Լեռնանիստը «շոկից» դուրս չի գալիս. դպրոցում դաս չկա, մասնագետները գետնի տակ գազ են փնտրում

Կոտայքի մարզի Լեռնանիստ գյուղում արդեն երկու օր է դասապրոցեսը դադարեցված է: Պատճառը գյուղում վերջերս փլուզված խանութի տակ հայտնաբերված գազի արտահոսքն է: Գյուղապետ Արտյոմ Հայրապետյանը վստահեցնում է՝ մինչեւ երկուշաբթի հնարավոր կլինի գտնել գազի արտահոսքի աղբյուրը եւ վերացնելով այն դասերը վերսկսել: Ներկայացնենք նրա հետ մեր զրույցը.

- Պարոն Հայրապետյան, այս պահին ի՞նչ իրավիճակ է գյուղում:

- Իրավիճակը այսպիսինն է Լեռնանիստ համայնքում: Հայտնաբերվել է գազի արտահոսք փլուզված կամ պայթած խանութի միջից եւ համապատասխան ուսումնասիրություններ են անում այդ գազի արտահոսքի աղբյուրը գտնելու համար: Հաշվի առնելով, որ վտանգավորություն կա, դասերը մենք արգելել ենք եւ երկրորդ օրն է դպրոցում որեւէ մարդ չկա:

- Խնդիրը միայն դպրոցո՞ւմ է, բացառվո՞ւմ է, որ տների տակ կամ այլ տարածքներում եւս լինի գազի արտահոսք:

- Կարող է տների տակ էլ լինել, բայց ամբողջ գյուղում գազաֆիկացումը անջատված է, այսինքն՝ վտանգը կորել է: Հաշվի առնելով, որ տները կարող են ուրիշ ձեւով ջեռուցվել՝ բնակիչներին իրենց տներից չենք տարհանել: Դպրոցը ուրիշ ձեւով չէինք կարող ջեռուցել, դրա համար դասերը հետաձգել ենք, կլրացնենք այլ օրերի: Իմ կարծիքով շուտով պարզ կլինի՝ արտահոսքի աղբյուրը, կկանխվի եւ երկուշաբթի օրվանից դասերը կվերսկսվեն:

- Քանի՞ աշակերտ կա դպրոցում:

- Շուրջ 370:

- Դա գյուղի միա՞կ դպրոցն է:

- Միակ եւ անկրկնելի:

- Եթե մինչեւ երկուշաբթի չպարզվի գազի արտահոսքի աղբյուրը՝ դասերը չե՞ն սկսվի:

- Ես անձամբ դեմ եմ լինելու դրան:

- Հնարավոր չէ՞ այլ տարբերակով ջեռուցում ապահովել:

- Դե չենք ուզում մեկ-երկու օրվա համար այլ տարբերակներ գտնել:

- Այս պահին ձեզ համար պա՞րզ է, թե գազի խողովակները ինչու են գետնի տակով անցնում:

- Փաստն այն է, որ գազի խողովակը գետնի տակով անցնում է: Համապատասխան կառույցներն ուսումնասիրում են եւ փորձում են գտնել արտահոսքի պատճառը:

- Նկատի ունեմ նորմա՞լ է, որ գազի խողովակները գետնի տակով են անցնում, սովորաբար դրանք վերգետնյա են լինում:

- Գետնի տակով մոտ 200 մետրի չափ խողովակներ կան այդ տարածքում:

- Դրանք օրենքով թույլատրվա՞ծ են, թե՞ ապօրինի:

- Նայած թե ապօրինի ասելով ինչ եք հասկանում. դա ոչ թե անհատ մարդիկ են տեղադրել...Միջին եւ ցածր ճնշման խողովակներ են, որոնք գազի հիմնարկինն են, իրենց թույլտվությամբ երեւի, ասում են մենք թույլատրելի տարել ենք:

- Պարոն Հայրապետյան, մինչ այդ խանութի պայթյունը որեւէ այլ ժամանակ գազի հոտ չի՞ զգացվել թե խանութի տարածքում, թե այլ վայրում:

- ճիշտն ասած, այս պահը հստակ չեմ կարող պատասխանել, որովհետեւ պահի տակ մարդ կա կարող է ասել գազի հոտ է գալիս, բայց հոտ չգա: Հստակ որեւէ բան չենք կարող ասել:

Նշենք, որ «Գազպրոմ Արմենիա» ընկերության Կոտայքի ԳԳՄ մասնաճյուղից ուսումասիրությունների վերաբերյալ տեղեկություն ստանալ չհաջողվեց: Հերթապահն ասաց, որ ինքն իրավասու չէ խոսել, իսկ թե ով է իրավասու՝ չգիտեր:

Հիշեցնենք, որ 2017 թվականի փետրվարի 14-ին՝ ժամը 10:00-ի սահմաններում,  փլուզվել  էին Կոտայքի մարզի Լեռնանիստ գյուղի միջնակարգ դպրոցի հարեւանությամբ գտնվող առեւտրի սրահի պատերն ու տանիքը, ինչի հետեւանքով գյուղի բնակչուհիներ Ալմիդա Մեսրոպյանն ու Անուշ Սարգսյանը մնացել էին փլատակների տակ եւ ստացած վնասվածքներից տեղում մահացել: Դեպքի առթիվ Կոտայքի մարզային քննչական վարչությունում հարուցվել էր քրեական գործ՝ ՀՀ քրեական օրենսգրքի 230-րդ հոդվածի 2-րդ մասով:

Քրեական գործի նախաքննության շրջանակներում Լեռնանիստ գյուղում փլուզված շինության հարակից տարածքում մարտի 1-ին «Գազպրոմ» ՀԲԸ  «Կոտայք» ԳԳՄ-ի մասնաճյուղի աշխատակիցների մասնակցությամբ եւ համապատասխան սարքավորման կիրառմամբ կատարվել էր տեղանքի զննում՝ ստորգետնյա գազատար խողովակից հնարավոր գազի արտահոսքի ստուգման նպատակով: Արդյունքում պարզվել էր, որ փլուզված շինության հետնամասի հատվածում առկա է գազի մեծ արտահոսք:

Հաշվի առնելով, որ նշված տարածքում գտնվում են բնակելի տներ, ինչպես նաեւ գյուղի միջնակարգ դպրոցը, ՀՀ ՔԿ Կոտայքի մարզային քննչական վարչության պետ Մ. Վարդանյանի հանձնարարությամբ` գյուղի դպրոցի աշակերտները ու ուսուցչակազմը տարհանվել էին։ Հնարավոր վտանգավոր հետեւանքներից խուսափելու համար գրություն էր ուղարկվել «Կոտայք» ԳԳՄ-ի ղեկավարին՝ տվյալ տարածքի գազամատակարարումն անմիջապես դադարեցնելու համար, ինչպես նաեւ լրացուցիչ մասնագետներ տրամադրելու՝ նշված տեղանքում ստորգետնյա գազատար խողովակները հողից մաքրելու, գազի արտահոսքի աղբյուրը պարզելու եւ տեղում վերացնելու նպատակով: