Հանուն ինչի են փողը մսխում

Բայց հիասթափություն է սպասում բոլոր նրանց, ովքեր կարծում են, թե կայք այցելելով` լուրջ տեղեկատվություն են գտնելու մեր մեծերի կյանքի ու ստեղծագործության մասին: Պետական աջակցությամբ պատրաստված այդ կայքում ընդամենը ժլատ կենսագրական տվյալներ են, եւ բացարձակ ոչինչ նրանց ստեղծագործություններից: Եղած տեքստերն էլ բառացիորեն վերցված են այս կամ այն կայքից:

Այսպես, օրինակ, www.writers.am կայքում կարդում ենք. «Վահան Թեքեյանը ծնվել է 1878 թ հունվարի 21-ին Կ.Պոլսի Օրթագյուղ թաղամասում։ Սկզբնական կրթությունն ստացել է ծննդավայրում, եղել Ներսիսյան, Պերպերյան, Կեդրոնական վարժարանների սանը։ 1896թ, որպես առեւտրական պաշտոնյա, մեկնում է Եվրոպա, ապա հաստատվում է Եգիպտոսում: Այստեղից անընդհատ աշխատակցում է արեւմտահայ պարբերականներին, իսկ 1905 թ-ից ժամանակի հայ գրողներին համախմբում իր հիմնադրած  «Շիրակ»  պարբերականի շուրջը»: Այդ ամենը, սակայն, միեւնույն շարադրանքով կարելի է գտնել Վիքիպեդիայում: Այն է` « Ծնվել է 1878 թ հունվարի 21-ին Կ.Պոլսի Օրթագյուղ թաղամասում։ Սկզբնական կրթությունն ստացել է ծննդավայրում, եղել Ներսիսյան, Պերպերյան, Կեդրոնական վարժարանների սանը։ 1896թ, որպես առեւտրական պաշտոնյա, մեկնում է Եվրոպա, ապա հաստատվում է Եգիպտոսում: Այստեղից անընդհատ աշխատակցում է արեւմտահայ պարբերականներին, իսկ 1905 թվականից ժամանակի հայ գրողներին համախմբում իր հիմնադրած «Շիրակ» պարբերականի շուրջը»: Կամ` «Նրա իսկական անունը Գուրգեն Աճեմյան էր: Ծնվել էր Վան քաղաքում 1903թ. եւ մինչեւ Առաջին համաշխարհային պատերազմն ու հայոց Ցեղասպանությունը ապրել էր շատ թե քիչ անհոգ մանկություն: Բայց պատերազմը փոխեց, ինչպես ամբողջ արեւմտահայության, այնպես էլ վանեցիների ճակատագիրը»,- կարդում ենք Findarmenia.com կայքում: «Նրա իսկական անունը Գուրգեն Աճեմյան էր: Նա մինչեւ Առաջին համաշխարհային պատերազմն ու հայոց Ցեղասպանությունը ապրել էր շատ թե քիչ անհոգ մանկություն: Բայց պատերազմը փոխեց, ինչպես ամբողջ արեւմտահայության, այնպես էլ վանեցիների ճակատագիրը»,- սա էլ writers.am-ի տարբերակով:

Ահա այսպիսի լուրջ աշխատանքն է տարվել writers.am-ը կյանքի կոչելու համար: Նշենք, որ այս նախաձեռնությունը «Ֆլեշմոբ Դիվիզիա» երիտասարդական հասարակական կազմակերպությանն է: Երբ դրա տնօրեն Էդուարդ Լեւանյանից հետաքրքրվեցինք, թե ինչում է կայացել մշակույթի նախարարության աջակցությունը, նա պատասխանեց, որ այդ գերատեսչությունն իրենց կազմակերպությանը գումար էր տրամադրել` «Երեւանը գրքի համաշխարհային մայրաքաղաք-2012»-ի շրջանակներում Բացօթյա ընթերցանության փառատոն կազմակերպելու համար: Գումարի մի փոքր մասն ավելացել էր, եւ կազմակերպության անդամներն առաջարկել են դա օգտագործել հայ գրողների մասին կայք ստեղծելու նպատակով: Նախարարությունը համաձայնել է: Թե որքան գումար են իրենք ստացել, եւ որքանն է դրանից ավելացել, Էդուարդ Լեւանյանը չմանրամասնեց` նշելով, որ ինքն այդ տվյալներին չի տիրապետում: Խոստացավ ասել մի քանի օրից: Նա պատմեց, որ իրենց կայքի թիվ մեկ նպատակն է` արտասահմանցիներին ցույց տալ, թե ինչու էր Երեւանը գրքի համաշխարհային մայրաքաղաք: Իսկ արդյոք կենսագրական մի քանի տվյալներով հնարավո՞ր է ճանաչել գրողին: Լեւանյանը համամիտ է, որ հնարավոր չէ, դրա համար էլ, ըստ նրա, կայքը համալրվելու է: «Մեր կայքը այսքանով չի սահմանափակվելու, ինֆորմացիան պարբերաբար համալրվում է: Տեղեկություններ կլինեն ժամանակից գրողների մասին եւ հղումներ դեպի այն մարդկանց ստեղծագործությունները, ովքեր արդեն կան կայքում: Մտածում ենք` այդ ստեղծագործությունները կայքում տեղադրե՞նք, թե՞ հղում տանք դեպի այլ կայքեր: Կարծում ենք` հղում կտանք, որպեսզի հեղինակային իրավունքի եւ այլ խնդիրների առջեւ չկանգնենք»,- նկատեց ՀԿ տնօրենը: Հարցրինք` դեռեւս նման խնդիրներ չե՞ն ծագել` հաշվի առնելով, որ writers.am կայքում առկա նյութը ամբողջովին այսուայնտեղից է վերցված: «Չէ, նման խնդիրներ դեռ չեն ծագել, բայց եթե ծագեն, ապա մենք մեծ հաճույքով այդ հեղինակների անունները կարող ենք նշել, քանի որ այդ կենսագրությունները հավաքվել են 10-15 կամավորների կողմից»,- ասաց նա:

ՀՀ մշակույթի նախարարությունից եւս փորձեցինք պարզել` որքա՞ն գումար է տրամադրվել  «Ֆլեշմոբ Դիվիզիա» հասարակական կազմակերպությանը: Ամբողջ երկու օր այստեղից ոչ մի պատասխան չստացանք: Եւ այսպիսով, ստացվում է, որ մեր աղքատ երկրի բյուջեում հնարավոր է գումարներ գտնել հազարումի դատարկությունների համար, իսկ դրա դրդապատճառների մասին կարելի է միայն ենթադրել: