահաբեկչության դեմ պայքարում  իրենց վճռականությունը և նշել Սիրիայի ինքնիշխանությունն ու տարածքային ամբողջականությունը խարխլող, ինչպես նաև հարևան երկրների ազգային անվտանգության համար վտանգ ներկայացնող անջատողական ծրագրերին դեմ հանդես գալու պատրաստակամությունը:

Կողմերը «վերահաստատեցին իրենց դիրքորոշումը ՄԱԿ-ի միջնորդությամբ Սիրիայի սահմանադրական կոմիտեի աշխատանքը հեշտացնելու օգտին» և «խոր մտահոգություն» հայտնել Սիրիայում հումանիտար իրավիճակի վերաբերյալ՝  ներառյալ COVID-19 համաճարակի հետևանքները: Երկրները Առողջապահության համաշխարհային կազմակերպությանը կոչ են արել «առաջնահերթ» դասակարգել պատվաստումները Սիրիայում, այդ թվում ՝ COVAX նախաձեռնության միջոցով:

Հայտարարությունը վերաբերում է նաև սիրիացի փախստականների անվտանգ և կամավոր վերադարձին նպաստելու անհրաժեշտությանը և «ձերբակալվածներին ազատ արձակելու հարցում սիրիական կողմերի միջև վստահություն ստեղծելու նախաձեռնություններին»: Այս բոլոր նպատակներին հասնելու համատեղ ջանքերը կվստահվեն երեք երկրների հատուկ ներկայացուցիչներին:

Ռուսաստանի Դաշնությունը, Թուրքիան և Քաթարը սատարում են 2011-ին սկսված սիրիական հակամարտության տարբեր կողմերին: Այսպիսով, Թուրքիան և Քաթարը կապեր ունեն ապստամբների հետ, ովքեր ցանկանում էին տապալել Սիրիայի նախագահ Բաշար ալ-Ասադին: Իր հերթին, Ռուսաստանը տարատեսակ, այդ թվում՝ ռազմական աջակցություն է տրամադրում Ասադի ռեժիմին: 

Քաթարը օգտակար է համարում Ռուսաստանի և Թուրքիայի հետ Սիրիայի հարցով եռակողմ խորհրդակցությունները և հույս ունի դրանք պարբերական  դարձնել: Այս մասին էլ հայտարարել է փոխվարչապետ, Քաթարի արտաքին գործերի նախարար Մուհամեդ բեն Աբդել Ռահման Ալ Թանին:

«Հուսով ենք, որ նման հանդիպումները պարբերաբար կանցկացվեն համաձայնեցված մթնոլորտում և կնպաստեն սահմանված նպատակների իրականացմանը», - ասել է նա: 

Նախարարը հիշեցրել է, որ «Սիրիան այժմ ծանր ժամանակներ է ապրում»: «Եղբայրական սիրիացի ժողովուրդը ստիպված է հաղթահարել էական դժվարությունները, որոնք աճել են կորոնավիրուսի համաճարակի հետևանքով ՝ ծանր ռազմաքաղաքական իրավիճակի ֆոնին», - ասել է նա:

Ըստ նախարարի, հանդիպման մասնակիցները կտրականապես դեմ են արտահայտվել մարդասիրական օգնության քաղաքականացմանը, որը պետք է տրամադրվի բոլոր սիրիացիներին ամբողջ երկրում:

3 երկրները կարևորել են  փախստականների կամավոր և անվտանգ վերադարձի և ներքին պայմանների ապահովումը տեղահանված անձանց համար, ինչպես նաև պայմանավորվել են արագացնել վերականգնման միջոցառումների մշակումը, վստահությունը և բարենպաստ պայմանների ստեղծումը Սիրիայում խաղաղապահ ջանքերի իրականացման համար:

Քաթարի արտգործնախարարը կարծում է, որ Սիրիայի՝ Արաբական պետությունների լիգային անդամակցությունը դադարեցնելու պատճառները դեռ ուժի մեջ են:

«Ինչ վերաբերում է Սիրիայի Արաբական լիգա վերադառնալու խնդրին, Կատարի դիրքորոշումն այս հարցում չի փոխվել: Պատճառներ կային, թե ինչու էր Սիրիայի անդամակցությունը կազմակերպությանը կասեցվել: Եվ այդ պատճառները դեռ կան», - ALJazeera հեռուստաընկերության մեջբերմամբ, ասել է նախարարը՝ նշելով, որ Դոհան հույս է դնում «Սիրիայում քաղաքական առաջընթացի հասնելուն, քանի որ այն համարում է Արաբական լիգա վերադառնալու լավագույն միջոցը»:

Սիրիայի անդամակցությունը Արաբական լիգային դադարեցվել էր 2011-ի նոյեմբերին ՝ այս երկրում զինված հակամարտության ակտիվացման ֆոնին: