«Հուղարկավորությունների, հոգեհանգիստների ժամանակ պարետատան սահմանած կանոնների չպահպանումը շատ լուրջ խնդիր է դառնում»

Պետք է արձանագրել, որ մեր նպատակադրումն ու ռազմավարությունը հետեւյալն է. անընդհատ խստացնել եւ ապահովել հակահամաճարակային կանոնների պահպանումը հանրության շրջանում. մենք դա ենք դիտում կորոնավիրուսի համավարակի թվերի անկման հիմնական միջոց։ Այս մասին այսօր ՀՀ Կառավարության նիստում հայտարարեց վարչապետ Նիկոլ Փաշինյանը։

«Ընդ որում, ուզում եմ ընդգծել, որ այսօրվա մեր, ենթադրենք, 100 տոկոսանոց կարգապահությունն իր կոնկրետ թվերով արտահայտվելու է ամենաշուտը 1 շաբաթ հետո, այսինքն՝ այսօր մենք տեսնում ենք մեր 1 շաբաթ առաջվա կարգապահության մակարդակը։ Եվ էլի ուզում եմ մեր բոլոր քաղաքացիներին կոչ անել, որ ճշգրտորեն պահեն հակահամաճարակային կանոնները, որոնք մենք հնարավորինս պարզ ձեւակերպել ենք՝ կրել դիմակ, ախտահանել ձեռքերը եւ պահպանել սոցիալական հեռավորություն։ Փորձը ցույց է տալիս, որ այս կանոնների պահպանումը բերում է գրեթե 100 տոկոսանոց արդյունքի, այսինքն՝ վարակման դեպքերի 95 տոկոսը կա՛մ դիմակ չի կրել, կա՛մ սոցիալական հեռավորություն չի պահպանել, կա՛մ ձեռքերը չի ախատահանել, կա՛մ՝ երեքը միասին»,- ասաց վարչապետը։

Նա բոլորի ուշադրությունը հրավիրեց, որ վերջին շրջանում իրենց համար շատ լուրջ խնդիր են դառնում հուղարկավորությունների, հոգեհանգիստների ժամանակ պարետատան սահմանած կանոնների չպահպանումը։

«Այստեղ շատ կարեւոր դեր ունի ոչ մի ոստիկանությունը, այլեւ տեղական ինքնակառավարման մարմինները, համայնքները, որոնք ամեն նման դեպքում պետք է կարողանան հաղորդակցության մեջ մտնել քաղաքացիների հետ՝ ներկայացնելով իրավիճակի ողջ բարդությունը եւ այս իրավիճակում հակահամաճարակային կանոնների պահպանման անհրաժեշտությունը։ Մենք արդեն բազմաթիվ դեպքեր ենք ունենում, երբ վարակի տարածման պատճառը հուղարկավորությունների եւ հոգեհանգստյան արարողությունների ժամանակ հակամահաճարակային կանոնները չպահպանելն է։ Հաջորդ խնդիրը, այսպես ասած, ընդհատակյա հարսանիքներն են։ Շատ կարեւոր է, որ մեր սիրելի հայրենակիցները չափազանց լուրջ մոտենան խնդրին»,- նշեց Նիկոլ Փաշինյանը։

Վարչապետն ընդգծեց՝ իրենց գաղափարախոսությունը հետեւյալն է. այս խնդիրը հնարավոր է լուծել Կառավարության եւ քաղաքացիների միջեւ զանգվածային հաղորդակցության միջոցով։

«Մեր Կառավարությունը ձեւավորվել է քաղաքական հարթակի եւ քաղաքացիների զանգվածային համագործակցության շնորհիվ։ Սա մի գաղափարախոսություն է, որն ընկած է մեր քաղաքական գործունեության հիմքում, եւ մենք բոլոր այն մակրոխնդիրները, որ լուծել ենք, այն մակրոխնդիրները, որ պիտի լուծենք, բոլոր դեպքերում այդ խնդիրների հիմքում ընկած է լինելու նույն բանաձեւը՝ Կառավարության եւ քաղաքացիների զանգվածային համագործակցությունը։ Հետեւաբար այս իրավիճակում Կառավարության եւ քաղաքացիների զանգվածային համագործակությունը պետք է արտահայտվի հակամահաճարակային կանոնների արդյունավետ սահմանմամբ եւ այդ կանոնների ճշգրիտ պահպանմամբ»,- նշեց նա։

Նիկոլ Փաշինյանն ասաց, որ անհրաժեշտության դեպքում պետք է կիրառվեն նաեւ վարչական մեթոդներ, պետք է կիրառվեն նաեւ պատժիչ գործողություններ։

«Բայց ես էլի շարունակում եմ ասել, որ այդ վարչական գործողությունները կարող են լինել արդյունավետ, երբ վարչական հարկադրանքի ենթակա գործողությունը կատարում է հանրության 10, մաքսիմում՝ 20 տոկոսը, բայց եթե այդ գործողությունն անցնում է 20 տոկոսի շեմը՝ 30, 40 տոկոս, աշխարհում չկա որեւէ վարչական մարմին, որ կարողանա այդ մեթոդով հսկողության տակ պահել իրավիճակը։ Իհարկե, մենք տեսնում ենք նաեւ, որ կա դինամիկա, ակնհայտ է դա, բայց մենք էլի հավատում ենք, որ այդ դինամիկան ոչ միայն վարչական միջոցների արդյունք է, այլեւ քաղաքացիների հետ մեր շարունակական, հետեւողական անհոգնել երկխոսության։ Մենք այդ երկխոսությունը շարունակելու ենք անընդհատ, քանի դեռ այս խնդիրը լուծված չէ։ Էլի ուզում եմ ընդգծել, որ մեր հայեցակարգի մյուս կարեւոր հարցը հետեւյալն է՝ ճգնաժամը, որպես հնարավորություն օգտագործելով, հասնել ավելի խոր եւ բովանդակային փոփոխությունների։ Եվ մեր խնդիրն է նաեւ այս համավարակի հաղթահարման արդյունքում հասնել, այդ թվում՝ քաղաքակրթական մակարդակի փոփոխությունների, որը կարտահայտվի մեր հանրության ամենօրյա կյանքում»,- ասաց վարչապետը։