Քլինթոնը մի փոքր ավելի շատ ձայն է ստացել, քան Թրամփը, բայց ԱՄՆ օրենսդրությունն այլ է

Նոյեմբերի 8-ին ԱՄՆ-ում կայացած նախագահական ընտրություններում հաղթել է հանրապետական թեկնածու Դոնալդ Թրամփը: Վերջինիս հաղթանակը շատերի համար անսպասելի է եղել, քանի որ անցկացված հարցումների մեծ մասի արդյունքները կանխորոշում էին դեմոկրատ Հիլարի Քլինթոնի հաղթանակը: Չնայած, որ Քլինթոնը մի փոքր ավելի շատ ձայն է (59 միլիոն 59 հազար 121 քվե) ստացել, քան Դոնալդ Թրամփը (58 միլիոն 935 հազար 325 քվե ), բայցեւայնպես ամերիկյան ընտրական օրենսդրության առանձնահատկությունների պայմաններում վերջինս ստացել է 279 ընտրիչի աջակցություն: Այնինչ, նախագահ ընտրվելու համար բավական է Ընտրիչների կոլեգիայի 538 անդամներից 270-ի աջակցությունը:

Դեմոկրատական կուսակցությունը ներկայացնող Հիլարի Քլինթոնն արդեն ընդունել է իր պարտությունը եւ հեռախոսով շնորհավորել է իր հանրապետական մրցակցին: Ավելի ուշ Դոնալդ Թրամփին հաղթանակի կապակցությամբ շնորհավորել է նաեւ ԱՄՆ-ի գործող նախագահը Բարաք Օբաման: Որոշ տեղեկությունների համաձայն՝ նրանք պայմանավորվել են նոյեմբերի 10-ին հանդիպել Սպիտակ տանը:

Ճիշտ է, վերջին ամիսներին Միացյալ Նահանգներն ու ամբողջ աշխարհը լարվածության մեջ պահած ընտրություններն անցյալում են, Թրամփի մրցակից Հիլարի Քլինթոնն ընդունել է իր պարտությունը, իսկ աշխարհի բոլոր ծագերից նորընտիր նախագահը շնորհավորանքներ է ստանում, սակայն նախագահի ընտրության ընթացակարգը պաշտոնապես դեռ չի ավարտվել:

Բանն այն է, որ ԱՄՆ-ի նախագահի ընտրությունը տեղի է ունենում մի քանի փուլով: ԱՄՆ-ի նախագահին վերջնականորեն ընտրում է Ընտրիչների կոլեգիան, որը բաղկացած է 538 հոգուց: Յուրաքանչյուր նահանգից Ընտրիչների կոլեգիայի անդամների թիվը հավասար է ԱՄՆ-ի Կոնգրեսում դրանց ներկայացուցիչների թվին:

Ինչպես վերը նշվեց, նախագահ ընտրվելու համար անհրաժեշտ է, որ թեկնածուներից որեւէ մեկը ստանա առնվազն 270 ընտրիչի աջակցություն: Բուն ընտրությունների օրը յուրաքանչյուր նահանգում ձայների պարզ մեծամասնությունը ստացած թեկնածուն տվյալ նահանգից կոնկրետ թվով ընտրիչներ է ներկայացնելու Ընտրիչների կոլեգիայի նիստին,որը նշանակված է դեկտեմբերի 19-ին: Ուշագրավ է, որ ընտրիչներն օրենքով պարտավորված չեն քվեարկել այն թեկնածուի օգտին, ում ներկայացնում են եւ նույնիսկ իրավունք ունեն քվերակել մրցակցի օգտին: ԱՄՆ պատմության մեջ երեք անգամ Ընտրիչների կոլեգիան նախագահ է ընտրել այն թեկնածուին, որն ընտրողների նվազագույն ձայներն էր ստացել: 1876 թվականին նախագահ է դարձել Ռութերֆորդ Հեյսը, 1888-ին՝ Բենջամին Հարիսոնը, 2000 թվականին՝ Ջորջ Բուշը: Երեքն էլ Հանրապետական կուսակցության թեկնածուներն էին:

Ընտրիչների կոլեգայի նիստում ընտրված թեկնածուին 2017 թվականի հունվարի 6-ին դեռ պետք է հաստատի ԱՄՆ-ի Կոնգրեսը: Եվ միայն դրանից հետո՝ հունվարի 20-ին, տեղի է ունենալու նորընտիր նախագահի երդմնակալության արարողությունը: Հենց այդ օրը ավարտվելու է գործող նախագահ Բարաք Օբամայի լիազորությունների ժամկետը: Այդ օրվանից էլ Դոնալդ Թրամփը պաշտոնապես կստանձնի նախագահի պաշտոնը: 70-ամյա Թրամփը կդառնա ԱՄՆ-ի պատմության ընթացքում նախագահ ընտրված ամենատարեց քաղաքական գործիչը: Ի դեպ, այսօր ունեցած ելույթում Թրամփը ակնարկել է, որ երկրոդ անգամ եւս կարող է առաջադրել իր թեկնածությունը նախագահի պաշտոնում:

Սպասվում է, որ նոր նախագահի օրոք ԱՄՆ-ի ներքին ու արտաքին քաղաքականությունը նշանակալի փոփոխություններ են կկրեն: Նման կանխատեսումների հիմք են տալիս Թրամփի հայտարարությունները:

Հատկապես ուշագրավ է օրերս Հյուսիսային Կարոլինայում Թրամփի արած այն հայտարարությունը, ըստ որի՝ իր ընտրվելու դեպքում ԱՄՆ-ն այլեւս չի միջամտի այլ երկրների ներքին գործերին եւ չի տապալի այլ երկրների իշխանություններին: Նա նաեւ ընդգծել էր, թե ԱՄՆ-ն չի փորձի ժողովրդավարություն կառուցել այլ երկրներում եւ անհիմն կերպով չի ներխուժի այլ երկրների տարածքներ: Նրա խոսքով, իր նախագահության ժամանակ ԱՄՆ-ն կենտրոնանալու է սեփական անվտանգության պահպանման եւ «Իսլամական պետություն» ահաբեկչական խմբավորման ոչնչացման վրա: Թրամփը նաեւ բազմիցս հայտարարել է, որ լավ հարաբերություններ է հաստատելու Ռուսաստանի ու Չինաստանի հետ:

Պատահական չէ, որ ԱՄՆ-ի աշխարհաքաղաքական մրցակից Ռուսաստանում մեծ ոգեւորությամբ են ընդունել Թրամփի հաղթանակը: Նրան առաջինը հեռագրով շնորհավորել է Ռուսաստանի նախագահ Վլադիմիր Պուտինը: ԱՄՆ-ի նորընտիր նախագահին հղած ուղերձում Պուտինը հույս է հայտնել, որ ռուս-ամերիկյան հարաբերությունները դուրս կգան ճգնաժամային իրավիճակից: Ընդհանրապես, Մոսկվայում գտնում են, թե Դոնալդ Թրամփի ընտրությունը նոր էջ է բացելու ռուս-ամերիկյան հարաբերություններում:

Միջազգային ֆինանսական շուկաներում արդեն տեղեկություններ են հայտնվել այն մասին, որ 2017 թվականի հունվարին Դոնալդ Թրամփը Ռուսաստանի նկատմամբ սահմանված տնտեսական պատժամիջոցների չեղարկման նախաձեռնությամբ է հանդես գալու: Հունվարին լրանում է տնտեսական պատժամիջոցների ժամկետը եւ մեծ է հավանականությունը, որ ամերիկյան վարչակազմի փոփոխության պայմաններում դրանց ժամկետը թե ԱՄՆ-ն եւ թե Եվրամիությունը պարզապես չեն երկարաձգվի: Ամեն դեպքում, միջազգային ներդրողները արդեն պատրաստվում են ռուսական ռուբլի գնել, քանի որ պատժամիջոցների վերանայման դեպքում ռուսական արժույթը էականորեն կամրապնդվի:

Հատկանշական է, որ Դոնալդ Թրամփի ընտրվելու մասին հայտնի դառնալուց հետո մի շարք դիվանագետներ ու քաղաքական գործիչներ սոցիալական ցանցերից ջնջել են նախկինում նրա հասցեին արած քննադատական գրառումները: Իսկ որոշ բարձրաստիճան պաշտոնյաներ, ինչպիսիք են օրինակ, Մեծ Բրիտանիայի արտգործնախարար Բորիս Ջոնսոնը եւ այլոք, ովքեր նախկինում վատ են արտահայտվել Թրամփի հասցեին, շտապել են շնորհավորել նրան: