Հորս աթոռը չի, որ պապենական նստեմ. Նոր կյանքի գյուղապետը՝ ընտրապայքարի մասին

Արարատի մարզի Նոր կյանք գյուղի 18 տարվա ղեկավար Մայիս Աբրահամյանը պատրաստ է սեղմել համայնքի ղեկավարի ընտրություններում առաջադրված Գարիկ Սարգսյանի ձեռքը, եթե առաջիկա ընտրություններում նա ընտրվի համայնքի ղեկավար: Այս մասին Մայիս Աբրահամյանն ասաց Armtimes.com-ի հետ զրույցում: Նշենք, որ սեպտեմբերի 18-ին նշանակված համայնքի ղեկավարի ընտրությունում կպայքարեն «Քաղաքացիական պայմանագիր» կուսակցության անդամ Գարիկ Սարգսյանն ու ՀՀԿ-ական, 1999 թվականից Նոր կյանքի գյուղապետ Մայիս Աբրահամյանը:

- Պարոն Աբրահամյան, ինչպես հասկանում ենք մինչ այս ընտրությունն առանց մրցակցության եք ընտրվել:

- Մարդիկ գնահատել են աշխատանքս եւ չեն ցանկացել մրցակցել, ինչի մասին է խոսքը:

- Այսինք՝ այնպես եք աշխատել, որ չե՞ն ցանկացել թեկնածու առաջադրվել:

- Այդպես ավելի ճիշտ կլինի ասել:

-Իսկ ինչպե՞ս ստացվեց, որ մի երիտասարդ ցանկացավ առաջադրվել:

- Դե, հիմա երիտասարդ է, մտածում է, որ մենք արդեն մեծացել ենք եւ իր թեկնածությունն է դրել: Կընտրվի՝ իրեն հաջողություն, չի՞ ընտրվի՝ մեզ հաջողություն, դա գյուղը կորոշի:

- Ձեր մրցակից Գարիկ Սարգսյանը armtimes.com-ին տված հարցազրույցում ասել է, որ ձեր ղեկավարման տարիներին բազմաթիվ խնդիր չեն լուծվել:

- Դպրոցը 100 տոկոսով վերանորոգված է, ամբողջությամբ նոր գույք ունի: Նույնը մշակույթի տունը, նույնը մանկապարտեզը, ամբողջությամբ վերանորոգված, գույքը նոր, երկու խումբ երեխաներին պահում ենք: Գյուղի աղբը ես հեռացնում եմ, ոչ մեկից ոչինչ չեմ պահանջում, գումարը համայնքի բյուջեից եմ տալիս, ասֆալտը արած է, ջրագիծը կա: Կարող է մի փողոց էլ ծակվել է, մի տեղ մի կաթիլ ջուր է թողում, հիմա ի՞նչ անենք:

- Գարիկ Սարգսյանը թվել է հետեւյալ խնդիրները՝ փողոցների լուսավորությունը, ճանապարհների անբարեկարգ վիճակը, խմելու եւ ոռոգման ջրի ցանցը եւ նույնիսկ մարդկանց նկատմամբ վերաբերմունքը, որ օրինակ՝ հողի հարկը վճարած չեն լինում տեղեկանք չեք տալիս:

- Ենթադրենք ինքն է դառնում գյուղապետ եւ հողի հարկերը չեն մուծում, ո՞նց է աշխատելու: Եթե հարկ չվճարեն, մենք էլ աշխատավարձ չստանանք եւ մեր հարկը չվճարենք, այս երկիրը, բանակը ո՞նց պահենք: Եթե ինչ-որ մեկը կարող է հարկերն ամբողջությամբ վճարել, մյուսը «լավ տղա» է, որ չի վճարում, բա պետք է չտամ տեղեկանք, որ ինչ-որ չափով գոնե վճարի: Ես ոչ մի անգամ ինչ-որ մեկի հացի փողը չեմ ասել բերեք վճարեք, նման բան չի եղել, բայց եթե մարդը 100 հազար դրամ պարտք է, բա չասե՞մ բեր մի մաս վճարի, որ աղբահանությունը կազմակերպենք, մանկապարտեզը պահենք, իր ասած լուսավորությունն անենք: Ցերեկային լուսավորություն կենտրոնական փողոցում կա, ամենաերկար մյուս փողոցում կա: Դա կոճակ չի՞, որ սեղմեմ ամբողջ գյուղը լուսավորվի կամ ասֆալտապատվեն բոլոր փողոցները: Մեր գյուղում երեք փողոց ասֆալտապատված է, կենտրոնականը չհաշված:

- Ինքը նշում է, որ 18 տարվա բյուջեով հնարավոր էր վերը թվարկած խնդիրները լուծել: Դուք դա հնարավոր համարու՞մ եք:

- Ես չգիտեմ իր հաշվապահն ով է, այդ թվերն իրեն ով է տվել, բայց եթե 20 միլիոն է ընդամենը բյուջեն եւ 12 միլիոն միայն մանկապարտեզն է, իսկ գյուղապետարանը մոտ 10 մլն., այդ ո՞նց է հնարավոր լուծել:

 - Գարիկ Սարգսյանը հայտարարել է, որ փորձել են իրեն համոզել, որպեսզի չառաջադրվի՝ առաջարկելով նույնիսկ աշխատանք: Դուք նման մտադրություն ունեցե՞լ եք:

- Ես աշխատանք առաջարկե՞մ: Ես նրան կյանքում աշխատանք չեմ առաջարկի, քանի որ ինքն աշխատանքային փորձ չունի: Եթե իրեն ինչ-որ մեկն ասել է՝ ինչի ես դնում թեկնածությունդ, իմ հետ ի՞նչ կապ ունի, այդ մեկին հարցրեք: Ես, համենայնդեպս, ոչ մեկին ո՛չ ասել եմ, ո՛չ էլ կասեմ: Մարդն ուզում է՞ դառնալ գյուղապետ՝ ոչ մի խնդիր, ես ո՞վ եմ, որ իրեն ասեմ՝ չէ: Դա կորոշի գյուղը, եթե ինքը կլինի գյուղապետ, կփորձեմ առաջինը ես իրեն  շնորհավորել ու ասել՝ հաջողություն հանուն մեր գյուղի:

- Ընտրվելու ձեր հնարավորություններն ինչպե՞ս եք գնահատում, եթե վաղը լինի ընտրությունը:

- Քարոզարշավը դեռ չի սկսվել, ես դուրս չեմ եկել ժողովրդի մեջ: Եթե ինքը գնահատում է ինչ-որ չափով ես էլ կարող եմ ասել, որ ենթադրենք 50/50, բայց վաղը կարող է քարոզարշավը սկսվի եւ դառնա 60/40 կամ օգուտ ինձ կամ իրեն:

-Եթե պարտվեք կսեղմե՞ք ձեր մրցակցի ձեռքը:

-Առաջինը ես կսեղմեմ, որովհետեւ ինձ թվում է, որ հանձնաժողովին ամենամոտը մենք կանգնած կլինենք: Առաջինը ես կշնորհավորեմ՝ կասեմ քեզ հաջողություն: Եթե գյուղացիները գտնեն, որ ինքն ավելի շատ բան կարող է անել այս գյուղի համար, ես ավելի հպարտ, ավելի ուրախ կլինեմ, իմացեք, որ իմ տրամադրությունը լրիվ տեղը կլինի, որ շնորհավորեմ: Էդ հորս աթոռը չի, որ ես պապենական նստեմ:

-Երրորդ թեկնածուն էլ ձեր եղբոր տղա՞ն է լինելու:

-Չէ, նա չի գրանցվել:

Նշենք, որ երեկ՝ օգոստոսի 24-ին, թեկնածություն առաջադրելու վերջին օրն էր: