Պահանջում են դատարան բերել Արայիկ Խանդոյանին եւ հեռացնել փոխգնդապետ Ղազարյանին

Ավան եւ Նոր Նորք վարչական շրջանների ընդհանուր իրավասության դատարանում լարված մթնոլորտում շարունակվում է «Սասնա ծռեր» խմբի 14 անդամի գործով դատական նիստը: Դատական նիստերի դահլիճ բերվեց նաեւ Սեդրակ Նազարյանը, որի ինքնազգացողությունը նիստից առաջ վատացել էր: Այսպիսով դատարան էին բերվել 14 անդամից՝ 12-ը:

Մյուս երկուսը՝ Գագիկ Եղիազարյանը եւ Արայիկ Խանդոյանը, թեեւ, բերվել էին դատարան, սակայն նիստերի դահլիճ չէին բարձրացվել: Նիստը մեկնարկելուն պես Խանդոյանի պաշտպան Արա Ղսրագյոզյանը հայտարարեց, թե որտեղ է իր պաշտպանյալը: Ի պատասխան դատավոր Արտուշ Գաբրիելյանն ասաց, որ նրանց նկատմամբ նախորդ նիստին սանկցիա է կիրառվել, ուստի դատարան չեն բերվել: Այնուհետեւ դատարանն անցավ ինքնաբացարկի հարցը քննարկելուն: Հարցին, թե ինքնաբացարկի միջնորդություն ունե՞ք, Խանդոյանի պաշտպան Արա Ղարագյոզյանը հայտարարեց. «Նախորդ նիստին, նիստերի դահլիճում եւ դահլիճից դուրս մեր պաշտպանյալները ենթարկվել են խոշտանգման եւ ծեծի, որը կատարել է փոխգնդապետ Ղազարյանը (խոսքը Ուղեկցող գումարտակի հրամանատար Արմեն Ղազարյանի մասին է,-հեղ) եւ նա շարունակում է մեր պաշտպանյալներին դատարան բերել, հավանական է եւ նրանց հետ շփվել․ ես հիմա վստահ չեմ, որ իմ պաշտպանյալը կրկին կենթարկվի խոշտանգումների, ծեծի, թե՝ ոչ»:

Դատարանը նշեց, որ ծեծելու մասով քրեական գործ է հարուցվել, եւ այժմ կատարվում է նախաքննություն: Դատավորը պարբերաբար ընդհատում էր Ղարագյոզյանին նշելով, որ ինքնաբացարկի միջնորդություն ունի դատարանին, թե՝ ոչ: Արա Ղարագյոզյանը դատավորի հարցին ի պատասխան ասաց, որ նա չի կարող լինել անկողմնակալ դատավոր եւ ինքն ինքնաբացարկի միջնորդություն չի ներկայացնում միայն այն պատճառով, որովհետեւ վստահ է, որ այն մերժվելու է: «Քանի որ իմ պաշտպանյալները խոշտանգումների են ենթարկվել, դուք էլ նիստերի դահլիճում եք եղել, ուրեմն դուք չեք ղեկավարվում այն, այլ` Վլադիմիր Գասպարյանը, Բաղրամյան 26-ը, Դատական դեպարտամենտը: Դուք կաշկանդված եք այս գործով, եւ արդարադատություն չեք իրականացնում»,-ասաց Խանդոյանի պաշտպանը:

Դատավորն ասաց, թե պաշտպանը նույնը բանը մի քանի անգամ կրկնում է, ասաց, որ պաշտպանը հարց է բարձրացրել՝ անձը, ով խոշտանգել է իր պաշտպանյալներին, այսօր էլ շարունակում է գտնվել այստեղ եւ ղեկավարել ոստիկաններին, թույլատրելի է՞: «Դուք ասում եք՝ գնացեք, դիմեք, քրեական գործ կա, քրեական գործը կքննվի: Դուք՝ որպես դատավոր, որպես իրավաբան, քաջ հասկանում եք, որ տվյալ անձն առնվազն կասկածյալի կարգավիճակ ունի այս պահին, եւ իրավունք չունի շփվելու անձի հետ, ով արդեն վաղուց պետք է տուժողի կարգավիճակ ունենար: Դուք տվյալ գործի շրջանակներում թողնում եք, որ կասկածյալը եւ տուժողը շփվեն: Մեզ համար դա անթույլատրելի է»,- հայտարարեց Լուսինե Սահակյանը:

Դատավորը հետաքրքրվեց՝ արդյո՞ք տվյալ անձը կասկածյալի կարգավիճակ ունի, ինչին ի պատասխան Լուսինե Սահակյանը վկայակոչեց Մարդու իրավունքների եվրոպական դատարանի դիրքորոշումը, համաձայն որի՝ արդեն պետք է մեղադրյալի կարգավիճակ ունենար: Նա հարց հնչեցրեց՝ եթե նույնիսկ տվյալ անձը վկայի կարգավիճակ ունի, ինչպես է դատարանը թույլ տալիս, որ տուժողն ու վկան շփվեն միմյանց հետ: Լուսինե Սահակյանը խնդրեց դատական նիստերի դահլիճ վերադարձնել հեռացված ամբասանյալներին, ինչպես նաեւ պահանջեց, որ մինչեւ խոշտանգման գործով քննության ավարտը տվյալը անձն իրավունք չունենա ղեկավարել անվտագությունն ապահովող ոստիկաններին:

Դատավորը պարբերաբար ընդհատում էր պաշտպանական կողմի հայտարարությունները նշելով, թե արձանագրում է, որ կողմը ինքնաբացարկի միջնորդություն չունի: Սա բարկացրեց Լուսինե Սահակյանին եւ միջնորդեց դատարան բերել հեռացված ամբաստանյալներին, որից հետո քննարկել ինքնանբացարկի հարցը: Ապա շեշտեց, որ սա անհապաղ միջնորդություն է: Դատավորն էլ ասաց` այո անհապաղ կքննարկենք, ինքնաբացարկի հարցը քննարկելուց հետո:

Մանրամասները` քիչ անց