ՀՀ-ում ես, կարծես թե, սխալվեցի. բրիտանացի գործարարը բախվել է հայկական անարդարադատությանը

Բրիտանացի գործարար եւ ներդրող Սոնիա ՄաքԼեոդը բաց նամակ է հասցեագրել ՀՀ բարձրագույն իշխանությանը, դատական իշխանության եւ ԱԱԾ ղեկավարներին առեւտրային կամ այլ կազմակերպությունների ծառայողների կողմից լիազորությունները չարաշահելու եւ խարդախության հոդվածների հատկանիշներով հարուցված գործի կարճման վերաբերյալ՝ խնդրելով նրանց միջամտությունը քրեական գործի արդյունավետ եւ հնարավորինս արագ քննությունն իրականաց­նելու, իր խախտված իրավունքները վերականգնելու  եւ մեղավորներին պատասխա­նա­տվության ենթարկելու հարցում։

Նամակում, մասնավորապես, ասված է, որ դիմում է պաշտոնական այրերին, համոզված լինելով, որ անտարբեր չեն լինի որեւէ ներդրողի, այդ թվում եւ հատկապես՝ օտարերկրյա ներդրողի խախտված իրավունքների վերականգման հարցում, քանզի այն ոչ միայն տնտեսության զարգացման, այլ նաեւ տնտեսական անվտանգության կարեւորագույն երաշխիք է: Նա պատմել է իր տնտեսական գործունեությա պատմությունը եւ նշել. «Ունենալով Ֆլայ Դուբայ ընկերության կողմից լիազորություն ՀՀ-ում ընկերություն հիմնադրելու հետ կապված՝ բանակցել եմ տարբեր անձանց հետ եւ 2010թ-ի հոկտեմբեր ամսին ՀՀ-ում գրանցել եմ «Թրասթ Թրավել Ընդ Տուրիզմ» ՍՊԸ-ն»,- նշում է նա բաց նամակում:

«Հիմնադրման պահին 40 տոկոս բաժնեմասը պատկանել է ինձ, 30-ական տոկոս՝ երկու այլ գործընկերոջ: Որպես բրիտանացի, ես ունեմ սկզբունք, որ կյանքում պետք է վստահել երեք հոգու՝ բիզնեսի գործընկերոջը, քո իրավաբանին եւ քո բժշկին: Սակայն Հայաստանում ես, կարծես թե, սխալվեցի: Հավատալով, որ Հայաստանի Հանրապետությունում կա արդարադատություն, հույս ունենալով, որ կհասնեմ արդարության եւ խախտված իրավունքներիս վերականգնմանը,  սույն թվականի փետրվարի 9-ին ՀՀ քննչական կոմիտե եմ ներկայացրել հանցագործության մասին հաղորդում ընդդեմ նախկին բիզնես-գործընկերոջս եւ նախկին իրավաբանիս՝ ՀՀ քրեական օրենսգրքի 214-րդ (Առեւտրային կամ այլ կազմակերպությունների ծառայողների կողմից լիազորությունները չարաշահելը) եւ 178-րդ (Խարդախություն) հոդվածների հատկանիշներով` տնօրենի կողմից ընկերության շահերին հակառակ գործելու հետեւանքով Ֆլայ Դուբայի պաշտոնական ներկայացուցչի կարգավիճակը կորցնելու եւ վստահությունս չարաշահելու հիմքով բաժնեմասերի «օտարում» կազմակերպելու հիմքերով»,- նշում է գործարարը:

Նյութերի նախապատրաստության արդյունքում, քննիչ Ա. Գ.-ի կողմից 18.02.2017թ-ին կայացվել է քրեական գործ հարուցելը մերժելու մասին որոշում, որը բողոքարկվել է եւ Երեւան քաղաքի դատախազի 14.03.2017թ-ի որոշմամբ վերացվել: Հարուցվել է թիվ 63200817քրեական գործով:

Նրա խոսքով, գործի նախաքննության ընթացքում երկու անգամ տեղի է ունեցել քննիչի փոփոխություն (քրեական գործի հարուցումը մերժելու մասին որոշումը Երեւան քաղաքի դատախազի կողմից վերացվելուց հետո տեղի է ունեցել քննիչի փոփոխություն, որից հետո կրկին Ա. Գ-ն է իրականացրել գործով վարույթը) եւ վեց անգամ երկարաձգվել է գործի նախաքննության ժամկետները:Քննիչ Ա. Գ.-ի կողմից 14.11.2017թ.-ին որոշում է կայացվել քրեական գործի վարույթը կարճելու մասին։ «Նախաքննության ավարտման պահին ծանոթանալով քրեական գործի նյութերին՝ իմ օգտին իրավաբանական ծառայություն մատուցող ընկերության փաստաբանները եկել են այն եզրահանգման, որ շուրջ 10 ամիս տեւած քննության ընթացքում վարույթ իրականացնող մարմինը ՀՀ քրեական օրենսգրքի 214-րդ հոդվածի հատկանիշներով առհասարակ քննություն չի իրականացրել, իսկ 178-րդ հոդվածի հատկանիշներով լրիվ, բազմակողմանի եւ օբյեկտիվ քննություն չի տարվել: Ուստի, փաստաբաններ կողմից քրեական գործի վարույթը կարճելու մասին որոշումը բողոքարկվել է Երեւան քաղաքի դատախազին: Մասնավորապես, գործում ունենալով մեր կողմից ներկայացված էլփոստի հաղորդագրությունները, որոնցով հաստատվում էին մի շարք փաստեր կապված քրեական գործի հետ, քննիչի կողմից չեն ուսումնասիրվել, դրանց մասով հարցեր չեն ուղղվել կողմերին։ Այս ամենը համոզմունք է առաջացնում, որ քննիչը կամ չունի համապատասխան որակավորում այդպիսի գործք քննելու, կամ չունի օբյեկտվիություն, ինչը շատ ավելի հավանական է»,- ասել է նա։

Սույն նամակով բրիտանացի գործարարը խնդրել է միջոցներ ձեռնարկել քրեական գործի արդյունավետ եւ հնարավորինս արագ քննությունն իրականացնելու, «խախտված իրավունքները վերականգնելու եւ մեղավորներին պատասխանատվության ենթարկելու հարցում, որի կարեւոր երաշխիք է համարում քննիչ Ա. Գ-ին վարույթից հեռացնելը եւ քրեական գործի քննությունը տնտեսական հանցագործությունների քննության փորձ եւ համապատասխան գիտելիքներ ունեցող քննիչին հանձնելը»: