Բռնցքամարտիկ Արամ Ավագյանը պայմանագիր է կնքել ամերիկյան ընկերության հետ. կմարզվի աշխարհահռչակ Թայսոն Ֆյուրիի մարզչի հետ

Պրոֆեսիոնալ բռնցքամարտիկ Արամ Ավագյանը պայմանագիր է կնքել ամերիկյան Salita Promotions պրոմոութերական ընկերության հետ: Այս մասին մարզիկը նշեց լրագրողների հետ հանդիպման ժամանակ: Ավագյանը շեշտում է, որ Salita Promotions-ը բավական հաջողակ կազմակերպություն է:

«Այն գլխավորում է հենց Դմիտրի Սալիտան: Նա նախկինում բռնցքամարտիկ է եղել՝ աշխարհի գոտու համար մենամարտած: Լավ, հարուստ պատկերացում ունի բռնցքամարտի մասին: Ունի բռնցքամարտիկներ, որոնք ներկայումս աշխարհի չեմպիոն են, ունի նաեւ բռնցքամարտիկներ, որոնք այդ ճանապարհին են: Կաշխատեմ, կտեսնեմ, բարձր եմ գնահատում այդ կազմակերպության թե՛ պայմանագիրը, թե՛ քայլերը, որ հետագայում պետք է լինեն»,- ասում է նա:

Նոր պրոմոութերական ընկերությունն արդեն մենամարտ է կազմակերպել Արամ Ավագյանի համար: Նրա մրցակիցը լինելու է դոմինիկացի Դագուվերտո Ագուերոն, որը 15 մենամարտ է անցկացրել պրոֆեսիոնալ ռինգում եւ նույնքան հաղթանակ է տարել: Ավագյանը, որը պրոֆեսիոնալ բռնցքամարտում 9 հաղթանակ եւ 1 ոչ-ոքի ունի, ուսումնասիրել է մրցակցին:

«Տեխնիկապես բավականին զարգացած բռնցքամարտիկ է: Ունի նաեւ սիրողական բռնցքամարտի հարուստ պատմություն: Ինչեւէ, ռինգը ցույց կտա»,- ասում է նա:

Մենամարտը կայանալու է ԱՄՆ-ում՝ Դետրոյթում: Մինչեւ այդ Ավագյանը մարզվելու է այնտեղ: Պատրաստվելու է տեղի մարզիչներից մեկի գլխավորությամբ, որը բրիտանացի հայտնի բռնցքամարտիկ Թայսոն Ֆյուրիի մարզիչն է:

Արամ Ավագյանն իր նախկին պրոմոութերական ընկերության Punch Boxing Promotions-ի հետ համագործակցության ընթացքում գոտի էր նվաճել՝ WBC International Silver: Այս գոտուց հրաժարվել է, քանի որ գոտու մենամարտեր կազմակերպելը մեծ ծախսեր է պահանջում, որն իրեն չէր կարող թույլ տալ: Հույս ունի, որ նոր ընկերության հետ մի քանի հաջող մենամարտերից հետո կրկին գոտու մենամարտ կանցկացնի:

Ինչ վերաբերում է Punch Boxing Promotions-ի հետ համատեղ աշխատանքին, Ավագյանը նշում է, որ ոչ մի տարաձայնություն չի եղել: Պարզապես 2 կողմերը որոշել են, որ իրենց այլ շարունակություն է պետք: