«Հայաստան» համահայկական հիմնադրամը այս տարի ավելի շատ դրամ է հանգանակել, քան նախորդ տարի. Արշամյան

«Հայաստան» համահայկական հիմնադրամը այս տարի ավելի շատ դրամ է հանգանակել, քան նախորդ տարի: Այս մասին այսօր լրագրողների հետ հանդիպմանը հայտարարեց հիմնադրամի գործադիր տնօրեն Հայկակ Արշամյանը:

«Եթե հիշում եք՝ խոսքը գնում էր 11 մլն 109 հազար 601 ԱՄՆ դոլարի մասին, այսինքն՝ դա իր մեջ ներառում էր թե՛ Միացյալ Նահանգներում հավաքագրված գումարը եւ թե՛ Տորոնտոյում եւ թե՛ ընդհանրապես այդ օրը դրամահավաքի մասին էր խոսքը, եւ ասեմ, որ այսօրվա տվյալներով, թարմ տվյալներով՝ մենք առնվազն ունենք 14 միլիոն 115 հազար 940 դոլար», - ասաց Արշամյանը՝ շարունակելով․- «Այսինքն, հեռուստամարաթոնից հետո այս գումարը բավական աճել է՝ ի տարբերություն անցած տարվա, երբ որ շուրջ 12 միլիոն դոլարի խոստում էր եղել, իրականում հիմնադրամ մուտք է եղել 7 միլիոն դոլար»:

Արշամյանը նշեց, որ նոյեմբերին կայացած հեռուստամարաթոնից հետո հիմնադրամի հանգանակած ընդհանուր գումարն աճել է, որովհետեւ ռուսահայ մեծահարուստ Սամվել Կարապետյանը նվիրաբերել է 2 միլիոն 800 հազար դոլար: «Հիմնականում Ղարաբաղ է ուղղվելու այդ գումարը, դրանից 900 հազար դոլարի կարգի, մինչեւ 1 միլիոն, տրվելու է չորրորդ երեխա ունեցող ընտանիքներին, կարծեմ 4 հազար դոլարի սահմաններում է ամեն ընտանիքին՝ չորրորդ երեխայի համար, նաեւ այնտեղ երիտասարդական կենտրոն է կառուցվում, եւ այդ կենտրոնի շինարարությունը շարունակելու է համահայկական հիմնադրամը՝ մնացյալ գումարներով»,- ասաց Արշամյանը:

«Հեռուստամարաթոն-2018»-ից հետո լրատվամիջոցները գրեցին, թե այս տարի հիմնադրամին, փաստորեն, հրաժարվեցին գումար փոխանցել ռուսաստանաբնակ հայ մեծահարուստները: Ըստ Արշամյանի՝ 14 միլիոն 115 հազար դոլարն ամբողջական թիվը չէ, եւ հանգանակած ընդհանուր գումարը սպասվում է, որ կաճի:

«Նաեւ դրա մեջ չի մտնում Արգենտինայում հավաքագրված գումարը, որովհետեւ այնտեղի համահայկական հիմնադրամի գրասենյակը ՅՈւՆԻՍԵՖ-ի հետ համատեղ դրամահավաք է իրականացրել երկու օր առաջ, եւ այդ դրամահավաքի արդյունքում մոտավորապես 245 հազար դոլար է հավաքվել, սակայն թե այդ գումարի ո՛ր չափն է լինելու հիմնադրամինը եւ այդ գումարի որ չափն է հիմնադրամի խողովակներով գալու՝ դրա մասին դեռեւս այնտեղ բանակցություններ են գնում, բայց մեկ է՝ այդ գումարը հավաքագրված ընդհանուր գնալու է Գյումրի եւ Սպիտակ՝ երկրաշարժի 30-րդ տարելիցին էր նվիրված, եւ հիմնականում այդ երկու շրջաններում են իրականացվելու ծրագրեր», - նշեց Արշամյանը:

«Հավաստիացնում եմ Ձեզ, որ բոյկոտ չկա Ռուսաստանի հայ գործարարների կողմից: Ես կարծում եմ, որ միայն խոշոր գործարարներին չպետք է ներգրավել այս գործընթացում, այլ այնտեղ ապրող 2 միլիոն հայությանը»,- ասաց Հայկակ Արշամյանը՝ պատասխանելով լրագրողների այն հարցին, թե մամուլում շրջանառվում էր, որ ՌԴ-ի հայազգի խոշոր գործարարներ բոյկոտել են հեռուստամարաթոնը: Արշամյանն ասաց, որ հիմնադրամին, բացի գործարար Սամվել Կարապետյանից, նվիրատվություն է արել նախկին վարչապետ, Եվրասիական տնտեսական հանձնաժողովի նախագահ Տիգրան Սարգսյանը՝ 100 հազար ռուբլի, ՌԴ-ից նվիրատու Աշոտ Խաչատրյանը 100 հազար դոլար է նվիրաբերել հիմնադրամին:

Հայկակ Արշամյանի խոսքով՝ այս դրամահավաքով չեն ավարտվելու աշխատանքները, թվերն ավելանալու են, փորձելու են գնալ Ռուսաստան, Ուկրաինա. «Նաեւ Միջին Ասիայում մեծ պոտենցիալ կա, հենց նույն Ղազախստանում եւ Թուրքմենստանում, ուստի չի կարելի նրանց անտեսել»:

Հայկակ Արշամյանը վստահեցրեց՝ այսօր որեւէ քաղաքական կուսակցություն չի կարող ազդեցություն ունենալ հիմնադրամի վրա, թեեւ ինքը ունի համակրանք ներկայիս իշխանության անդամների նկատմամբ, ինքն անկուսակցական է, եւ հիմնադրամն՝ ապաքաղաքական: 

Հարցին՝ արդյոք հիմնադրամում կլինե՞ն խոշոր բացահայտումներ՝ ֆինանսական չարաշահումներ (բացի նախկին տնօրենի դեպքից), ինչպես տարբեր գերատեսչություններում է լինում, Հայկակ Արշամյանը պատասխանեց. «Հաշվեքննիչ պալատը ուսումնասիրություններ է կատարում հիմնադրամում, հիմնականում ավարտվել է: Քննություններ են կատարվում կապալառուների հետ, հիմնադրամի գործընկերների հետ»: Արշամյանը նշեց, որ հաշվեքննիչ պալատը երբեք հիմնադրամում ուսումնասիրություն չի կատարել, սա առաջին անգամ է: Արշամյանը վստահեցրեց՝ պալատը ստուգում է հիմնադրամի վերջին 10 տարվա գործունեությունը. «Ավելի խորն ուսումնասիրելու են վերջին մի քանի տարվա գործունեությունը: Հունվարի վերջին, հույս ունենք, արդյունքները կլինեն»: