Սաշիկ Սարգսյանի որդու դեմ ցուցմունք տված տուժողի վրա արնահոսող վնասվածքներ կային. պաշտպան

Սերժ Սարգսյանի եղբորորդին՝ Հայկ Ալեքսանդրի Սարգսյանը, այսօր դատարանի դահլիճում կալանավորվեց. սա առաջին կալանավորումն է Սերժ Սարգսյանի բարեկամների շրջանում:

Հայկ Սարգսյանին կալանավորելու միջնորդություն նախաքննական մարմինը ներկայացրել էր նախօրեին. այն, սակայն քննվեց այսօր, Երեւան քաղաքի ընդհանուր իրավասության դատարանի Կենտրոն եւ Նորք-Մարաշ վարչական շրջանի նստավայրում՝ դատավոր Աննա Մաթեւոսյանի նախագահությամբ: Մի քանի ժամ անց դատարանը որոշել է բավարարել քննիչի միջնորդությունը եւ Հայկ Սարգսյանը կալանավորվել է հենց դատարանի դահլիճում:

Սաշիկ Սարգսյանի որդին մեղադրվում է 11 տարի առաջ տեղի ունեցած հանցագործության համար: Տուժող Դավիթ Սիմոնյանը, որը որոշել է այսքան տարի անց խոսել, Հայկ Սարգսյանի եւ նրա ընտանիքի հետ մտերիմ հարաբերությունների մեջ է եղել: Նա ընտրություններին հնարավոր բոլոր միջոցներով՝ անգամ ընտրախախտումներ կատարելով, լրագրողների աշխատանքը խոչընդոտելով, աջակցել է Սարգսյաններին: Մեզ հայտնի դարձավ, որ մոտ մեկ տարի թմրանյութի գործով կալանավորված Դավիթ Սիմոնյանն օրեր առաջ ազատ է արձակվել:

Հայկ Սարգսյանն այժմ մեղադրվում է ՀՀ քրեական օրենսգրքի 34-104 հոդվածի 1-ին (սպանության փորձ) եւ ՀՀ ՔՕ 235 հոդվածի 1-ին մասի հատկանիշներով (ապօրինի կերպով զենք-զինամթերք ձեռք բերելը, կրելը): Առաջադրված մեղադրանքում:

Սույն գործը վերաբացվել է օրեր առաջ. այդ մասին հայտնի դարձավ այն ժամանակ, երբ ԱԱԾ-ն անհետաձգելի քննչական գործողություններ էր կատարում Սաշիկ Սարգսյանի բնակարանում: Խուզարկությունը, սակայն կապված էր նրա մյուս որդու՝ Նարեկ Սարգսյանի հետ:

Առաջադրված մեղադրանքում Հայկ Սարգսյան իրեն մեղավոր չի ճանաչում: Այս մասին մեր զրույցում ասաց նրա պաշտպան Երեմ Սարգսյանը:

Նրա հետ զրույցը ստորեւ.

- Պարոն Սարգսյան, ի՞նչ դիրքորոշում է հայտնել Հայկ Սարգսյանը առաջադրված մեղադրանքի վերաբերյալ:

- Թե մեղադրանքն ինչքանով է հիմնավոր կամ անհիմն՝ այդ հարցին հետագա փուլերում մանրամասն կանդրադառնանք: Բայց պետք է նշեմ, որ կալանավորման որոշումը ակնհայտ անհիմն եւ ապօրինի որոշում է ու այստեղ ուղղակի աչք է ծակում այս հանգամանքը: Հույս ունեինք, որ այս իրավիճակում դատարանները եւ վարույթն իրականացնող մարմինները՝ քննչական, դատախազություն, ի վերջո ավելի օրենքի տառին համապատասխան կգործեին, ինչպես որ պահանջն է երկրի ղեկավարության կողմից, բայց տեսնում ենք, որ արջի ծառայություն է մատուցվում ավելի ցածր օղակների կողմից:

Մի բան ակնհայտ է, որ հուլիսի 4-ից Հայկ Սարգսյանի նկատմամբ որպես խափանման միջոց էր ընտրվել չհեռանալու մասին ստորագրությունը եւ 7 օր գտնվելով ազատության մեջ, առնվազն 4 անգամ ծանուցագրերով ներկայացել է վարույթն իրականացնող մարմնին, այսինքն՝ այս 7 օրվա մեջ պատշաճ կերպով ներկայացել է եւ որեւէ անգամ չի թաքնվել: Խոչընդոտման հետ կապված՝ 7 օր ազատության մեջ գտնվելով որեւէ տվյալ դատարան չի ներկայացվել քննիչի կողմից, որ այս 7 օրվա ընթացքում փորձ է արվել թեկուզ քննությանը խոչընդոտելու: Իսկ Վճռաբեկ դատարանը կոնկրետ նախադեպերով սահմանել է, որ կալանքը պետք է ընտրվի այն բացառիկ դեպքերում, եթե խափանման այլ միջոցները չեն կարողանում ապահովել անձի պատշաճ վարքագիծ: 7 օր ստորագրություն չհեռանալու մասին խափանման միջոցը պատշաճ միջոց է եղել, նորմալ վարքագիծ է ապահովել, հիմա 7 օր հետո հանկարծ դատարանը նման որոշում է կայացնում:

Միայն այս փաստը բավարար է, որպեսզի ակնհայտ լինի, որ սա օրինական որոշում չէ, չի կայացել օրենքի հիման վրա՝ ինչ-ինչ այլ նկատառումներից ելնելով: Հասկանալի է, որ այստեղ անձանց անունների հետ կապված որոշակի կաշկանդվածություններ ունեն դատավորը, քննիչը: Բայց այս պարագայում գտնում եմ, որ պահանջը երկրի ղեկավարության կողմից կայացել է նրանում, որ բացառապես օրենքի դաշտում պետք է գործեն՝ անկախ նրանից, թե ում մասին է խոսքը եւ ում վերաբերյալ է քրգործը: Թե ով ինչ վերաբերմունք ունի գործերի եւ փաստերի նկատմամբ, կարծում եմ՝ դատարանը, քննիչը, դատախազը պետք է այդ ամեն ինչից վեր լինեն եւ կարողանան օրենքով որոշումներ կայացնել: Մենք տեսանք, որ այստեղ ուղղակի օրենքը չգործեց եւ որոշ ժամանակ հետո ավելի փաստարկված կներկայացնեմ, թե իրականում ինչ է տեղի ունեցել, յուրաքանչյուր քայլին ինչպիսի ապօրինություններ են տեղի ունեցել եւ ինչպես են մասսայաբար իրավունքի խախտումներ տեղի ունենում, եւ ամեն քայլափոխին որտեղ են խախտվում մեղադրյալի եւ պաշտպանության իրավունքները:

- Հայկ Սարգսյանը ցուցմունք տալի՞ս է:

- Ցուցմունք տալու համար մեզ պետք է պարզաբանեին մեղադրանքի էությունը, մենք մի քանի անգամ միջնորդեցինք, որպեսզի մեղադրանքի էությունը պարզաբանվի, ինչը Եվրոպական դատարանի, Վճռաբեկ դատարանի եւ օրենքի ուղիղ պահանջն է, որ յուրաքանչյուր ոք, եթե մեղադրվում է հանցագործության մեջ, անհապաղ ու իրեն հասկանալի լեզվով մանրամասն պետք է տեղեկացվի մեղադրանքի վերաբերյալ: Բազմաթիվ միջնորդություններ ենք ներկայացրել, սակայն այդպես էլ չի պարզաբանվել: Այս համատեքստում ակնհայտ է, որ մենք զրկվել ենք պաշտպանության եւ նաեւ ցուցմունք տալու իրավունքից:

- Ձեզ հայտնի՞ է, թե ինչու, ի վերջո տուժողը 11 տարի անց որոշեց խոսել եւ ցուցմունք տալ ձեր պաշտպանյալի դեմ:

