Սերժ Սարգսյանն այսօր պետք է դատավորի կալանքի հարցով որոշում կայացնի

Սա նմանատիպ առաջին դեպքն է վերջին 15 տարում

Երեկ ՀՀ գլխավոր դատախազ Գեւորգ Կոստանյանը Լոռու մարզի ընդհանուր իրավասության դատարանի դատավոր Խաչատուր Խաչատրյանին որպես մեղադրյալ ներգրավելու մասին միջնորդություն է ներկայացրել Արդարադատության խորհուրդ: Այս մասին մեր զրույցում ասացին ՀՀ գլխավոր դատախազության հանրային կապերի բաժնից:

Երեկ հրավիրված է եղել Արդարադատության խորհրդի նիստ, որտեղ գլխավոր դատախազը օրենքով սահմանված կարգով ԱԽ-ին է ներկայացրել դատավոր Խաչատրյանին ձերբակալելու հիմքերը: Այս տեղեկատվությունը գլխավոր դատախազը ԱԽ-ին է ներկայացրել է ՀՀ դատական օրենսգրքի 168-րդ հոդվածով նախատեսված կարգով: Արդարադատության խորհուրդը պետք է քննարկի միջնորդությունը եւ դատավորին մեղադրանք առաջադրելու եւ կալանավորելու առաջարկը ներկայացնի Սերժ Սարգսյանին: Վերջինս երկօրյա ժամկետում պետք է որոշում կայացնի: Երկօրյա ժամկետում համաձայնություն չտալու դեպքում՝ դատավորին որպես մեղադրյալ ներգրավվելու մասին Արդարադատության խորհրդի առաջարկը համարվում է մերժված եւ դատավորն ազատ է արձակվում: Նշենք, որ Խաչատրյանի ձերբակալման 72 ժամը լրանում է կիրակի լույս երկուշաբթի գիշերը: Սա նշանակում է՝ արդեն վաղը Սերժ Սարգսյանը պետք է որոշում կայացնի, որովհետեւ կիրակին ոչ աշխատանքային օր է:

Խաչատուր Խաչատրյանը ձերբակալվել է դեկտեմբերի 25-ի լույս 26-ի գիշերը Ազգային անվտանգության ծառայության ձեռնարկած օպերատիվ հետախուզական միջոցառումների արդյունքում՝ կաշառք ստանալու պահին: Այս մասին հաղորդագրություն տարածեց ՀՀ ԱԱԾ մամուլի կենտրոնը՝ մասնավորապես նշելով.  «Խ. Խաչատրյանը իր վարույթում քննվող գործարարի վերաբերյալ  քաղաքացիական գործով, նրա  օգտին գործողություններ կատարելու համար, պահանջել եւ ստացել է 20.000 ԱՄՆ դոլար»: ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 311 հոդվածի 4-րդ մասի 2-րդ եւ 3-րդ կետի հատկանիշներով (Պաշտոնատար անձի կողմից կաշառք ստանալը, որը կատարվել է դատավորի կողմից՝ պատժվում է ազատազրկմամբ՝ յոթից տասներկու տարի ժամկետով):

Նշենք, որ ՀՀ դատական օրենսգրքի 13-րդ հոդվածի 2-րդ կետով դատավորը չի կարող ձերբակալվել, բացառությամբ այն դեպքերի, երբ ձերբակալումն իրականացվում է հանցագործության կատարման պահին կամ անմիջապես դրանից հետո: Նույն կետով, դատավորի ձերբակալման մասին անմիջապես տեղեկացվում են Հանրապետության Նախագահը եւ Վճռաբեկ դատարանի նախագահը:

Ինչպես նշել էինք մեր թերթի երեկվա համարում, ԱԱԾ-ի գործողությունները կապված են տնտեսական մի գործի հետ, որտեղ շոշափվում է պատուհանների արտադրությամբ զբաղվող «Զոսեկար» ՍՊԸ-ի անունը, որը նույն դատարանի վճռով 02.10.2014 թվականին սնանկ է ճանաչվել: Ըստ որոշ չճշտված տեղեկությունների, ԱԱԾ-ի հաղորդագրությունում նշված գործարարը «Զոսեկար» ՍՊԸ-ի տնօրեն Սեյրան Կարապետյանն է, ով էլ հաղորդում է ներկայացրել ԱԱԾ: Դատավոր Խաչատուր Խաչատրյանի շահերի պաշտպան Կարեն Թումանյանը երեկ մեր զրույցում ասաց, որ իր պաշտպանյալը կաշառք չի ստացել, դա իրականությանը չի համապատասխանում. «Ես չեմ կարող այս պահին ասել, թե ինչ է եղել, որովհետեւ մեղադրանք դեռեւս չի առաջադրվել: Ես եւ մյուս փաստաբանը հանդիպել ենք Խաչատուր Խաչատրյանի հետ, քննարկել ենք բոլոր հանգամանքները, բայց դա դեռեւս հրապարակման ենթակա չէ»,- ասաց փաստաբանը: Անդրադառնալով ԱԱԾ-ի տարածած հաղորդագրությանը՝ Թումանյանն ասաց. «Հաղորդագրության մեջ նշված է, որ իմ պաշտպանյալը հօգուտ գործարարի գործողություն կատարելու համար գումար է պահանջել: Անմեղության կանխավարկածի մասով պետք է պետական մարմինը զերծ մնա տեղեկությունները հաստատելուց,  ընդամենը նա պետք է փաստական տեղեկություններ փաստի այնքանով, որքանով հանրությանը կարող է դա հետաքրքրել: Իհարկե, պետք է ամեն ինչ պարզվի օբյեկտիվ քննությամբ, մեղադրանք առաջադրվի հասկանալու համար, թե այդ ի՞նչ գործողություններ պետք է աներ դատավորը, որն արդեն իսկ դատական ակտ էր կայացրել: Միայն գումարի մասին նշելը, հրապարակելը դեռեւս կաշառք չի կարող համարվել: Եթե խորը նայենք, պետք է պաշտոնական հաղորդագրությունը լիներ չոր տեղեկություններ եւ ոչ թե գնահատականներ: Իրավական գնահատականները տալիս է դատարանը»,- մեր զրույցում ասաց փաստաբանը: Մեր հարցին, թե ի՞նչ քննչական գործողություններ է կատարվել դատավորի մասնակցությամբ, Թումանյանն ասաց, որ դեռեւս նա դիրքորոշում չի հայտնել, ցուցմունք չի տվել. «Այս պահին որեւէ քննչական գործողություն չի կատարվել»,- եզրափակեց դատավորի փաստաբանը: Հավելենք, որ վերջին 15 տարում սա առաջին դեպքն է, երբ գործող դատավոր է ձերբակալվում: 44-ամյա դատավոր Խաչատուր Խաչատրյանը ծնվել է Լենինական քաղաքում, 2009 թվականի փետրվարի 7-ից նշանակվել է Լոռու մարզի ընդհանուր իրավասության դատարանի դատավոր: Մինչ այդ՝ 2008 թվականից մինչեւ 2009 թվականը, աշխատել է որպես Հյուսիսային քաղաքացիական դատարանի՝ սնանկության գործեր վարող դատավոր: