Կաթիլային համակարգին մեծ ուշադրություն է դարձվում, 3 հա ոռոգողներին ջուրն անվճար է տրամադրվելու. Ջրային կոմիտեի նախագահ

Աբովյանի նախկին քաղաքապետ Վահագն Գևորգյանը, որը քաղաքապետի պաշտոնը զբաղեցրեց 6 տարի, 2021 թվականի դեկտեմբերի 5-ի Աբովյանի ընտրություններում իր թեկնածությունը կրկին չառաջադրեց, սակայն նա նույն թվականի դեկտեմբերի 17-ին նշանակվեց Ջրային կոմիտեի նախագահ:

«Հայկական ժամանակ»-ը Գևորգյանի հետ զրուցել է կոմիտեի աշխատանքների, ՀՀ-ի ջրային ռեսուրսների խնդիրների, Կառավարության հետ համատեղ աշխատանքի և այլ հարցերի մասին:

- Պարոն Գևորգյան, Դուք արդեն 4 ամիս է, ինչ զբաղեցնում եք Ջրային կոմիտեի նախագահի պաշտոնը: Նախկինում զբաղեցնում էիք բոլորովին այլ պաշտոններ, այսինքն՝ սա նոր բնագավառ է Ձեզ համար:

- Ես երկար տարիներ աշխատել եմ պետական մարմիններում: Այս ոլորտն ունի իր առանձնահատկությունները: Այս ընթացքում հասցրել եմ աշխատել ու քննարկումներ ունենալ բոլոր այն ընկերությունների հետ, որոնք կապ ունեն Ջրային կոմիտեի հետ: Հայաստանի ստանձնած պարտավորությունների շրջանակում ջրային ոլորտը մեծ նշանակություն ունի: Որպես մարտահրավեր կարող եմ նշել այն մեծ պարտավորությունն ու պատասխանատվությունը, որը ես ունեմ իմ ստանձնած պաշտոնի նկատմամբ: Ամեն բան անելու եմ, որ իմ գիտելիքներն ու ներուժը առավելագույնս օգտագործեմ ոլորտի խնդիրների լուծման համար:

- Այս ընթացքում հասցրե՞լ եք ամբողջովին ծանոթանալ տարվող աշխատանքներին: Առաջիկայում ի՞նչ նոր ծրագրեր ունեք:

- Անխտիր բոլոր ծրագրերի հետ արդեն ծանոթացել եմ: Ծրագրեր կան, որոնք ավարտվում են, ունենք ծրագրեր էլ, որոնք ընթացիկ փուլում են: Մեր նպատակը ՀՀ-ի ջրային համակարգի արդյունավետ կառավարումն է: Վարչապետի որոշմամբ՝ ստեղծվել է աշխատանքային խումբ ջրամբարաշինության մասով, որում մենք էլ ենք ներգրավված: Արդեն ունենք 6 ջրամբարների նախագծման աշխատանքների ավարտ, մրցույթները շուտով կհայտարարվեն: Ունենք նաև օրվա կարգավորիչ ջրամբարների մրցույթների կազմակերպում, հիմա բանակցությունների փուլում ենք, առաջիկայում կունենանք 31 օրվա կարգավորիչ ջրամբարների կառուցում: Ծրագրերը շատ են, որոնք նաև իրականացվում են Տարածքային զարգացման հիմնադրամի հետ համատեղ: Համագործակցում ենք նաև միջազգային կառույցների հետ:

- Մի շարք ջրանցքների վերանորոգման և գործարկման աշխատանքների մասին կառույցը բազմիցս է խոսել: Այս մասով ի՞նչ աշխատանքներ են տարվում: Ի՞նչ նշանակություն ունի ջրամբարների գրագետ օգտագործումը ՀՀ-ի ջրային ռեսուրսների համար:

- Ջրի արդյունավետ կառավարման նպատակով ջրանցքներում մենք անցած տարի տեղադրել ենք շուրջ 715 ջրաչափ սարքավորումներ, այս տարի պլանավորում ենք տեղադրել 744-ը: Այսպիսով՝ մենք կարող ենք կառավարել ջրային ռեսուրսները: Կարևոր քայլ է նաև ջրանցքների մաքրումը: Այս տարի արդեն մաքրվել և հիմնանորոգվել է 356 կիլոմետր ջրանցք, որն իրականացրել է «Ջրառ» ընկերությունը: «ՋՕԸ»-ն արդեն ներցանցային մաքրման աշխատանքներ է սկսել 3627 կիլոմետր երկարությամբ: «Ջրառ»-ի մասով կազմում է աշխատանքների 80-90 տոկոսը, իսկ «ՋՕԸ»-ինը՝ մոտավորապես 50 տոկոսը, քանի որ նախալեռնային շրջաններում դեռևս ձյունը հալում է: Առաջիկայում ամենօրյա ռեժիմով աշխատանքներ են տարվելու:

- Այսօր բնակիչները շատ տարածքներ չեն մշակում, քանի որ ոռոգման խնդիր ունեն: Այս մասով ի՞նչ քայլեր է ձեռնարկում Ջրային կոմիտեն:

- Կառավարության ուշադրության կենտրոնում է ոչ միայն մեծ և միջին ջրամբարների կառուցումը, այլ նաև օրվա կարգավորիչ ջրամբարների: Ապագայում էլ ավելի մեծ ուշադրություն է դարձվելու կաթիլային ոռոգման համակարգին: Կա Կառավարության որոշում՝ 3 հա կաթիլային ոռոգում անցնող տնտեսավարողներին ջուրն անվճար մատակարարելու: Կառավարությունն ամեն կերպ ցանկանում է այս ոլորտը կարգավորել: Այս տարի կավարտվեն Վեդու ջրամբարի կառուցման աշխատանքները, արդեն մեկնարկել են Կապարինը:

Արարատյան դաշտում մասնավորապես ոռոգման ջրի մասով արդեն մեծ առաջընթաց ունենք: Մեզ համար թիրախայինը Արարատյան դաշտն է, Արմավիրը, Շիրակը, Մեղրին և այն: Հետևողական աշխատանք է տարվում: Ոռոգման համակարգերի արդիականացման շրջանակներում 37,2 կմ երկարությամբ ինքնահոս համակարգերն արդեն ամբողջովին կառուցված են: Ունենք 4 մայր ջրանցքների վթարային հատվածներ, որոնք, կարող ենք ասել, ամբողջովին վերականգնվել են: 22՝ 56 կմ երկարությամբ ջրանցքների վերականգնման աշխատանքները ևս ընթացքի մեջ են: 2021-ի տվյալներով՝ վերականգնվել է ընդհանուր 31 կմ երկարությամբ հատվածը: Շուրջ 105 համայնքներում էլ 258,7 կմ երկարությամբ տնտեսային ոռոգման համակարգերից 220,4 կմ-ն արդեն վերանորոգվել է:

- ՀՀ-ի մի շարք մարզերում կա նաև խմելու ջրի խնդիր: Այս մասով ի՞նչ աշխատանքներ եք տանում: 

- Կառավարությունն աշխատանքներ է տանում այն բնակավայրերի մասով, որոնք չեն մտնում «Վեոլիա Ջուր» ընկերության տիրույթում: Փորձ է արվում այնպես անել, որպեսզի չլինեն համայնքներ, որոնք կարող են ունենալ խմելու ջրի խնդիր:

- Պարոն Գևորգյան, բնականաբար, չենք կարող շրջանցել քաղաքականությունը: Դուք Աբովյանի քաղաքապետ եղած ժամանակ ընդդիմադիր դիրքերից էիք հանդես գալիս: Ջրային կոմիտեի նախագահի պաշտոնում Ձեր նշանակումն էլ բավականին անակնակալ էր շատերի համար: Այժմ Ձեր և Կառավարության միջև տարաձայնություններ լինո՞ւմ են:

- Ես երբևէ որևէ կուսակցության անդամ չեմ եղել: Համայնքապետ աշխատած տարիներին էլ Կառավարության հետ խնդիրներ չեմ ունեցել: ՏԻՄ-ը պետության մի մասն է, չես կարող չհամագործակցել: Խնդիրներ չեն եղել:

- Կոտայքի նախկին մարզպետ Ռոմանոս Պետրոսյանի և Ձեր լարված հարաբերությունների մասին մամուլը բազմիցս է գրել: Մարզպետարանն էլ Կառավարության մի մարմին է. ինչպե՞ս էիք համագործակցում միմյանց հետ:

- Ես կարծում եմ՝ համայնքապետ եղած տարիներին արել եմ հնարավորինս ամեն բան՝ ի բարօրություն Աբովյան համայնքի:

Անյուտա Աթանեսյան