- Պատասխանը ենթադրությունների մակարդակով է՝ այն իմաստով, որ առերեսման ժամանակ տուժողի մարմնի վրա եղել են բազմաթիվ վնասվածքներ՝ արնահոսող եւ կապտուկի տեսքով, մեջքի շրջանում ուժեղ ցավի հետեւանքով մի քանի ժամ մեջքը բռնած նստած վիճակում է եղել: Առերեսման ժամանակ ուղիղ հարց է տրվել, թե ինչի հետեւանքով են այդ վնասվածքները առաջացել տուժողի վրա, ինչու է մեջքը բռնած նստած, որին ի պատասխան հնչեցվել է, որ երիկամները ցավում են, իսկ այդ վնասվածքները, կապտուկները մոծակի կծածն է: Այնուհետեւ փորձաքննություն է միջնորդվել, որպեսզի պարզվի, թե ինչի հետեւանքով են առաջացել այդ վնասվածքները, այսինքն՝ ակնհայտ է, որ մենք որոշակի խնդիր էինք տեսնում այդտեղ, կրկին ուղղակիորեն մերժվել է այդ միջնորդությունը: Եվ հաջորդը, տուժողը թմրանյութ պահելու կասկածանքով մի քանի ամիս կալանքի տակ է եղել, հիմա հանկարծ ազատ արձակվեց:

- Այսինքն՝ դուք չեք բացառում, որ տուժողի նկատմամբ ճնշո՞ւմ է գործադրվել:

 - Մենք հետագայում փաստերով կխոսենք:

- Այդ վնասվածքները եղել են 7 օր առաջ տեղի ունեցած առերես հարցաքննության ժամանա՞կ:

- Այո:

- Ապօրինի զենքի մասով ի՞նչ դիրքորոշում է հայտնել Հայկ Սարգսյանը:

- Նշեմ, որ ապօրինի զենքի մասով չէր կարող մեղադրանք առաջադրվել, քանի որ վաղեմության ժամկետ է անցել:

- Բողոքարկելո՞ւ եք կալանքի որոշումը:

- Այո, ներկայացվելու է, չեմ բացառում, որ այլ բողոքներ եւս կներկայացվեն, որի մասին կխոսենք ավելի ուշ:

Նշենք, որ ըստ պաշտոնական հաղորդագրության՝ Դավիթ Սիմոնյանը՝ հրազենային վնասվածքով, թիվ 3 կլինիկական հիվանդանոց է տեղափոխվել 2007 թվականի ապրիլի 1-ին՝ Թումանյան-Նալբանդյան փողոցների խաչմերուկից: Նույն օրը ոստիկանության Կենտրոնական բաժին էր ներկայացել քաղաքացի Ա.Ղեւոնդյանը, ներկայացրել ատրճանակ եւ հայտնել, թե այն գտել է իրենց շենքին կից մանկապարտեզից դեպի նկուղ տանող աստիճանների մոտ, որի հետ անզգույշ վարվելու հետևանքով կրակել է՝ մարմնական վնասվածք պատճառելով ընկերոջը՝ Դ.Սիմոնյանին:

Ոստիկանության Կենտրոնականի քննչական բաժնում 2007 թվականի մայիսի 28-ին որոշում էր կայացվել փաստի առթիվ հարուցված քրեական գործի վարույթը կարճելու եւ Ա.Ղեւոնդյանի նկատմամբ քրեական հետապնդում չիրականացնելու մասին՝ ՀՀ քրեական դատավարության օրենսգրքի 35-րդ հոդվածի 1-ին մասի 4-րդ եւ 5-րդ կետերով նախատեսված կողմերի հաշտության եւ բողոքի բացակայության հիմքով: 2018 թվականի հուլիսի 3-ին ՀՀ գլխավոր դատախազի կողմից վերացվել է նշված որոշումը: Կատարված նախաքննությամբ փաստական տվյալներ են ձեռք բերվել առ այն, որ Դ.Սիմոնյանն իրականում հրազենային վնասվածքը ստացել է Հայկ Ալեքսանդրի Սարգսյանի բնակության վայրի՝ Երեւան քաղաքի Թումանյան փողոցի թիվ 11 շենքի բնակարանի նկուղային հարկում գտնվող սենյակում՝ 2007 թվականի ապրիլի 1-ին՝ ժամը 16:00-ի սահմաններում՝ վերջինիս կողմից արձակված կրակոցի հետեւանքով։

11 տարի անց վերաբացված այս գործը բազմաթիվ հարցեր է առաջացնում, մասնավորապես՝ 2007-ին գործը քննող քննիչի եւ կարճման որոշման օրինականությունը ստուգող հսկող դատախազի գործողությունների մասով: Մասնավորապես, կարճման որոշումից (բողոքի բացակայություն, կողմերի հաշտություն) ստացվում է, որ 2007-ին գործը քննող քննիչը հիմք է ընդունել բացառապես տուժողի եւ Ա Ղեւոնդյանի ցուցմունքը եւ որեւէ քայլ չի ձեռնարկել այդ ցուցմունքների արժանահավատությունը ստուգելու, հայտնաբերված զենքի օրինականությունը ստուգելու ուղղությամբ: Իսկ հսկող դատախազն էլ հսկողություն իրականացրել է եւ որեւէ թերություն չի հայտնաբերել ու գործը փակվել գնացել է:

Երեկ ՀՀ գլխավոր դատախազի խորհրդական Գոռ Աբրահամյանից հետաքրքրվեցինք, թե քննիչի ու դատախազի գործողությունները քրեական գործի շրջանակում քննության առարկա դարձե՞լ են թե՞ ոչ: Ի պատասխան, Աբրահամյանը նշեց հետեւյալը. «Նշված քրեական գործը կարճելու որոշումը վերացնելու մասին որոշումը ՀՀ գլխավոր դատախազի կողմից կայացվել է տուժողի կողմից միայն վերջերս տրված՝ հանցագործության մասին հաղորդմամբ ներկայացված տվյալներում առկա՝ նոր երեւան եկած այնպիսի հանգամանքների բերումով, որոնք ըստ տուժողի՝ իր նկատմամբ սպառնալիքների պատճառով այն ժամանակ չի հայտնել։ Վերսկսված քննությամբ ստուգվում է նաեւ ձեր կողմից մատնանշված հանգամանքը եւ փաստական տվյալներ ի հայտ գալու դեպքում դրանց կտրվի իրավական գնահատական»:

Տպել
24496 դիտում

Նիկոլ Փաշինյանի գլխավորությամբ տեղի է ունեցել ՔՊ նախաձեռնող խմբի նիստ․ հայտնի է՝ ինչ է քննարկվել

ՀՀ-ն որևիցե բան չի պատրաստվում զիջել, ստոր շահարկումներ են․ Ալեն Սիմոնյանը՝ Տավուշի շուրջ պտտվող լուրերի մասին

Սուրեն Պապիկյանը մասնակցել է ռազմական տեխնիկայի ցուցադրությանը և հետևել մարտական հրաձգությանը (լուսանկարներ)

Ինչպես կասեր դասականը՝ «յա՜, իրո՞ք». Արշակ Կարապետյանը «գողացել» է ՀՀԿ-ի ծրագիրը

ՌԴ դեսպանը սիրում էր Ջերմուկում հանգստանալ, լուսանկար էր հրապարակել, բա թող գա ասի, որ դա ՀԱՊԿ-ի տարածք է․ Սիմոնյան

Երբ կկայանա Ալեն Սիմոնյանի և Սահիբա Գաֆարովայի հաջորդ հանդիպումը․ ԱԺ նախագահը մանրամասնել է՝ ինչ է քննարկվել մարտի 22-ին

Վիճաբանություն և ծեծկռտուք «Ռիո Մոլլ»-ի հարևանությամբ. կռվի մասնակիցների մեծ մասը անչափահասներ են, կա վիրավոր

Ռուսաստանը նպատակ է դրել հեղաշրջում իրականացնել Հայաստանում, առաջիկայում քայլերը կսրվեն. Առաքելյան

Դասարաններում կկրճատվի աշակերտների թիվը․ իրականացվել են գնահատման համակարգի փոփոխություններ

Բախվել են «Նիսսան»-ն ու «Ֆորդ տրանզիտ»-ը․ վերջինս նաև երկաթե արգելապատնեշներին է հարվածել, տուժածները հիվանդանոցում են

ԱՄՆ-ը Ռուսաստանի Դաշնությանը մանրամասն տեղեկատվություն է տրամադրել ահաբեկչության սպառնալիքի մասին․ Սպիտակ տուն

Երևանի գլխավոր հատակագիծը կլինի թվայնացված փաստաթուղթ․ Տիգրան Ավինյանը տեսակապով հարցեր է քննարկել Քրիս Չոայի հետ

Շահրամանյանը շարժվում է Բակո Սահակյանի ու Սերժ Սարգսյանի պահվածքով, պետք է ուշադրության կենտրոնում լինի. Իոաննիսյան

96 խնամատար ընտանիքում դաստիարակություն է ստանում 152 երեխա․ այս ինստիտուտի զարգացման աշխատանքները շարունակվում են

Հայ-ռուսական հարաբերություններում առկա վիճակը լավատեսություն չի ներշնչում․ ինչում է մեղադրել Լավրովը ՀՀ ղեկավարությանը

Մինչև ապրիլի 5-ը կատարված իրավախախտման տուգանքի 50 տոկոսը վճարելու դեպքում պարտավորությունը կհամարվի կատարված

Չստացված չեկիստ, հանգիստ վեր ընկիր տեղդ ու ջանդ յուղիր. Մեհրաբյանը՝ Շահրամանյանին

200 հոգու հրկիզման սահմռկեցուցիչ դրվագն ունենալով իր անցյալում՝ խորհուրդ է տալիս Հայաստանի անվտանգության մասին. Սաֆարյան

Հավերժ ճակատներին Եվլախ դաջածներն էլի ակտիվացան. Հարություն Մկրտչյանը՝ Սամվել Շահրամանյանի մասին

Բախվել են շտապօգնության ավտոմեքենան և «Մերսեդես»-ը

Աֆղանստանում 5․7 մագնիտուդ ուժգնությամբ երկրաշարժ է տեղի ունեցել

Խմբի կազմում ապօրինի կերպով զենք-զինամթերք են ձեռք բերել և իրացրել․ խուզարկություններ Երևանում և Գողթանիկում (լուսանկար)

Մեկնարկել է բարձրագույն կրթություն չունեցող մասնագետների արտահերթ կամավոր ատեստավորումը

Եվրոպական խորհրդի քաղաքական և անվտանգության հարցերով կոմիտեի անդամները կայցելեն Հայաստան

Նոր Հաճնի կամրջի վրա փոսային նորոգման աշխատանքներ են իրականացվում․ երբ կավարտվեն

Հայտնի են Արթուր Աբրահամի հոր՝ Գրիգոր Աբրահամյանի հոգեհանգստի և հուղարկավորության վայրն ու օրերը

Վարդենյաց լեռնանցքը դժվարանցանելի է կցորդիչով բեռնատարների համար

Վարչապետի գլխավորությամբ քննարկվել է «Հայփոստ»-ի զարգացման ռազմավարության նախագիծը․ ինչ է հանձնարարվել

29.94 տոննա մարդասիրական օգնություն՝ 1․5 մլն անձի․ ինչ է ուղարկել Հայաստանի կառավարությունը Գազա

Իրականացվել է ոչ պատշաճ հետազոտություն․ պարզվել է 20-ամյա հղի կնոջ մահվան պատճառը, մեղադրանք է ներկայացվել ԲԿ-ի 3 բժշկի

Ճամբարակի սննդի օբյեկտի գործունեության կասեցումը վերացվել է

Երևանի ավագանու ընտրություններից հետո ԿԸՀ վարկանիշն աճել է․ ներկայացվել են ՄՀԻ-ի հետազոտության արդյունքները

Հայաստանի և Վրաստանի խորհրդարանների գիտության ու կրթության հարցերով հանձնաժողովները համատեղ հայտարարություն են ստորագրել

Արարատի կոնյակի գործարանում վերահսկողություն կիրականացվի․ ՍԱՏՄ-ն ստացել է Բելառուսի առողջապահության նախարարության նամակը

Հայ-վրացական հարաբերությունները ռազմավարական մակարդակի են․ Ռուբինյանն ընդունել է Վրաստանի խորհրդարանի պատվիրակությանը

Ինչ փոփոխություններ է արձանագրել տարադրամի շուկան մարտի 28-ին

Սերգեյ Նարիշկինը այց է կատարել Հյուսիսային Կորեա

Անցած մեկ օրում ՀՀ ավտոճանապարհներին վթարների հետևանքով 3 մարդ զոհվել է, 29-ը՝ վիրավորում ստացել

«Միր» քարտերն արգելելը հավասարակշռված որոշում է, չպետք է շրջանցենք սանկցիաները. Թունյան

Հայկ Մարությանը նոր կուսակցություն է հիմնում