«Սասստեքս»-ում իրավիճակ է փոխվել. դժգոհ աշխատակիցներն այլեւս չեն խոսում լրագրողների հետ (լուսանկարներ, տեսանյութ)

23/07/2019 schedule18:36

Գյումրու «Սասստեքս» կարի ֆաբրիկան այսօր երկար սպասված հյուր ուներ: Արդեն երկու ամիս հարկադիր պարապուրդում գտնվող աշխատակիցներին առավոտյան զանգել, կանչել էին ժողովի, որը հրավիրել էր գործարանի սեփականատեր Քրիստիան Գելիջին: 

Թե ներսում Գելիջին ինչ էր խոսել աշխատակիցների հետ, այդպես էլ պարզ չեղավ, քանի որ նախկինում բոլոր այն աշխատակիցները, որոնք մշտապես բողոքում էին իրենց նկատմամբ գործադրվող ճնշումներից եւ աշխատանքային վատ պայմաններից, այսօր արտասովոր վարք դրսեւորեցին: Ընդհանրապես չխոսեցին ոչնչի մասին:

Ժողովը, ենթադրելի է՝ բոլորի համար չէ, որ նորմալ ընթացք ուներ: Ժամանակ առ ժամանակ գործարանի շենքից մեկ-երկու աշխատակից էր դուրս գալիս, դեմքի ծայրահեղ լարված արտահայտությամբ, աչքերում էլ՝ արցունքներ: Լրագրողների հարցերին որեւէ մեկը չէր պատասխանում: Կամ լուռ եւ արագ հեռանում էին, կամ կցկտուր ասում, որ ամեն ինչ կարգին է:

Երկու աշխատակից ասացին, որ հեռանում են՝ չվերադառնալու պայմանով: Աշխատանքից ազատման դիմում են գրել, սակայն տնօրինությունը չի ստորագրել դիմումները: Անկախ այդ հանգամանքից, կանայք որոշել են չաշխատել, քանի որ, ըստ իրենց, նոր պայմանների հետ համաձայն չեն:

Ժամեր շարունակ գործարանի բակում կանգնելուց հետո կարողացանք ճշտել, որ Քրիստիան Գելիջին ժողովի ժամանակ ինչ-որ նորություն է առաջարկել աշխատակիցներին, սակայն մեկ պայմանով: Այն է` գործարանի պատերից դուրս չբերել այն խոսակցությունը, որն ընթանում է, ժողովի պահին ասված ոչինչ դրսում չքննարկել:

Այսինքն, աշխատակիցների տարօրինակ վարքը հենց դրանով էլ կարելի է պայմանավորել: 

Քրիստիան Գելիջին հրահանգել էր լրագրողներին գործարանի բակ անգամ ներս չթողնել: Ինքը եւս չեկավ հանդիպման՝ անկախ մեր պնդումներից: Փոխարենը որոշակի զրույց ստացվեց Ներսես Տասչյանի հետ, որն այսօր եւս ներկայացավ որպես գործարանի շինարարության պատասխանատու, սակայն պատասխանեց աշխատակիցների եւ տնօրինության հետ կապված մի քանի հարցի:Ի դեպ, նա գործարանի շենքից դուրս եկավ աշխատակիցների հիմնական խմբի հետ եւ ուշադիր հետեւում էր ե՛ւ լրագրողներին ե՛ւ իրենց աշխատակիցներին: Այդ պարագայում, հասկանալի է, որ մեծ ցանկության դեպքում անգամ որեւէ մեկը ոչ կբողոքեր, ոչ էլ կպատմեր, թե ինչ է կատարվել ներսում, եւ ինչի համար էին իրենց գործընկերները լարված ու զայրացած հեռանում ժողովից: Ինչու՞ եք աշխատակիցներին հրահանգել, որ դրսում ոչինչ չխոսեն, հարցին, Ներսես Տասչյանը պատասխանեց` սուտ է, նման բան չի եղել:«Մենք արդար, մաքուր ենք: Իմ կարծիքով՝ ոչ մեկն էլ դժգոհ չէ մեզնից: Շատ լավ պայմաններ ենք առաջարկել, շեֆը եկավ, ամեն բան խոսեց, ամեն մարդ հասկացավ ամեն բան: Ոչ մի բան չփոխեցինք, կարգավորեցինք տեխնոլոգ-վարպետներով: Էս մարդիկ ուզում էին գիտնալ, թե ամսու կեսին ինչքան են ստանալու, կարգավորեցինք»,-ասաց Ներսեսը:

Նաեւ ընդգծեց, որ իրենք արդեն հասկացել են, որ «օրենքեն վերեւ բան մը չկա»:

