Սյուզաննա Մելքոնյանը՝ «Նոր ալիքի»՝ կադրից դուրս մնացած հետաքրքիր ժամանցի մասին

«Նոր ալիք 2017»-ում միայն մրցութային լարված տրամադրություն չէ: Կազմակերպիչները մտածում են մասնակիցների հետաքրքիր առօրյայի մասին: Երեկ՝ սեպտեմբերի 11-ին, ոչ մրցութային օր էր, եւ մասնակիցները մի փոքր լիցքաթափվելու հնարավորություն էին ստացել: Նրանք լողափնյա ֆուտբոլ էին խաղում ժյուրիի անդամների հետ: Armtimes.com-ի հետ զրույցում Հայաստանը ներկայացնող Սյուզաննա Մելքոնյանը պատմեց, որ մեծ բավականություն է ստացել միջոցառումից, թեեւ հաղթել են, ոչ թե իրենք, այլ ժյուրի անդամները:

«Սովորույթ է արդեն՝ ամեն տարի մասնակիցները խաղում են ժյուրիի անձնակազմի հետ: Տպավորություններս հրաշալի են, որովհետեւ մրցութային 2 օրերից հետո մեզ իսկապես պետք էր լիցքաթափվել: Հաղթեց իրենց թիմը, մենք 2-րդ տեղում էինք եւ արժանացանք դիպլոմների ու մեդալների»,- պատմեց նա:

Ծանրաբեռնված գրաֆիկը չի խանգարում, որ մասնակիցները կարողանան նաեւ նոր ընկերներ ձեռք բերել: Սյուզաննան ընդգծում է, որ բոլորն էլ հիանալի մարդիկ են եւ բոլորի հետ էլ լավ հարաբերություններ է հաստատել, սակայն ավելի շատ շփվում է նրանց հետ, ովքեր մոտ են իրեն բնավորությամբ ու խառնվածքով:

«2 շաբաթ մենք ապրում ենք միասին, իրար հետ ենք առավոտից մինչեւ ուշ երեկո: Հասցրել եմ բոլորի հետ ընկերանալ, բայց ավելի շատ, երեւի, շփվում եմ Վիետնամի (Լիլու) եւ Ուզբեկստանի (Սարդոր Միլանո) ներկայացուցիչների հետ: Մի տեսակ ընդհանուր բաներ ունենք: Նաեւ շատ եմ սիրում Ռուսաստանի մասնակիցներից Վասիլի Ուրիեւսկուն ու Ստաս Մորեին: Հրաշալի մարդիկ են: Բոլորի հետ բարիդրացիական հարաբերություններ են, որովհետեւ բոլորս էլ հասուն մարդիկ ենք, կա փոխադարձ հարգանք: Բայց կան բնավորության որոշ գծեր որոնցով որոշ մարդկանց մոտ ես, որոշ մարդկանց՝ ոչ: Իմ թվարկած մարդկանց հետ եմ ավելի շատ շփվում»,- ասաց նա:

^{Սյուզաննան եւ Լիլուն}

^{Սյուզաննան եւ Սարդոր Միլանոն}

Լիցքաթափվել, ժամանց, ընկերներ, շփում, ոչինչ, սակայն չի շեղում Սյուզաննա Մելքոնյանին, եւ նա կենտրոնացած է մրցույթի վրա: Մրցութային 2 օրերից հետո առաջատարների թվում է: 237 միավորով 3-րդն է եւ առաջատարներ Սարդոր Միալոնյին ու Հայաստանի մյուս ներկայացուցիչ Էռնա Միրին զիջում է ընդամենը 5 միավորով:

«Տրամադրությունս հրաշալի է, մարտական եմ տրամադրված: Վաղը մրցութային 3-րդ օրն է, պատրաստվում եմ այդ օրվան: Մրցութային վերջին օրն իսկապես շատ կարեւոր է: Ակնկալիքներս շարունակում են մեծ լինել, որովհետեւ դեռեւս առաջատար դիրքերում եմ եւ շարունակում եմ պայքարել»,- ասաց նա:

Իր ելույթներից հետո ժյուրիի գրեթե բոլոր անդամներն առավելագույն 11 միավոր են տվել նրան, սակայն եղել են նաեւ 10 գնահատողներ: Դա Սյուզաննային չի ընկճում: Նշում է, որ այս օրերին իր հիմնական դժվարությունը եղել է ոչ թե ցածր գնահատականները, այլ երգը փոխելը: Մրցութային 2-րդ օրվա համար նա ամիսներ շարունակ պատրաստել էր «Ապրելու ապրիլ» երգը, սակայն վերջին պահին ստիպված է եղել կատարել «Твои следы» ստեղծագործությունը:

«Դա հոգեբանական մեծ ապրումների պատճառ է: Դու այնքան պրոֆեսիոնալ պետք է լինես, որ կարողանաս այդ դժվարությունը պատվով հաղթահարել»,- ասաց նա:

^{Սյուզաննան եւ Կոնստանտին Մելաձեն}

^{Սյուզաննան եւ Ալսուն}

Ինչ վերաբերում է ժյուրիի անդամներին, ապա ոմանց ցածր գնահատականները Սյուզաննային չեն ստիպում տրամադրվել նրանց դեմ: Գիտակցում է, որ գնահատողներն իսկական պրոֆեսիոնալներ են եւ ըմբռնումով է մոտենում նրանց կարծիքներին: Նաեւ գիտի, որ ճաշակները տարբեր են. ոմանց կարող է դուրս չգալ իր ոճը, ոմանք էլ կարող են հիանալ դրանով:    

«Մենք ժյուրիի անդամների հետ շփվելու քիչ հնարավորություններ ունենք: Կուլիսներում սահմանափակ շփումներ ենք ունենում, կարծում եմ՝ դա ճիշտ է, որովհետեւ սուբորդինացիան պետք է պահպանել: Բայց հասցրել եմ շփվել Կոնստանդին Մելաձեի հետ (այն մարդը, որն ինձ ցածր է նշանակում (ծիծաղում է)), եւ իհարկե ոչ հետին մտքով, պարզապես պատահաբար հանդիպեցինք կուլիսներում: Եվ շփվել եմ Ալսուի հետ, որն ինձ իր շնորհակալությունը հայտնեց գեղեցիկ մատուցման եւ հրաշալի ձայնի համար, ինչն ինձ ավելի ոգեւորեց»,- ասաց նա:

Սոչիում ընթացող «Նոր ալիք 2017»-ը մեկնարկել է սեպտեմբերի 8-ին եւ ավարտվելու է 14-ին: Վաղը՝ մրցութային վերջին օրը, մասնակիցները ներկայանալու են հատուկ իրենց եւ մրցույթի համար գրված ստեղծագործություններով: Սյուզաննան կատարելու է «Навсегда» երգը: