ՀՀ ծանրորդները Մ20 եւ Մ23 ԵԱ մեդալների մի մասը նվաճել են, երբ որակազրկումն ուժի մեջ է եղել

Ծանրամարտի միջազգային ֆեդերացիայի կողմից սահմանած որակազրկումը, որը նախատեսվում էր կիրառել 2008 եւ 2012 թթ. օլիմպիական խաղերում 3 եւ ավելի անգամ հակադոպինգային կանոնները խախտած երկրների նկատմամբ, ուժի մեջ է: Ըստ կազմակերպության պաշտոնական հայտարարության՝ 2017 թ. հոկտեմբերի 20-ից սկսած 9 պետություն՝ դրանց թվում նաեւ Հայաստանը, 1 տարի իրավունք չի ունենա մասնակցելու Ծանրամարտի միջազգային ֆեդերացիայի մրցաշարերին:

«2017 թ. հոկտեմբերի 20, Հունգարիա՝ Բուդապեշտ: Այսօր պաշտոնապես ուժի մեջ է մտնում այն 9 երկրի 1-ամյա որակազրկումը, որոնցից Պեկին 2008-ի եւ Լոնդոն 2012-ի ընթացքում վերցված դոպինգ-նմուշների վերստուգումը 3 եւ ավելի անգամ դրական արդյունք է տվել»,- գրված է Ծանրամարտի միջազգային ֆեդերացիայի պաշտոնական կայքում:

Նշվում է, որ յուրաքանչյուր երկիր 21 օր ժամանակ ունի բողոքարկելու համար: Բացի Հայաստանից՝ որակազրկվել են նաեւ Չինաստանի, Ռուսաստանի, Ադրբեջանի, Բելառուսի, Ղազախստանի, Ուկրաինայի, Մոլդովայի եւ Թուրքիայի ֆեդերացիաները:

Հայաստանի հավաքականի կազմում արգելված խթանիչներ օգտագործելու համար Պեկին 2008-ում որակազրկվել էին բրոնզե մեդալակիր Տիգրան Գեւորգի Մարտիրոսյանը եւ Հռիփսիմե Խուրշուդյանը, իսկ Լոնդոն 2012-ում՝ բրոնզե մեդալակիր Հռիփսիմե Խուրշուդյանը եւ Նորայր Վարդանյանը:

1-ամյա որակազրկումն ուժի մեջ է մտել 2017 թ. Եվրոպայի մինչեւ 20 եւ մինչ 23 տարեկանների առաջնության ընթացքում: Մրցաշարն Ալբանիայի Դուրես քաղաքում մեկնարկել է հոկտեմբերի 15-ին եւ ավարտվել է 22-ին: Այդ մրցաշարից Հայաստանը վերադարձել է մեդալների մեծ պաշարով՝ 18 ոսկի, 8 արծաթ, 6 բրոնզ:

Հայաստանի տղաների մինչեւ 23 տարեկանների թիմը 28 պետությունների մեջ 1-ին է 8 ոսկով, 1 արծաթով ու 1 բրոնզով: Մինչեւ 20 տարեկանների թիմը 4 ոսկով, 3 արծաթով ու 3 բրոնզով 4-րդն է 32 պետությունների մեջ: Աղջիկների մինչեւ 20 տարեկանների թիմը 26 պետությունների մեջ 1-ինն է 6 ոսկով, իսկ 23 տարեկան աղջիկների թիմը 22 երկրների մեջ 7-րդն էր 4 ոսկով ու 2 բրոնզով:

Մեդալների մեծամասնությունը հայ մարզիկների կողմից նվաճվել է հոկտեմբերի 20-ին եւ դրանից հետո, այսինքն՝ երբ որակազրկումն արդեն ուժի մեջ էր: Հոկտեմբերի 20-ին մինչեւ 23 տարեկանների պայքարում չեմպիոն էր դարձել Եվրոպայի 2016 թ. մեծահասակների չեմպիոն Անդրանիկ Կարապետյանը (85 կգ): Նաեւ փոքր ոսկի էր նվաճել պոկում եւ արծաթ հրում վարժությունում: Նույն օրը մինչեւ 23 տարեկանների պայքարում չեմպիոն էր դարձել նաեւ Կարուշ Ղուկասյանը (94 կգ), որը նաեւ վարժություններից յուրաքանչյուրում փոքր ոսկի էր նվաճել: Մինչեւ 23 տարեկան աղջիկների պայքարում փոխչեմպիոն էր դարձել Տաթեւ Հակոբյանը (90 կգ): Նաեւ 1-ական փոքր արծաթ էր նվաճել վարժություններից յուրաքանչյուրում: Հոկտեմբերի 21-ին տղաների մինչեւ 20 տարեկանների պայքարում հաղթել էր Ռիո 2016-ի արծաթե մեդալակիր Սիմոն Մարտիրոսյանը (+105 կգ), մինչեւ 23 տարեկանների պայքարում՝ Ռիո 2016-ի արծաթե մեդալակիր Գոռ Մինասյանը (+105 կգ), աղջիկների մինչեւ 20 տարեկանների պայքարում՝ Արփինե Դալալյանը (+90 կգ):

Նրանք նաեւ 1-ական ոսկի էին նվաճել վարժություններից յուրաքանչյուրում: Մինչեւ 20 տարեկանների պայքարում Սամվել Գասպարյանը (105 կգ) փոխչեմպիոն էր դարձել: Նաեւ փոքր բրոնզ էր նվաճել պոկում եւ փոքր ոսկի՝ հրում վարժությունում:

Մինչեւ հոկտեմբերի 20-ը մինչեւ 23 տարեկան աղջիկների պայքարում բրոնզե մեդալակիր էր դարձել Իզաբելլա Յայլյանը (58 կգ), որը նաեւ փոքր բրոնզ էր նվաճել պոկում վարժությունում եւ փոքր արծաթ՝ հրումում: Ժորժ Եղիկյանը (77 կգ) փոքր բրոնզե մեդալ էր նվաճել մինչեւ 23 տարեկան տղաների առաջնությունում՝ հրում վարժությունում: Սոնա Պողոսյանը (75 կգ) դարձել էր Եվրոպայի մինչեւ 20 տարեկան աղջիկների առաջնության չեմպիոն: Նաեւ 1-ական փոքր ոսկի էր նվաճել պոկում եւ հրում վարժություններում: Դավիթ Հովհաննիսյանը (85 կգ) մինչեւ 20 տարեկանների պայքարում դարձել էր արծաթե մեդալակիր: Նաեւ փոքր արծաթ էր նվաճել պոկում վարժությունում: Մինչեւ 20 տարեկանների պայքարում Հրայր Հովհաննիսյանը (69 կգ) փոքր բրոնզ էր նվաճել պոկում վարժությունում:

Հայ ծանրորդները Հայաստան են վերադարձել այս գիշեր: Ինչպես տեղեկացնում է Հայաստանի ազգային օլիմպիական կոմիտեի պաշտոնական կայքը, նրանց Երեւանի «Զվարթնոց» օդանավակայանում դիմավորել են ՀԱՕԿ նախագահ Գագիկ Ծառուկյանը, ՀՀ սպորտի եւ երիտասարդության հարցերի նախարար, ՀԱՕԿ գլխավոր քարտուղար Հրաչյա Ռոստոմյանը, մարզաշխարհի բազմաթիվ ներկայացուցիչներ, մարզասերներ, ծանրորդների հարազատներն ու ընկերները: