2020 թվականից Հայաստանը կունենա նաեւ կանանց ֆուտբոլի ազգային հավաքական

Հայաստանում ֆուտբոլասեր աղջիկները քիչ չեն, սակայն կանանց ֆուտբոլը, կարելի է ասել, նոր-նոր է սկսում ստեղծվել: Հայաստանի ֆուտբոլի ֆեդերացիան այն ամուր հիմքերի վրա կանգնեցնելու մասին սկսեց խոսել 2018-ի սեպտեմբերին տեղի ունեցած ղեկավարության փոփոխությունից հետո: Այս առումով անելիքները շատ են. կանանց ֆուտբոլը պետք է ստեղծել գրեթե չեղած տեղից՝ այդ թվում ակումբներում ունենալ աղջիկ երեխաների, կանանց թիմեր, կազմակերպել նորմալ առաջնություններ, արտասահմանից հավաքականների համար հավաքագրել ազգությամբ հայ ֆուտբոլիստներին եւ իհարկե կոտրել կարծրատիպերը: Աշխատանքներով զբաղվում է ՀՖՖ կանանց ֆուտբոլի բաժնի պետ Աննա Թադեւոսյանը: Նա այս նպատակով մշտապես հանդիպումների մեջ է: «Հայկական ժամանակ»-ի հետ զրույցում Թադեւոսյանը պատմեց՝ ինչ է հասցրել անել 2018 թ. նոյեմբերին պաշտոնը ստանձնելուց հետո:

-Ի՞նչ փուլում են ազգային հավաքական կազմավորելու աշխատանքները:

-Կանանց ազգային հավաքականը կստեղծվի հաջորդ տարվա հունվար ամսից։ Այժմ ես աշխատում եմ տեղեկություն հավաքել արտասահմանում հանդես եկող հայ ֆուտբոլիստների մասին։ Կարծում եմ՝ մինչեւ այս տարվա դեկտեմբեր կունենամ նախնական ցուցակ:

Ձախից աջ՝ Աննա Թադեւոսյանը եւ Նենսի Ավետիսյանը

-Լուսանկարներ եք հրապարակել 2 ֆուտբոլիստների՝ Նենսի Ավետիսյանի ու Մարալ Արթինի հետ: Ի՞նչ կպատմեք նրանց մասին:

-Այո՛, Ֆրանկֆուրտում մասնակցում էի ՈՒԵՖԱ-ի սեմինարին եւ հանդիպեցի Մարալին, որին մասին գիտեի եւ արդեն խոսել էի ե՛ւ իր, ե՛ւ ծնողների հետ, շատ լավ առիթ էր հանդիպելու։ Մարալ Արթինը հանդես է գալիս «FFC Frankfurt» ակումբի երկրորդ թիմում։ Նա 19 տարեկան է, ենթահարձակվողի դիրքում է հանդես գալիս։ Նենսի Ավեսյանին հանդիպեցի Գլենդելում: Նա 29 տարեկան է եւ խաղում է «Santa Clarita Blue Hear» թիմում, որը հանդես է գալիս Unite Womens Soccer ազգային առաջնությունում։ Նենսին հարձակվողական ոճի կիսապաշտպան է:

Աննա Թադեւոսյանը եւ Մարալ Արթինը

-Այլ խաղացողների հետ հանդիպել կամ ազգային հավաքական հրավիրե՞լ եք:

-Հանդիպել եմ Կալիֆորնիայում մի շարք խաղացողների, որոնցից 6-ն արդեն հրավիրվել են մինչեւ 19 տարեկանների հավաքական, կմասնակցեն հունիսին կայանալիք հավաքին եւ Բելառուսի Մ19 տարեկանների հավաքականի դեմ ընկերական հանդիպումներին։ Հանդիպել եմ նաեւ մի շարք խաղացողների, որոնք կհամապատասխանեն Մ17 հավաքականին եւ շուտով կհրավիրվեն հավաքների Երեւանում։

-Հավաքականը միայն արտասահմանո՞ւմ ապրող հայերով է կազմված լինելու:

-Բոլոր հավաքականները կլինեն բալանսավորված։ Կլինեն ե՛ւ արտասահմանում հանդես եկող ֆուտբոլիստներ, ե՛ւ իհարկե Հայաստանի առաջնություններում հանդես եկող։ Մեր նպատակն է լավագույնս օգտագործել արտասահմանում խաղացող մեր հայրենակիցների ներուժը։

-Ե՞րբ է հավաքականը սկսելու գործել:

-Ինչպես արդեն նշեցի, ազգային հավաքականը կստեղծվի 2020 թ. հունվար ամսից։ Հաջորդ տարի նախատեսվում է անցկագնել մի քանի հավաքներ տարբեր ֆորմատներով, ինչպես նաեւ միջազգային ընկերական խաղեր։ Իսկ 2021 թ. արդեն կմասնակցենք աշխարհի 2023 թ. առաջնության որակավորման փուլին։

-Ո՞վ է լինելու գլխավոր մարզիչը:

-Դեռ չգիտենք՝ ով կլինի ազգային հավաքականի մարզիչը, բայց անընդհատ խորհրդակցում եմ պարոն Խինեսի հետ (խմբ. ՀՖՖ տեխնիկական տնօրեն Խինես Մելենդես): Դեռ ահագին ժամանակ ունենք մտածելու դրա մասին։

-Ի՞նչ փուլում են մյուս տարիքների հավաքականների ստեղծման աշխատանքները:

-Մ19 տարեկանների հավաքականը փետրվար ամսից սկսած արդեն անցկացնում են հավաքներ։ Նախապատրասվում է հոկտեմբերին Բոսնիայում կայանալիք Եվրո 2020-ի որակավորման փուլին։ Մ17 տարեկանների հավաքականը կձեւավորվի այս տարվա սեպտեմբերից եւ կսկսի ամենամսյա հավաքները։

-Հայտնի է, որ հայկական ակումբները պետք է աղջիկների թիմեր ունենան, ի՞նչ փուլում է այս ծրագիրը:

-Արդեն 2019-2020 մրցաշրջանից բոլոր ակումբները լիցենզավորում ստնալու համար պետք է ունենան կանանց թիմեր։ Բոլոր ակումբներն արդեն տեղեկացված են, եւ կարծում եմ՝ շուտով կսկսեն արդեն ստեղծել իրենց կանանց թիմերը։

-Ընդհանրապես ո՞ւր է հասել հայկական կանանց ֆուտբոլը ու ի՞նչ հեռանկարներ կան:

-Դեռ ոչ մի տեղ չի հասել, սակայն իմ նշանակվելուց հետո մենք շատ ակտիվ եւ ինտենսիվ աշխատանքներ ենք տանում՝ փոխելու եւ զարգացնելու կանանց ֆուտբոլը։ Իհարկե կան բարդություններ, բայց բոլորն էլ հաղթահարելի է։ Արդեն հաջորդ մրցաշրջանից կունենանք ավելի որակով առաջնություն՝ նոր կանոնակարգով, նոր տարիքային խմբերով։ Կանցկացնենք նաեւ ֆուտզալի առաջնություն եւ Մ12 տարեկանների մրցաշար։ Ես կարծում եմ, որ ճիշտ եւ շարունակական աշխատանքի արդյունքում մի քանի տարուց մենք կունենանք լավ առաջնություն եւ մարտունակ չեմպիոն, որը կկարողանա հանդես գալ Չեմպիոնների լիգայում։ Հիմա Հայաստանում կան Ա եւ Բ լիգաներ: Ա լիգայի թիմերը մի փոքր ավելի ուժեղ են: Առաջնություններն ավարտվում են ապրիլի վերջին: Առաջին անգամ անցկացվելու է նաեւ Հայաստանի կանանց գավաթի խաղարկություն: Կմեկնարկի մայիսին:

-Ֆուտբոլը հիմնականում համարվում է, որ, այսպես ասած, աղջիկներին հարիր սպորտաձեւ չէ:

-Ես չեմ կարծում, որ ֆուտբոլը միայն տղաների խաղ է։ Ֆուտբոլը, ինչպեսեւ մնացած բոլոր սպորտաձեւերը, հավասարապես բոլոր սեռերի սպորտ է։ 2016 թ., երբ մենք ստեղծում էինք մեր «Հայ աղջիկների առաջնորդությունը ֆուտբոլում» (GOALS) հասարակական կազմակերպությունը խաղաղության կորպուսի կամավորների հետ, բոլորն ասում էին, որ չի ստացվի, Հայաստանում ծնողները չեն թողնի, որպեսզի աղջիկները խաղան ֆուտբոլ, սակայն հիմա մենք ունենք ֆուտզալի առաջնություններ Հայաստանի ութ մարզերում, ավելի քան 50 թիմեր եւ մոտ 650 աղջիկ, որոնք մեծ ուրախությամբ են խաղում։ Մեզ հաջողվեց որոշ չափով կոտրել կարծրատիպերը: Դեռ, իհարկե, շատ աշխատանք կա այդ առումով, սակայն մենք պատրաստ ենք եւ գիտենք՝ ինչ քայլեր պետք է անել դրա համար։ Ֆուտբոլը նախեւառաջ առողջ ապրեալակերպ է, երկրորդն էլ՝ գյուղերում ապրող երեխաների համար երկու ժամով իրենց առօրյա հոգսերից կտրվելու առիթ։ Ասեմ նաեւ, որ սպորտով զբաղվող երեխաները հետագայում շատ ավելի վստահ են իրենց զգում կյանքում եւ հասնում բարձունքների։ 

Տպել
1932 դիտում

Փաստաբան Ալեքսանդր Սիրունյանը Քոչարյանի գործով դատավորի դեմ հանցագործության մասին հաղորդում է ներկայացրել

Կալիֆորնիայի նահանգային սենատը Հայաստանի հետ առևտրային ներկայացուցչություն բացելու օրինագիծ է ընդունել

Ծանոթանալու են Հայաստանի զբոսաշրջային հնարավորություններին, կատարելու նկարահանումներ. շվեյցարացի լրագրողներ են եկել ՀՀ

Բռնցքամարտի ընտրանու մարզիկները պատրաստ են բոյկոտել Եվրոպական խաղերը, խնդրում են վարչապետի օգնությունը

Քաղաքացիական հասարակության հետագա զարգացումը մեզ համար սկզբունքային նշանակություն ունի. Արարատ Միրզոյան

Մուննաթը՝ ավագանու անդամների վրա, թե ինչու ժամկետը չեն երկարացնում, շատ տարօրինակ է. Զաքարյանը՝ Թոխատյանի մասին

Թոշակ նշանակելիս զինծառայության ստաժում կրկնակի չափով կհաշվվի շփման գծում մարտական հերթապահության ժամանակը

Զարուհի Մեջլումյանը ամուսնուն ներում շնորհելու եւ ազատ արձակելու պահանջով ակցիա էր իրականացնում

Հայտարարություն մրցույթի մասին

Երբեւէ հեղափոխությամբ կամ հակահեղափոխությամբ չեմ զբաղվել. Սամվել Կարապետյան (Օգանովսկի)

Հայ բռնցքամարտիկների մասնակցությունը Եվրոպական խաղերին վտանգված է սկանդալի պատճառով

ԵՊՀ ռեկտոր Արամ Սիմոնյանը հրաժարական տվեց

Ռոբերտ Քոչարյանի կալանքը փոփոխելուց հետո դատավոր Դավիթ Գրիգորյանը ոստիկանների ուղեկցությամբ է շրջում

Քրեական հեղինակություն Դոն Պիպո մականունով հայտնի Արթուր Ասատրյանի գործով նախաքննությունն ավարտվել է

ԲԴԽ-ի հրաժարականից հետո 200 դատավորին հեռացնելը խաղուպար է լինելու ժողովրդի համար. Ստյոպա Սաֆարյան

ԲԴԽ անդամը 5 անշարժ գույք, 2 ավտոմեքենա եւ 8 մլն դրամը գերազանցող ոսկեղեն եւ ժամացույց ունի

Պուտինն ու Լուկաշենկոն կարող են քննարկել Բելառուսին նավթի մատակարարման հարցը. Պեսկով

Մոսկվայում տեղի են ունեցել խորհրդակցություններ ՀՀ և ՌԴ արտաքին գործերի նախարարությունների միջև

Կա երրորդ փուլի անհրաժեշտություն․ Արմեն Գրիգորյանը՝ դատական համակարգում հեղափոխություն անելու մասին

Հայաստանի և Ջիբութիի միջև հաստատվեցին դիվանագիտական հարաբերություններ. ԱԳՆ