Ինչու՞ աշխատանքից ազատման դիմում գրածներին չեք ազատում աշխատանքից, ՀԺ-ի հարցին Ներսեսը նախ պատասխանեց, թե չկա նման բան: Եթե դիմում գրեն` կազատեն: Հետո էլ ասաց` իրավունք չունեն: Պայմանագրով էլ է դա ֆիքսված: «Իրենք որ երեք ամիս սովորել են, ուսումնարան որ ղրկել ենք, պայմանի մեջ գրած է, որ ինքը մի տարուց ավել իրավունք չունի դուրս գա: Երեւի էդ տեսակ հարց է, ես չգիտեմ՝ կադրային հարցը ոնց է»:

Մայիսին տասը հազար դրամ աշխատավարձ ստացող է եղել, դա ինչ թիվ է, եւ ինչի դիմաց են ստացել նման աշխատավարձ, հարցին Տասչյանը պատասխանեց` չկան նման մարդիկ: Բայց հետո կրկին հստակություն մտցրեց`«Մայիսին ստացող եղել է, դրա մեջը արձակուրդն էլ մտած է իրենց հաշվին եւ մեր հաշվին: Կպահպանվի նվազագույն աշխատավարձը, դրան կավելանա իրենց աշխատածը»:

Աշխատանքի տեսչությունը արձանագրել էր օդափոխության խնդիր: Լուծվե՞լ է արդյոք այդ հարցը: Տասչյանն ասաց` չեք տեսնում, պատուհանները բացել ենք: Հով է: Այսինքն, այլ տարբերակ դեռեւս չեն մշակել: Օդափոխության համակարգը դեռեւս բնական է: Պատուհանները բացում են, օդափոխում են: Մեկ-երկու ամսից, սակայն, նման հնարավորություն չեն ունենա: Ձմռան ամիսներին՝ եւս: Այս պահին, փաստորեն, սա որպես խնդիր չի դիտարկվում:

Ներսեսի հետ գործարանից դուրս եկած աշխատակիցներն ասացին՝ լավ է լինելու, բայց թե ինչն է փոխվելու` դեռ իրենք էլ չգիտեն:

Տպել
810 դիտում

Հայաստան է այցելել ԱՄՆ Կանզաս նահանգի ազգային գվարդիայի պատվիրակությունը

Տիգրան Մանսուրյանի 80-ամյա հոբելյանին նվիրված «Մաեստրո Մանսուրյան» խորագրով համերգաշար կանցկացվի Երևանում

Դժվար է 37-ում շարունակել լինել ինքնուրույն ու մնալ միայնակ` չգնալով կոմպրոմիսի. Նազենի Հովհաննիսյան

Կոտայքում մեքենան ընկել է ձորը. հայտնաբերվել է ուղեւորներից մեկի՝ ՌԴ քաղաքացու մոխրացած դին

Ունենք ոստիկանություն, որը գործում է քաղաքական նպատակահարմարության սկզբունքից ելնելով․ Միքայել Նահապետյան

ԱԻ նախարարն արտահերթ նիստ է հրավիրել. հրդեհների թիվը կտրուկ աճել է

Արթուր Գրիգորյանն ու Հայկ Մարտիրոսյանը ֆեյսբուքյան գրառումների վերաբերյալ բացատրություն են տվել. դատախազություն

Երկու երիտասարդի դանակահարության դեպքը բացահայտվել է. 32-ամյա տղամարդը խոստովանել է

Սեբաստիայի Սբ. Գևորգ հայկական եկեղեցու վերակառուցման աշխատանքներ են նախատեսվում

Սյունիքում մոտ 10 հա բուսածածկույթ է հրդեհվել. տեղում աշխատում է 30 հրշեջ-փրկարար, 10 քաղաքացի

Իսահակյան փողոցի՝ Մաշտոց-Բաղրամյան պողոտաների միջև ընկած հատվածը վաղը փակ կլինի

Գեղարքունիքի Ծովակ գյուղում առանձնապես խոշոր չափերի յուրացման դեպք է բացահայտվել. վնասը՝ 18,4 մլն դրամ

Ադրբեջանում հայտնաբերվել է մոտ մեկ ամիս առաջ կործանված ՄիԳ-29-ի օդաչուի մարմինը

Ամեն օր սովորել և ինքնազարգանալ. «Քայլ դեպի տուն» ծրագրի հյուրն էր Մխիթար Հայրապետյանը

Հրշեջ-փրկարարները մարել են ավտոմեքենայում բռնկված հրդեհը

Ոչ շտապբուժօգնությանը վերաբերող կանչերը պետք է ուղղորդվեն դեպի պոլիկլինիկաներ. Արսեն Թորոսյան

Բակո Սահակյանը հանդիպել է ԵԱՀԿ գործող նախագահի անձնական ներկայացուցչի հետ

Գյումրիի բնակարաններից մեկում հայտնաբերվել է բնակչի դին

Հայաստանում Սիբիրյան խոցի դեպք է արձանագրվել. վարակվել է Գեղհովիտ համայնքի 2 բնակիչ

ՊԵԿ-ի դիմաց բողոքի ցույց իրականացրած քաղաքացու ապրանքը չի մաքսազերծվել, քրգործ է հարուցվել. ՊԵԿ