Կա՞ տարբերություն՝ ով, ինչպես, գնդակի՞ց, թե՝ առանց. զոհված զինծառայողի հայրը բաց նամակով դիմում է ՀՀ վարչապետին

«Հայկական Ժամանակ» օրաթերթի խմբագրության միջոցով ՀՀ վարչապետին բաց նամակ է հղել քաղաքացի Տարոն Մարգարյանը, որի որդին զոհվել է զինվորական ծառայության ժամանակ:

Ստորեւ ներկայացնում ենք նամակը.

«Մեծարգո վարչապետ, Ձեր ուշադրությունն եմ ուզում հրավիրել, մեղմ ասած, մի անարդար իրողության վրա, որը միչեւ հոգուս խորքը վիրավորել է, առանց այդ էլ վիրավոր սիրտս ու միտքս, ընդ որում՝ ես խոսում եմ նաեւ իմ բախտակիցների անունից, որոնք այս պահին երկուսն են:

Խոսքը վերաբերում է իրենց կյանքը հայրենիքին նվիրած մեր զինվոր զավակների ընտանիքների աջակցության համար ստեղծված «Զինծառայողների ապահովագրության հիմնադրամի» բաշխման կարգին:

Իմ որդին 2015 թ. մարտի 22-ին Արցախի Հանրապետության Թալիշ գյուղի մատույցներում, առաջնագծի մարտական դիրքում, մարտական առաջադրանքը կատարելուց հետո սրտանոթի պատռվածքի պատճառով ավարտում է իր երկրային կյանքը եւ հայրենիքին ծառայելու իր պարտադիր ժամկետը, երբ դրա ավարտին մնացել էր 80 օր:

Որդիս՝ ՀԱՅԿ ՄԱՐԳԱՐՅԱՆԸ, 2013 թ. հունիսի 11-ին զորակոչվելով հայոց բանակ՝ պատվով եւ մեծ նվիրումով է ծառայել եւ դրա համար բանակի ղեկավարությունը ըստ արժանվույն գնահատել է նրան՝ արտահերթ շնորհելով սերժանտի զինվորական կոչում, բանակի գերազանցիկի պատվո կրծքանշան, պատվո փոխանցիկ դրոշ, գնդի լավագուն հաշվարկի հրամանատար պատվանուն եւ մի շարք գովասանագրեր: Արդարության համար պետք է նշեմ, որ մեր պետությունն էլ իր հերթին շարունակեց այդ գործնթացը եւ հանրապետության նախագահի հրամանագրով հետմահու պարգեւատրվեց «Մարտական ծառայության» մեդալով եւ այլ պետական ու գերատեսչական մեդալներով: Անհրաժեշտ եմ համարում նաեւ ասել, որ ծառայության ընթացքում եւ հետո ում հետ հանդիպել եմ՝ լինի դա ծառայակից, թե հրամանատար, հիացմունքով էին խոսում՝ գնահատելով նրա մարդկային եւ մասնագիտական որակները: Հպարտության եւ այրող կարոտի ինչպի՜սի համադրություն:

Այս տարվա սեպտեմբերի սկզբին մեզ զանգահարում են պաշտպանության նախարարությունից  եւ հայտնում, որ ես տիկնոջս հետ միասին պետք է ներկայանամ ՊՆ սոց. վարչություն, մեզ հետ ունենալով անհրաժեշտ փաստաթղթերը: Երկու օր անց մենք գնացինք, այնտեղ մեզ հայտնեցին, որ կառավարության որոշման համաձայն, 20 տարի ժամկետով մենք թոշակավորվելու ենք նշված ֆոնդի կողմից:

Կարծում եմ՝ կարիք չկա ներկայացնելու մեր հոգեկան վիճակը, երբ նորից վերապրում ենք մեր որդու կորստյան դառը կսկիծը: Անցնում է մոտ երկու ամիս եւ մենք տեղեկանում ենք, որ մեր որդու անունը հանվել է ներկայացված ցուցակից՝ թշնամու գնդակից մահացու վիրավորում չստանալու պատճառով:

Վիրավորանքից խելագարված գնում եմ սոց. վարչություն, որտեղ առանց աչքերիս մեջ նայելու, հաստատում են տեղեկությունը: Անտեսել էին նրա վաստակը, անցած ճանապարհը, դեպքին նախորդած ողբերգական իրավիճակը (2015 թ. մարտի 19-ին Թալիշի մատույցներում տեղի ունեցավ թշնամու դիվերսիոն ներթափանցման փորձ, ամբողջ առաջնագծի երկայնքով հակազդման գործողության մասնակցությունը, որին զոհ գնացին մեր 4 զինվոր զավակները), նրա գտվելու վայրը եւ այլն: Ստացվում է, որ թշնամու գնդակը այն պատվո նշանն է, որի մահաբեր «համբույրը» չունեցողը ոչինչ է:

2016թ. ապրիլյան օրերին միակ որդուս՝ ՏԻԳՐԱՆԻ հետ, կամավոր, լինելով առաջնագծում, տեսել եմ եւ խորապես համոզվել ՀԱՅ զինվորի՝ մեր 18-20 տարեկան զավակների անվեհեր ոգին, անկոտրում կամքը եւ ինքնազոհողության վճռականությունը, տեսել եմ ու հասկացել, որ նրանք բոլորն են արժանի փառքի եւ հատկապես նրանք, ովքեր ընկան:

Անվերապահորեն խոնարհվելով նրանց ՍՈՒՐԲ հիշատակի առջեւ՝ աղոթքս եմ հղում առ աստված եւ հարցնում բարձրյալին՝ կա՞ տարբերություն քեզ համար՝ ով, ինչպես, գնդակի՞ց, թե՝ առանց:

Պարոն վարչապետ, ես խնդրում եմ Ձեզ, օգտագործելով Ձեր հեղինակությունը, իրավունքները եւ քրիստոնեական Ձեր խիղճը, վերջ դնել մեր ժողովրդին անհարիր այս սրբապիղծ մոտեցումը, որը անասելի ցավ եւ վիրավորանք է պատճառում ինձ ու իմ բախտակիցներին: Ավելի մանրամասն կարող եմ ներկայացնել զրույցի ժամանակ, եթե Դուք ցանկանաք:

Հարգանքներով` Տարոն Մարգարյան»:

Տպել
2006 դիտում

Արագիլների անկման կապակցությամբ Հրազդան գետի, Հովտաշենին հարող ցամաքուրդային ջրերի նմուշառման աշխատանքներ են իրականցվում

ՔԿ պարզաբանումը՝ Սամվել Կարապետյանի եղբորորդու գործի վերաբերյալ

Փոխվարչապետ Տիգրան Ավինյանը հանդիպել է ՄԱԿ-ի գլխավոր քարտուղարի հատուկ հանձնակատարին

Բացի աշխատանքից՝ բարեկեցություն ստեղծելու այլ ճանապարհ չկա․ Նիկոլ Փաշինյան

Նեթանյահուն դարձել է Իսրայելի ամենաերկար պաշտոնավարած վարչապետը

Սեւանի ոստիկանները բացահայտել են ապօրինի ծառահատման դեպքը. վարորդը չի ենթարկվել ոստիկանների պահանջին

«Իմ քայլը հանուն Շիրակի» բիզնես համաժողովի ընթացքում ներդրումային ծրագրեր ներկայացրին մոտ 50 ընկերություններ եւ անհատներ

ՍԴ ոչ լեգիտիմ նախագահ Հրայր Թովմասյանը հայտարարում է, որ ՀՀԿ-ի դատավորներին չի կարելի փոխել

Սոս Սարգսյանը ոչ միայն մեծ արվեստագետ էր, այլեւ մեծ քաղաքացի․ Արմեն Սարգսյան

Էդմոն Մարուքյանն ԱՄՆ-ում խոսել է Հայաստանում իրականացվող բարեփոխումների մասին

Հայաստանի Հանրապետությունը պետք է վերագտնի արդյունաբերական երկրի իր երբեմնի փառքը. վարչապետ

ՄԻՊ-ն ամփոփել է Իջեւանի իրադարձություններն ու արձանագրված խնդիրները

Իշխանության ներկայացուցչի նկատմամբ բռնություն գործադրելու մեղադրանքով որոնվողին գտել են Ուջան գյուղում

Արդարադատության նախարարին կից հասարակական խորհրդի նիստում քննարկվել են դատական, հակակոռուպցիոն ոլորտների բարեփոխումները

Դատարանը վարույթ է ընդունել «Արմոս» ՍՊԸ-ի հայցն ընդդեմ պատգամավոր Գեւորգ Գորգիսյանի

Զարեհ Սինանյանը ՌԴ-ում ապրող հայ ակտիվ երիտասարդներին հրավիրեց սերտ համագործակցության

Դիզվառելիք տեղափոխող բեռնատարը Օձունի մոտ շրջվել է. 2 մարդ տեղափոխվել է Ալավերդու ԲԿ

Կոռուպցիոն համակարգին ուղղակիորեն կապված տնտեսական համակարգի հետ կոմպրոմիս չի լինելու․ վարչապետ (ուղիղ)

Անցնող շաբաթ հակառակորդը Արցախի դիրքապահների ուղղությամբ արձակել է 900 կրակոց

Ոստիկանները Երեւանի Կոմիտասի պողոտայից բերման են ենթարկել 31-ամյա գրպանահատի