Օրենսդիրն այսօր ընտրելու է Հանրային ծառայությունները կարգավորող հանձնաժողովի նախագահ․ թեկնածուն Գարեգին Բաղրամյանն է

ԱԺ-ն այսօր՝ ապրիլի 18-ին, քննարկում է Հանրային ծառայությունները կարգավորող հանձնաժողովի ընտրության հարցը։ Թեկնածուն էներգետիկ ենթակառուցվածքների եւ բնական պաշարների նախարարի պաշտոնակատար Գարեգին Բաղրամյանն է:

ՀՀ Հանրային ծառայությունները կարգավորող հանձնաժողովի նախագահի նշանակման հարցի քննարկման ժամանակ ԼՀԿ խմբակցության պատգամավոր Գեւորգ Գորգիսյանը Գարեգին Բաղրամյանից հետաքրքրվեց՝ նրան առաջադրելու համար դեր է ունեցել ԱԱԾ պետի հետ բարեկամական կա՞պը, թե՞ մասնագիտական գիտելիքները։

«Ձեր կենսագրությունից հայտնի է, որ 2004-18 թթ-ն աշխատել եք ՀԾԿՀ-ում: Մի կողմ թողնելով՝ ինչքանով է դրական 14 տարվա ձեր փորձն այս հանձնաժողովում, ակնհայտ է, որ ունենք գիտելիքներ ոլորտին վերաբերող եւ տիրապետում եք խնդրին։ Նաեւ հայտնի է, որ դուք ԱԱԾ տնօրեն Արթուր Վանեցյանի քենակալն եք: Ուզում եմ հասկանալ՝ ձեզ առաջադրվելու հարցում, ձեր գնահատմամբ, քանի՞ տոկոսով են դեր խաղացել մասնագիտական գիտելիքները եւ ձեր բարեկամական կապը»,- մասնավորապես հարցրեց Գորգիսյանը։

Ի պատասխան՝ Բաղրամյանն ասաց, որ բավականին երկար տարիներ աշխատում է այս ոլորտում եւ համոզված է, որ իր փորձն է դեր ունեցել, եւ համոզված է, որ ոչ ամենեւին բարեկամական կապը։

Իսկ ԼՀԿ խմբակցության պատգամավոր Արման Բաբաջանյանն էլ իր ելույթում ասաց, որ եթե հեղափոխությունն ընթանար հեղափոխության դասական կանոններով, Գարեգին Բաղրամյանն այստեղ չէր լինի, ուրիշ տեղ նստած կլիներ հավանաբար․

«Ես շատ ռիսկային եմ համարում Գարեգին Բաղրամյանի պաշտոնավարումը հանրային ծառայությունները կարգավորող հանձնաժողովում, առավել եւս՝ նախագահի պաշտոնում։ Մենք ամեն օր խոսում ենք նախկին քսանամյա ռեժիմի մասին եւ պետք է հասկանանք ու ընկալենք, որ մեր գնահատակնների հասցեատերերից մեկը նաեւ այս հանձնաժողովն է եւ այս հանձնաժողովում Գարեգին Բաղրամյանի նման պաշտոնյաները։ Այս հանձնաժողովի գործունեությունը չափազանց կարեւոր է մեր երկրում սակագնային քաղաքականության մշակման եւ կարգավորման տեսանկյունից։ Այն հատկապես կարեւոր է, եթե հաշվի առնենք, որ հանձնաժողովը կարգավորում է նաեւ բնական մենաշնորհներ ունեցող ոլորտների գործունեությունը։ Ավելի քան 2 տասնամյակ այս հանձնաժողովը եղել է գործադիր իշխանության կցորդը, եւ, ըստ էության, դակել է քաղաքական որոշումների արդյունքում կայացրած սակագնային որոշումները»,-ասաց Բաբաջանյանը՝ ապա դիմելով հանձնաժողովի նախագահի թեկնածու Գարեգին Բաղրամյանին՝ շարունակեց․

«Պարոն Բաղրամյան, դուք շուրջ 15 տարի կարեւոր պաշտոններ եք զբաղեցրել ՀԾԿ հանձնաժողովում։ Այդ ողջ ընթացքում մենք գեթ մեկ անգամ չենք լսել ձեր անկախ տեսակետը, մենք չենք լսել ձեր ցասումն ու անհամաձայնությունը այն ժամանակ, նույնիսկ երբ քաղաքացիներ էին դաժան ծեծի ենթարկվում Երեւանի փողոցներում ձեր իսկ կայացրած կամ հիմնավորած սակագների պատճառով։ 15 տարիների ձեր հնազանդ աշխատանքից հետո հիմա դուք կկարողանա՞ք այնպիսի կամային հատկանիշներ դրսեւորել, որ ամբողջությամբ կարողանաք անկախ գլխավորել այդ հանձնաժողովը եւ ձեր մասնագիտական կարծիքը պաշտպանել, եթե այն նույնական չլինի կառավարության կամ ներդրողների կարծիքի հետ»,-ասաց պատգամավորը՝ շեշտելով, որ ինքը շատ կասկածում է դրանում, քանի որ Բաղրամյանը ողջ պաշտոնավարման ընթացքում եղել է նախկին քրեաօլիգարխիկ համակարգի բուրգի անսասանությունն ու եկամուտներն ապահովող պաշտոնայներից մեկը, որը երբեւէ չի ընդվզել այդ ամենի դեմ եւ եղել է կոմֆորմիստ։

Գարեգին Բաղրամյանն իր եզրափակիչ ելույթում ասաց, որ հավաստիացնում է, որ պատգամավորների քվեն ստանալով՝ իր մասնագիտական բոլոր կարողությունները ի շահ է դնելու բոլոր սպառողների եւ տնտեսվարողների շահերի հավասարակշռմանը եւ այն գործառույթի իրականացմանը, որը օրենքով վերապահված է հանձնաժողովին։

Նշենք, որ ՀՀ հանրային ծառայությունները կարգավորող հանձնաժողովի ընտրությունը լինելու է փակ քվեարկությամբ։