Կրքեր. շոուն ավարտվեց. կույսերը նաեւ հաճույք ստացան

14/04/2019 schedule15:50

Տպագրվել է «Հայկական Ժամանակ» օրաթերթի՝ 2006 թվականի ապրիլի 13-ի համարում

Ի՞նչ կարող է անել իշխանության մաս կազմող այն քաղաքական ուժը, որը հիմնահատակ քննադատում է կառավարության իրականացրած սեփականաշնորհումը։ Երեկ այդ քաղաքական ուժին «Արդարություն» խմբակցության քարտուղար Վիկտոր Դալլաքյանն ԱԺ ամբիոնից հուշեց չորս տարբերակ։ Ինչո՞ւ ընդամենը չորս, որովհետեւ 5-րդ տարբերակը, ըստ Դալլաքյանի, արդեն կստացվեր կույս մնալու եւ հաճույք ստանալու վիճակը, որը, Դալլաքյանի կարծիքով, ֆիզիոլոգիապես իրականանալի չէ։ Եւ ուրեմն՝ ի՞նչ կարող է անել իշխանության մաս կազմող ՕԵԿ-ը, որը երեկ եւս, արդեն ԱԺ նախագահի մակարդակով, ջախջախեց 2001-2003թթ. տեղի ունեցած սեփականաշնորհումը։

ՕԵԿ-ը կարող է. «ա»՝ կողմ քվեարկել հաշվետվությանն ու շարունակել խաղաղ գոյակցել կոալիցիոն համույթում, «բ»՝ կարող է մերժել հաշվետվությունը եւ շարունակել մնալ կոալիցիայում, «գ»՝ կարող է մերժել հաշվետվությունն ու դուրս գալ կոալիցիայից, եւ տարբերակ վերջին՝ կարող է մերժել հաշվետվությունն ու սկսել կառավարությանն անվստահություն հայտնելու գործընթաց։ Եւ չնայած 2001-2003-ի պետական գույքի մասնավորեցման ծրագրի հաշվետվության քվեարկությունը տեղի է ունենալու այսօր, ակնհայտ է, սակայն, որ ՕԵԿ-ն ընտրելու է տարբերակ «բ»-ն. քվեարկությամբ մերժելու է ներկայացված հաշվետվությունն ու շարունակելու է մնալ կոալիցիայում։ Այս տարբերակն իր հնարավորություններով որոշակի նմանություն ունի կույս մնալու եւ հաճույք ստանալու տարբերակի հետ, ինչը եւ երեկ խորհրդարանի նիստերի դահլիճում արեց ՕԵԿ-ը, փաստորեն, հերքելով Դալլաքյանի գիտելիքները կույս մնալու եւ հաճույք ստանալու անհամատեղելիության մասին։

«Ի՞նչ անենք, չասե՞նք, չխոսե՞նք։ Չէ՛, պետք է խոսենք, պետք է ասենք, որպեսզի հաջորդ անգամ չկրկնվի, որովհետեւ չափ կա, սահման կա։ Ես տեղեկացնում եմ, որ Վերահսկիչ պալատի հաշվետվության մեջ ներառված պետական գույքի մասնավորեցման բոլոր այն դեպքերը, ինչի մասին այստեղ խոսվեց, ես այդ նյութերն ուղարկելու եմ գլխավոր դատախազություն, որովհետեւ միլիոններ յուրացնողը պետք է պատժվի։ Եւ պետք չէ քննադատությունն ընդունել սվիններով. քննադատության նպատակը ոչ մեկի աչքը հանելը չէ, եւ ոչ ոք ինձ չի կարող հանդիմանել ՀՀ-ի լավը ցանկանալու համար։ Ես իմ երկրի լավն եմ ուզում»,- իր ելույթում ասաց Արթուր Բաղդասարյանը՝ թվարկելով պետական գույքի մասնավորեցման դեպքերի մի շքերթ, երբ գույքը մասնավորեցվել է արժեքից 100 եւ ավելի անգամ պակաս։

Իսկ մինչ Ա. Բաղդասարյանի արտահերթ ելույթը, ՕԵԿ խմբակցության անունից հանդես էր եկել Մհեր Շահգելդյանն ու տեղեկացրել, որ իրենց խմբակցությունը դեմ է քվեարկելու մասնավորեցման հաշվետվությանը. «ՕԵԿ-ը դեմ է 2001-2003 թվերին տեղի ունեցած մասնավորեցմանը, եւ մենք չենք կարող ու չենք պատրաստվում կողմ լինել մի գործընթացի, որը բազմիցս քննադատել ենք»։ ՄԱԿ խմբակցության նախագահ Գուրգեն Արսենյանը եւս տեղեկացրեց, որ իրենք չեն կարող ողջունել կարեւորագույն գաղափարների վարկաբեկումը, ուստի քվեարկելու են դեմ։ Իսկ «Արդարություն» եւ «Ազգային միաբանություն» խմբակցությունները հաշվետվության քվեարկությանը չեն մասնակցի։ Եւ չնայած առավոտից լուրեր էին շրջում, որ ՀՀԿ-ՕԵԿ հակամարտող կողմերը եկել են կոմպրոմիսի եւ որոշել են իրավիճակը չսրել, սակայն Ա. Բաղդասարյանի բոցաշունչ ելույթը անտարբեր չթողեց հանրապետականներին։

ՀՀԿ խմբակցության ղեկավար Գալուստ Սահակյանը բարձրացավ ամբիոն ու ներկաներին խորհուրդ տվեց չհավատալ այն հեքիաթներին, որտեղ Մոխրոտիկը դառնում է գեղեցկուհի, ինչպես նաեւ չհավատալ նրան, որ կոալիցիոն կուսակցություններից մեկը փոշոտվել է, իսկ մյուսն աննախադեպ ծաղկում է ապրում։ «Հիմա «Օրինաց երկիր»-Մոխրոտիկը գեղեցկուհի դառնալու շանս չունի՞»,- հետաքրքրվեցին դահլիճից։ Սահակյանը չպատասխանեց ռեպլիկին եւ շարունակեց իր ելույթը. «Մի քիչ տոն տայինք, արդեն կոմպրոմատների վիճակ էր ստեղծվում, եւ իրար տուն էին քանդելու։ Որովհետեւ հենց որ կպանք՝ եղած-չեղած բաները գլխներին էր լցվելու»,- ի պատասխան ՕԵԿ-ականների ելույթի ասաց ՀՀԿ խմբակցության ղեկավարը։

Եւ եթե Գալուստ Գրիգորիչի հանդեպ Ա. Բաղդասարյանը մեծահոգի գտնվեց ու չմիջամտեց նրա ելույթին, ապա ՀՀԿ անդամ Գագիկ Մինասյանի եւ ԱԺ նախագահի միջեւ սկիզբ առած լեզվակռիվը շոշափեց բավականին լայն սպեկտոր՝ պետական շահը նեղ քաղաքական շահին ստորադասելուց մինչեւ էշի զռռոցը։ Իսկ հանրապետական Արմեն Աշոտյանը, որին իր կուսակիցները խնդրել էին չսրել իրավիճակը եւ հրաժարվել ելույթից, այնուամենայնիվ, չկարողացավ գոնե երկու նախադասություն չասել: «Ժողովրդական հայտնի խոսք կա՝ ամենից շատ յուղում են այն անիվը, որը ամենաշատն է ճռռում։ Այս հարցի կապակցությամբ ծավալվող քննարկումները հիշեցնում էին քաղաքական խորամանկություն, սակայն որեւէ մեկին դեռեւս չի հաջողվել այնքան խորամանկ լինել, որ կարողանա թաքցնել իր այդ հատկությունը»,- ասաց Աշոտյանը։

Ու քանի որ ՀՀԿ-ին հատկապես դուր չէր եկել Արթուր Բաղդասարյանի արտահերթ ելույթը, հանրապետական Աշոտյանի մոտ առաջացել է ԱԺ կանոնակարգ օրենքում եւս մեկ դրույթ ամրագրելու ցանկություն: «Կարծում եմ, ճիշտ կլինի ԱԺ կանոնակարգ օրենքում նախատեսվող փոփոխություններում ավելացնել մի դրույթ, որը կկանոնակարգի նախագահողների արտահերթ ելույթները, որպեսզի դրանք չդառնան արտառոց ելույթներ»,- առաջարկում է պատգամավորը։   Իսկ ի՞նչ է մտածում կառավարության ղեկավարը ՕԵԿ-ի եռօրյա ջանքերի մասին:

«Բոլոր կոնկրետ դեպքերը, որոնց մասին խոսվեց, դրանք բոլորը անցել են կառավարության նիստերով, որոնց ներկա են եղել նաեւ այդ կուսակցության անդամները եւ կարող էին այդ հարցերն այն ժամանակ բարձրացնել։ Նման բան չի եղել։ Ինչ վերաբերում է այդ որակի ելույթներին, ապա դրանք ունեն օբյեկտիվ եւ սուբյեկտիվ պատճառներ, որոնց անդրադառնալ չէին ցանկանա, քանի որ իրենք առարկայական ոչինչ չասացին։ Սակայն ես եւ կառավարությունը պատրաստ էինք, եթե շատ առարկայական խոսեին, պատասխանելու բոլոր նրանց հարցերին: Հասկանալի է, որ նախընտրական տարի է, սակայն յուրաքանչյուրը ինքը պետք է բարոյականություն ունենա եւ չփորձի ցանկացած միջոցով ընտրող ճարել»,- երեկ եռօրյա խորհրդարանական կրքերն ամփոփեց Անդրանիկ Մարգարյանը։

Իսկ ի՞նչ կլինի, եթե այսօր խորհրդարանը չհաստատի սեփականաշնորհման հաշվետվությունը։ «Ոչ մի բան էլ չի լինի. ընդամենը Վ. Դալլաքյանի արած առաջարկը կարող են իրագործել եւ դնել կառավարության վստահության հարցը»,- թեման ավարտեց վարչապետը։ Պարզ է, սակայն, որ ՕԵԿ-ը չի օգտվի Դալլաքյանի առաջարկից, որովհետեւ կույս մնալու եւ հաճույք ստանալու պրոցեսում կառավարությանն անվստահություն հայտնելու դեպքեր չեն գրանցվել։

Նաիրա Զոհրաբյան    

Տպել
1184 դիտում

ՌՌ և Վրաստանի հարաբերությունների վատանալու համար մեղավոր են իշխանությունները. Բուրջանաձե

Ո՛չ Ռոբերտ Քոչարյանը, ո՛չ նրա պաշտպանական խմբի անդամները չեն մասնակցի այսօրվա դատական նիստին. հայտարարություն

Դանակահարություն Արաբկիր վարչական շրջանում. մեղադրանք է առաջադրվել 32-ամյա տղամարդուն

Մանվել Գրիգորյանի պաշտպանը միջնորդեց գործը քննել դռնփակ. դատարանը մերժեց

Լոռու մարզում կինը ձեռքերով սեղմել է անչափահաս դստեր պարանոցին և խեղդամահ անելով սպանել նրան. ՔԿ

Սյունիքի մարզի Գորայքում արտահերթ ընտրություններ տեղի կունենան. փակել են միջպետական ճանապարհը, լարված իրավիճակ է

ԱԺ-ն երկրորդ ընթերցմամբ և ամբողջությամբ ընդունեց Հարկային օրենսգրքի փոփոխությունների փաթեթը

ՀՀ պաշտպանության նախարարի գլխավորած պատվիրակությունը մասնակցում է միջազգային ռազմատեխնիկական համաժողովին

Մանվել Գրիգորյանի ինքնազգացողությունը վատացավ. պաշտպանը խնդրեց, որպեսզի բժիշկը նրան թթվածին տրամադրի

ՄԱԿ-ը հարցեր է հղել Թուրքիային 1915-1923թթ. բռնի տեղահանված հայերի ճակատագրի և նրանց վախճանի մասին

Մանվել Գրիգորյանը քիչ առաջ անվասայլակով բերվեց դատարան

Վարչապետը Մասիսում ներկա է գտնվել Ֆրանկոֆոնիայի զբոսայգու և ընտանեկան մարզահամալիրի բացման արարողությանը

Հանուն ձեր մայրերի և քույրերի, եղե՛ք միմյանց նկատմամբ խնամքով, պատասխանատու և զգոն. Աննա Հակոբյանը՝ զինծառայողներին

Ավարտվեց Կոպա Ամերիկա 2019-ի խմբային փուլը

Իտալիան կընդունի 2026 թ. ձմեռային օլիմպիական խաղերը. ՄՕԿ-ը 925 մլն դոլար կտրամադրի

ՀՀ-ն Վրաստան-Ռուսաստան լարվածությունը հանելու համար պատրաստ է երկկողմ օդային ուղեւորափոխադրում իրականացնել. Ճաղարյան

Ստորագրվել է 35 որոշում՝ մաքսային գործի տարբեր բնագավառների վերաբերյալ. ՊԵԿ

Էլմար Մամեդյարովի պնդումները չեն համապատասխանում իրականությանը. ԱԳՆ-ի արձագանքը

Առաջիկա օրերին շրջանների զգալի մասում սպասվում է անձրեւ եւ ամպրոպ

Ռուսաստանը վերադարձավ ԵԽԽՎ, դեմ հանդես եկող երկրները չեն պատրաստվում հանձնվել․ Ն. Զոհրաբյան