«Շատ լավ ստացվեց, ավելի, քան հեռավարը»․ Արցախի դաշտային դասերին նույնիսկ անձրեւը չի խանգարում

Արցախի Մարտունու շրջանի Վարանդա գյուղում Մարիամի ու Հեղինեի դասերն առավոտյան ոչ թե հեռախոսի առաջ են սկսվում, այլ դպրոցի բակում՝ դաշտային տարբերակով։ Ստեփանակերտից 30 կմ հեռավորության վրա գտնվող այս գյուղի կրթական հաստատությունում՝ Հաղորտիի միջնակարգ դպրոցի Վարանդայի մասնաճյուղում, դասերի կազմակերպման այլ ձեւ են գտել․ հեռավարի փոխարեն՝ դաշտային դասարան։

Եղանակը լավն է, անձրեւ չի գալիս, ուրեմն՝ խանգարող հանգամանքներ չկան։ Սեղաններն ու աթոռներն էլ իրարից հեռու են՝ պահպանելով սոցիալական հեռավորություն։

Գյուղի դպրոցի 20 աշակերտներին 9 ուսուցիչ է դասավանդում։ Նրանց մի մասն ապրում է հաստատության հարեւանությամբ եւ ամեն առավոտ դպրոցի հարակից բաց տարածքում սկսվում է դասը։ 

Հեռավար դասերից ամբողջովին չեն հրաժարվել․ կան ուսուցիչներ, որ այլ գյուղից են, եթե կապի խնդիր չի լինում, այդ առարկաներն առցանց են պարապում։

5-րդ դասարանցի Մարիամը գոհ է դասերն այսպես սովորելուց։ «Անգլերենն օնլայն ենք պարապում, ռուսերենը գալիս ենք դաշտային դասարան»,- այդ օրվա դասից մի փոքր բացակայելով՝ պատմեց նա։

Իր հետ դասարանում եւս 4 աշակերտ է սովորում։

Մնացած հարցերին արդեն տարեկից Հեղինեն է պատասխանում․ հավանել է դաշտային դասերը։ Գրատախտակի եւ այլ պարագաների բացակայությունն էլ խնդիր չէ․ ուսուցիչն ասում է՝ ինչպես անեն, իրենք էլ կարողանում են։ «Այսպես էլ լավ է, այնպես էլ (խոսքը հեռավարի մասին է), բայց որ կապ չկա, չենք կարողանում պարապել»։

Դժվարությունները հաղթահարում են բոլորով

Երբ փակվել են դպրոցները, սկսել են մտածել դաշտային դասարանի մասին։ Ինչպես դպրոցի տնօրեն Նաիրա Ուլուբաբյանը նշեց, գյուղում բոլոր դպրոցականները չէ, որ խելախոս կամ համակարգիչ ունեն, շատերի տանը մի քանի աշակերտ կա, բացի այդ միշտ չէ, որ կապը լավն է լինում։ Օրինակ՝ մեր զրույցի նախորդ օրը համացանց ընդհանրապես չի եղել, այդ դասը պետք է մյուս անգամ լրացնեն։

«Բոլորս էլ գիտենք, որ պատրաստ չէինք: Այս հիվանդությունը մեզնից չի հարցրել, նոր եկել։ Իսկ մինչ այդ երեխաներին չէինք թողում հեռախոսով գալ դպրոց կամ ընդհանրապես գյուղի աշակերտներն այդ թանկարժեք հաճույքից չեն կարողանում օգտվել»,- պատմեց Ուլուբաբյանը։

Սարքեր ստանալու համար՝ Արցախի Հանրապետության կրթության, գիտության եւ սպորտի նախարարություն բազմիցս դիմել են, բացասական պատասխան չեն ստացել, սակայն դեռ հերթի մեջ են։ Մանկավարժներով խորհրդակցել են, խոսել ծնողների հետ, որոշել չսպասել մինչ հերթն իրենց հասնի։ Սկզբում փայտից մեծ կոճղեր են շարել, հետո դրանք փոխարինել նստարաններով։

Տնօրենը սկզբում վախեցել է՝ մտածել, միգուցե ճիշտ չեն անում, խոսել է կրթության բաժնի վարիչի հետ, հետո արդեն բաժնի ղեկավարն է դասալսման եկել ու իր հավանությունը տվել։ «Պատկերացրեք՝ շատ լավ ստացվեց, ավելի, քան հեռավարը»,- ասաց Ն․ Ուլուբաբյանը։

Հիմա, ճիշտ է, դժվարություններ կան, սակայն հաղթահարում են բոլորով։ Պարապում են, որ արձակուրդներին դասերը լրացնելու կարիք չլինի. Գյուղ տեղ է, որպեսզի երեխաները կարողանան ամառային արձակուրդներին իրենց ծնողներին օգնել»։

Չնախատեսված անձրեւը չի կարող խանգարել

Վատ եղանակները դաշտային դասարանի համար խնդիր չեն դառնում։ Դասաժամերն աշակերտների հետ նախորդ օրն են որոշում։ «Նայում ենք՝ եղանակը վաղն ինչպես է լինելու: Եթե տեսնում ենք, որ ժամը 12։00-ին փոխվելու է կամ շատ արեւոտ օրեր են, ավելի վաղ՝ առավոտ շուտ ենք սկսում մեր աշխատանքները, որպեսզի երեխաներն արեւի տակ շատ չմնան»,- պատմեց տնօրենը։

Ծնողների հետ նույնպես կապի մեջ են, որպեսզի եթե 100 %-ով չէ, գոնե 90 %-ով կարողանան աշխատանքներն անել։

Եթե հանկարծ դասի ժամանակ չնախատեսված անձրեւ է սկսվում, արագ բաժանվում են 3 փոքր խմբերի։ Հարեւանությամբ ապրող 3 ուսուցիչները դասը շարունակում են պատշգամբներում, որտեղ իրարից հեռու, ծածկի տակ դրված են աթոռները։ Այդպես, սակայն, հազվադեպ է լինում։

Ֆիզկուլտուրայի դասերը նույն հաճախականությամբ չեն անցկացվում․ մարզիչն այլ գյուղից է, ոչ միշտ է կարողանում գալ։ Դասերին փորձում են ֆիզկուլտ դադարներ տալ, որ լիցքաթափվեն դպրոցականները։

ԱՀ կրթության, գիտության, սպորտի նախարարի մամուլի քարտուղարի տեղեկացմամբ՝ որոշ ժամանակ առաջ նախարարը նշել էր, որ գյուղերում կարող են նման կերպ իրականացնել դասեր։ Այս դպրոցն էլ որոշել է հետեւել օրինակին։ Նրա խոսքով՝ նման դպրոցներ էլի կան Արցախում, 2 շաբաթ առաջ էլ Վերին Հոռաթաղի դպրոցի ուսուցչի ու նրա աշակերտի լուսանկարներն էին տարածվել համացանցում, երբ դասն անցկացվում էր ցանկապատի տարբեր կողմերում:

Լուսանկարները ԱՀ ԿԳՍՆ ֆեյսբուքյան էջից

Տպել
1275 դիտում

Ներկայացված պահանջը դուրս էր ՄԻԵԴ-ի իրավասությունից, երկրի ներքին գործերին միջամտելու շեմին է մոտենում․ Եղիշե Կիրակոսյան

Եվրոպայում կորոնավիրուսն անխնա հարվածել է ծերանոցներին. կառավարությունները մեղադրանքի թիրախում են

Ցանցի վերականգնման աշխատանքները շարունակվում են. «ՅՈՒՔՈՄ»-ը հայցում է բաժանորդների ներողամտությունը

Ստեփան Քարտաշյանը նշանակվել է Հանրապետության նախագահի ռեֆերենտ

Մարտունիում կհիմնանորոգվեն 4 մանկապարտեզների շենքեր

Թրամփից հիասթափվելու, կորոնավիրուսով վարակվելու և նախագահի թեկնածու դառնալու մասին. Քանյե Ուեսթի հարցազրույցը՝ Forbes-ին

Տավուշի մարզպետը 2019-ին վաճառել է իր ավտոմեքենան․ որքան եկամուտ է նա ստացել նույն տարում

Բնակարանային պայմանների բարելավման նպատակով Շուշիին լրացուցիչ 25 մլն ՀՀ դրամ կհատկացվի

Հավանության է արժանացել Վայոց ձորի մարզից ներկայացված սուբվենցիոն 24 ծրագիր

Հրաչյա Թաշչյանը նշանակվել է վարչապետի աշխատակազմի արտաքին կապերի վարչության պետ

Ձեռնարկվում են քայլեր Նիժնի Նովգորոդի օտարերկրացիների ժամանակավոր պահման կենտրոնում գտնվող հայերի ՀՀ վերադարձի համար

Երթևեկության կազմակերպման փոփոխություն կկատարվի Երևանի Անտառային փողոցի Լեռ Կամսար և Սարմենի փողոցների հատվածում

Կհիմնանորոգվի Ծաղկուտի համայնքային կենտրոնը

114 դպրոցի տնօրենը դատի է տվել ԿԳՄՍ նախարարությանը․ պահանջում է անվավեր ճանաչել նախարարի հայտարարած խիստ նկատողությունը

Մեծ Մասրիկում կլուսավորվի 7 փողոց

Հեռավար դասերի լավ կողմերից է ստեղծագործական ազատությունը, վատերից՝ խիտ դասացուցակը և ծնողների անհարկի միջամտությունները

Գյումրու տուն-ինտերնատի ևս 2 խնամյալ է հիվանդանոցում մահացել. կորոնավիրուսի նոր դեպքեր հաստատությունում չեն հայտնաբերվել

Տրդատ Սարգսյանը նշանակվել է «Քաղաքացիական պայմանագիր» կուսակցության աշխատակազմի ղեկավար

Կվերանորոգվի Առատաշեն համայնքի մանկապարտեզի երկրորդ մասնաշենքը. սաների թիվը կավելանա 40-ով

ՀՀ տարածքում ավտոճանապարհներն անցանելի են