Վաղը Երեւանի տրանսպորտը նորմալ կաշխատի. ուղեւորափոխադրողներին հրավիրել են քաղաքապետարան

Այսօր տեղի ունեցած մամուլի ասուլիսի ժամանակ փոխադրողների միության նախագահ Հրանտ Եղիազարյանը հայտարարել էր, որ վաղը Երեւան քաղաքի մի շարք ուղեւորափոխադրող ընկերություններ գործադուլ կանեն, որպեսզի ուշադրություն գրավեն 11 տարի չլուծվող իրենց խնդիրների վրա: Սակայն քիչ առաջ ՀԺ-ի հետ զրույցում Եղիազարյանն ասաց, որ վաղը ակցիան չեն իրականացնի, քանի որ քաղաքապետարանից զանգահարել են իրենց եւ առավոտյան հրավիրել են քաղաքապետարան՝ խնդրի վերաբերյալ քաղաքապետի տեղակալի հետ զրուցելու նպատակով:

Մեր հարցին, թե այսքան տարի այս խնդիրը կար, սակայն վարորդները գործադուլի տարբերակին չէին դիմել, այժմ ո՞րն է պատճառը, որ նման տարբերակ էին ընտրել, Եղիազարյանը պատասխանեց. «Դուք բաժակի մեջ ջուր լցնո՞ւմ եք: Ասենք լցվեց, լցվեց եւ մի պահ մեջը մնում է մի բաժակ եւ ավելցուկը թափվում է: Այս մարդկանց համբերությունն արդեն հատել էր»:»

Երեւանի քաղաքապետարանի մամուլի քարտուղար Հակոբ Կարապետյանը ՀԺ-ի հետ զրույցում ասաց, որ տեղյակ են Եղիազարյանի հայտարարությունից: «Գործադուլը առհասարակ ցանկացած անձի եւ կազմակերպության եւ անձանց խմբի իրավունքն է: Այդ առումով քաղաքապետարանը որեւէ կարծիք չի կարող հայտնել»,- ասաց Կարապետյանը:

Անդրադառնալով Եղիազարյանի հայտարարությանը, թե ինքը փորձում է քաղաքապետարանի հետ կոնտակտի մեջ մտնել եւ քաղաքապետարանը այդ փորձերին ընդառաջ չի գնում, Կարապետյանն ասաց. «Ես միայն կարող եմ ասել, որ պարոն Եղիազարյանը, որպես տրանսպորտային բարեփոխումների հանձնաժողովի անդամ, հրավեր է ստացել դեռ 2 շաբաթ առաջ՝ գալ քաղաքապետարան եւ մասնակցել հանձնաժողովի աշխատանքներին: Այսինքն, ոչ միայն մասնակցել, քննարկել եւ ներկայացնել իր խնդիրները, այլ նաեւ գտնել լուծումներ եւ լինել այդ որոշում կայացնողների շարքում: Իսկ տրանսպորտի այդ հանձնաժողովի նիստը տեղի է ունենալու վաղը: Մենք զանգեցինք պարոն Եղիազարյանին եւ ցանկացանք համոզվել՝ արդյո՞ք նա ստացել է այդ հրավերը, այո, նա ստացել է այդ հրավերը ու կարծես գալու է եւ մասնակցելու է:

Ինչ վերաբերվում է 100 դրամը 200 դրամ դարձնելու ցանկությանը կամ պահանջին, այստեղ ուղղակի մենք պետք է հասկանանք, որ հանրության մոտ կոնսենսուս կա այն առումով, որ գործող հանրային տրանսպորտի համակարգի պայմաններում սակագնի որեւէ փոփոխություն՝ թանկացման մասին է խոսքը, բնականաբար չի կարող լինել եւ քննարկվել: Եթե խոսում ենք սուբսիդիաների մասին, այդ սուբսիդիաները նույն քաղաքացիների գրպանից տրվող միջոցներն են, դրանք երկնքից չեն ընկնում: Ու, եթե հանրային տրանսպորտը համընդհանուր օգտագործման է՝ այսինքն ամբողջ հանրությանն է վերաբերվում, սուբսիդիաներ տեսականորեն հնարավոր են, բայց կարծում եմ՝ այդ քննարկումները պետք է լինեն հենց նոր տրանսպորտյային համակարգի մշակման կոնտեքստում: Հենց այդ քննարկմանը հրավիրված է ուղեւորափոխադրողների միության նախագահ Հրանտ Եղիազարյանը»,- ասաց Կարապետյանը:

«Ես կարող եմ ասել, որ քաղաքապետարանը համենայնդեպս ունի պահուստային տարբերակ՝ տրանսպորտային կոլապսը թույլ չտալու համար»,- ասաց Կարապետյանը:

Մեր հարցին, թե որո՞նք են այդ տարբերակները, Կարապետյանը պատասխանեց. «Քանի որ ես չգիտեմ՝ արդյոք վաղը կլինի գործադուլ, թե չի լինի, լինելու դեպքում ինչ ծավալներով կլինի, միայն նշեմ, որ ցանկացած իրավիճակ իր լուծումն է թելադրում եւ կարծում եմ՝ քաղաքապետարանը այդ լուծումները կգտնի»:

Կարապետյանը նշեց, որ վաղը տրանսպորտի բարեփոխումներով զբաղվող վերակազմավորված հանձնաժողովի առաջին նիստն է եւ տրանսպորտային բարեփոխումները մտել են ներդրման փուլ ու երթուղային ցանցն արդեն պատրաստ է թղթի վրա: «Արդեն ակտիվ աշխատանքները սկսվում են այդ համակարգը իրականության մեջ ներդնելու ուղղությամբ»:

Մեր հարցին՝ որոշակի ժամկետ կարո՞ղ են արդեն նշել, թե երբ պատրաստ կլինի այդ նոր համակարգը, Կարապետյանը պատասխանեց. «Մենք գիտենք, որ ե՛ւ այս տարի ե՛ւ գալիք տարի գործարկման մեջ գտնվող տրանսպորտային միջոցների նվազում է ակնկալվում՝ շուրջ 110-ը այս տարի եւ շուրջ 150-ը՝ գալիք տարի: Այդ խնդրի լուծումն իր արտացոլումը կգտնի տրանսպորտային համակարգի ներդրման գործընթացի մեջ»,- եզրափակեց Կարապետյանը:

Տպել
1351 դիտում

ՀՔԾ-ն պաշտոնապես հաստատում է, որ Միհրան Պողոսյանին ձերբակալել են

Սյունիքի մարզի Խդրանցի եկեղեցին այսօր փլուզվել է

Մեր մտքերն ու աղոթքները զոհերի հարազատների հետ են. Զոհրաբ Մնացականյան

Մոսկվայում կալանավորել են Քեթրինի Միհրանին. Irakanum

Բախումներ Վրաստանում. ոստիկանությունն արցունքաբեր գազ է կիրառել

Արմեն Սարգսյանը ցավակցական հեռագիր է հղել Շրի Լանկայի նախագահին

Երեւանում հիվանդանոց են տեղափոխվել դանակահարված հայր ու որդի. կասկածյալը հայտնի է

Չարենցավանում ձյուն է տեղում, Տավուշի մարզում և Սպիտակի ոլորաններում մառախուղ է

ՀՀ-ն խստորեն դատապարտում է ոճրագործությունը. Նիկոլ Փաշինյանի հեռագիրը՝ Շրի Լանկայի նախագային

Եվրոպական դատարան. սպասվում է տասը դատավճիռ

Կառավարության նիստում. Ռոբերտ Քոչարյանի բարձր «հովանու ներքո»

Նախընտրական կրքեր. Սահրադյանը 7 օրից կդառնա դոկտոր

Արցախի Նախագահը ՀՀ կառավարության պատվիրակության հետ քննարկել է համագործակցության հարցերի լայն շրջանակ

Շրի-Լանկայի պայթյունների թիվն ավելացել է երկուսով, զոհերի թիվն արդեն 190-ի է հասնում (լուսանկարներ)

ԱԳՆ-ն ճշտում է Շրի Լանկայում տեղի ունեցած պայթյունների հետևանքով տուժածների շրջանում հայերի առկայությունը

Նիկոլ Փաշինյանը տիկնոջ՝ Աննա Հակոբյանի և դստեր հետ ներկա է գտնվել Հայրապետական սուրբ պատարագին (լուսանկարներ)

Փրկարարները դուրս են բերել փոսն ընկած ավտոմեքենան

Բակո Սահակյանը Ստեփանակերտում մասնակցել է Սուրբ Հարության տոնի սուրբ պատարագին

Առողջապահության նախարարն այցելել է «Սուրբ Գրիգոր Լուսավորիչ» բժշկական կենտրոն

Երանի՜ նրանց, որ հալածվում են արդարության համար, որովհետև նրանցն է երկնքի արքայությունը. վարչապետի գրառումը