Հակոբ Սերոբյանը՝ մարմնամարզության ԵԱ-ի մասին. նա ասում է՝ ով է գնալու աշխարհի առաջնություն

Հայաստանի մարմնամարզության հավաքականի գլխավոր մարզիչ Հակոբ Սերոբյանը գոհ է Եվրոպայի 2017 թ. առաջնությունում իր սաների ելույթներից: Ռումինիայի Կլուժ քաղաքում տեղի ունեցած մրցաշարից ՀՀ հավաքականը վերադարձավ միայն Հարություն Մերդինյանի բրոնզե մեդալով, սակայն ընդհանուր առմամբ, ըստ Սերոբյանի, նրանք հնարավորինս լավ են հանդես եկել: Armtimes.com-ի հետ զրույցում մասնագետն ամփոփեց ապրիլի 19-23-ը կայացած մրցաշարը:

«Ելույթներից, եզրափակչի մասնակիցների քանակից գոհ եմ: Անցած տարի շատ մեդալներ եղան (խմբ. 1 ոսկի, 3 արծաթ), բայց եզրափակչի այսքան մասնակից չունեինք. Արթուր Թովմասյանը չէր մտել եզրափակիչ, իսկ այստեղ գումարած դրան նաեւ բազմամարտում եզրափակիչ դուրս եկանք»,- ասաց նա:

Եվրոպայի 2016 թ. չեմպիոն, աշխարհի բրոնզե մեդալակիր Հարություն Մերդինյանը (նժույգթափեր) բրոնզե մեդալ նվաճեց եզրափակչում վաստակելով 14.833 միավոր: Նախադաստակի վնասվածքը, որի պատճառով Դոհայի աշխարհի գավաթի խաղարկությունում նա չէր հաղթահարել որակավորման փուլը, չխանգարեց:

«Որակավորման փուլում վարժությունը կատարեց լավ, իսկ եզրափակչում՝ ավելի լավ, նաեւ նկատի ունենանք, որ սրան հասավ իր վնասվածքից հետո: Անցած տարվա վարժությունն ավելի վատ էր կատարել, քան այս տարի, բայց սա մարմնամարզություն է: Մենք գոհ կամ դժգոհ ենք լինում՝ հաշվի առնելով, թե որքանով է մարզիկը ցույց տալիս այն, ինչի ընդունակ է»,- ասաց նա:

Սերոբյանին գոհացրել է նաեւ հենացատկում 2016 թ. Եվրոպայի արծաթե մեդալակիր Արթուր Դավթյանի ելույթը: Նա եզրափակիչ դուրս եկավ բազմամարտում եւ իր հիմնական գործիքի՝ հենացատկի վրա վարժությունում: Բազմամարտում զբաղեցրեց 6, իսկ հենացատկում՝ 5-րդ տեղը: Մեդալ նվաճել չստացվեց հիմնականում, որովհետեւ Ալբերտ Ազարյանի անվան մարմնամարզության դպրոցում, որտեղ մարզվում է, նոր ցատկ մշակելու պայմաններ չկան. եթե բարդ ցատկը Հայաստանում փորձի, կարող է վնասվածք ստանալ, իսկ առանց նոր ցատկի Եվրոպայի առաջնությունում մեդալ նվաճելն այնքան էլ իրատեսական չէր:

«Չենք հասցրել նոր ցատկ մշակել, ի վիճակի էլ չէինք, որովհետեւ պայմաններ չկան: Նրանից էլ շատ գոհ ենք: Բազմամարտում նա իր լավագույնն արեց, ավելին չէինք կարող անել»,- ասաց նա:

Մարզիչը չի դժգոհում նաեւ Եվրոպայի 2016 թ. արծաթե մեդալակիր Վահագն Դավթյանից (օղակներ): Նա նոր, բարդ վարժություն էր պատրաստել, որը, սակայն չկարողացավ անսխալ կատարել եւ կրկին մեդալ նվաճել: Եզրափակչում զբաղեցրեց 4-րդ տեղը:

«Ընդհանուր առմամբ, լավ էր, բայց սխալներ ուներ, թեեւ այնպես չէ, որ չէր կարող ավելին անել: Տեսանք մեր թերությունները, կաշխատենք»,- ասաց նա:

Իսկ ահա Արթուր Թովմասյանից Սերոբյանը (օղակներ) դժգոհ է: Որակավորման փուլում նա 2-րդն էր: Ըստ Սերոբյանի՝ նույն կերպ լավ կարող էր հանդես գալ նաեւ եզրափակչում: Նա ընդգծում է, որ Ռիո 2016-ի չեմպիոն հույն Էլեֆթերիոս Փեթրունիասին հաղթել հնարավոր չէր լինի, սակայն արծաթը պարտավոր էր նվաճել: Եզրափակչում վարժության վերջում թույլ տված սխալը որոշիչ եղավ, եւ Արթուրը զբաղեցրեց 7-րդ տեղը:

«Նրանը 2-րդ տեղն էր: Չէինք կարող օլիմպիական չեմպիոնին հաղթել, պարզապես պետք է աներ այն, ինչ արել էր որակավորման փուլում: Նրանից դժգոհ ենք: Այնպես չէ, որ ինչ-որ բան խանգարեց: 2 օր առաջ վարժությունը կատարեց, տեսանք, որ կարող է: 2-րդ օրը նույնն արեց, բայց վերջում անհասկանալիորեն շատ լուրջ սխալ թույլ տվեց»,- ասաց նա:

Այս  մրցաշարում ՀՀ-ն էին ներկայացնում նաեւ 2 երիտասարդ մարզիկներ՝ Վիգեն Խաչատրյանը (բազմամարտ) եւ Արմեն Պետրոսյանը (նժույգթափեր): 2-ն էլ չհաղթահարեցին որակավորման փուլը: Պետրոսյանը, ըստ Սերոբյանի, ավելի լավ է կատարել իր վարժությունը, քան մարզումների ընթացքում է անում, իսկ Խաչատրյանի աշխատանքից մարզիչը շատ դժգոհ է:

«Պտտաձողի վրա գնահատականը շատ ցածր էր, այդտեղ օբյեկտիվ պատճառ կար: Ես անձամբ թույլ չտվեցի Վիգենին շարունակել, քանի որ ձեռնակապը («накладка») կտրվել էր, ուրիշը վերցրեց, մրցման ժամանակ պոկվեց, փաթաթվում էր պտտաձողին, նա կարող էր 3-4 տեղից կոտրել ձեռքը: Բայց մյուս վարժությունները՝ օղակները, զուգափայտը.... իրավունք չուներ այդպես հանդես գալու: Պետք է շատ աշխատի, որ մրցումների գնա»,- ասաց նա:

Եվրոպայի առաջնությունից հետո մարմնամարզիկները պատրաստվելու են օգոստոսին կայանալիք համաշխարհային ուսանողական խաղերին: ՀՀ-ն ներկայացնելու են Արթուր Թովմասյանն ու Արթուր Դավթյանը: Այնուհետեւ Հարություն Մերդինյանը, Արթուր Դավթյանը եւ Վահագն Դավթյանը մասնակցելու են Փարիզում կայանալիք աշխարհի գավաթի խաղարկությանը, որից հետո նույն 3 մարզիկները հանդես են գալու աշխարհի առաջնությունում: