Պատճառ եւ հետեւանք․ Հայաստանում կարանտինը երկարաձգվեց՝ չնայած գործարարների դժգոհությանը

Հայաստանում կարանտինային ռեժիմը երկարաձգվեց՝ չնայած դրան նախորդած որոշակի դժգոհություններին ու անհամաձայնություններին, որոնք հնչում էին հիմնականում գործարարների ու տնտեսության ոլորտի այլ ներկայացուցիչների, այդ թվում՝ էկոնոմիկայի նախարար Վահան Քերոբյանի կողմից։

Առողջապահության նախարարության առաջարկով՝ երկրում կորոնավիրուսային հիվանդության տարածման ռիսկը նվազեցնելու համար կարանտինային ռեժիմը կպահպանվի եւս վեց ամիս՝ մինչև 2021 թվականի հուլիսի 11-ը ժամը 17:00-ն։

Միեւնույն ժամանակ, ըստ առողջապահության նախարարության տարածած հաղորդագրության, կատարվել են կարանտինի ընթացքում կիրառվող միջոցառումների և սահմանափակումների որոշակի մեղմացումներ։ Մասնավորապես, եթե նախկին կարանտինային ռեժիմի ընթացքում (որը հաստատվել էր 2020 թվականի սեպտեմբերի 11-ին՝ շարունակվելով մինչև 2021թ․ հունվարի 11-ը) թույլատրվում էր անցկացնել մի շարք միջոցառումներ՝ 60-ից ոչ ավելի անձանց մասնակցությամբ, ապա հիմա հանվել են հանրային միջոցառումների համար մասնակիցների թվի սահմանափակումը եւ փակ տարածքներում միջոցառումների կազմակերպմանը ներկայացվող պահանջները։

Մեկ այլ փոփոխության համաձայն, Հայաստանի Հանրապետության քաղաքացի չհանդիսացող անձինք կարող են հատել սահմանը և մուտք գործել Հայաստանի Հանրապետություն նաև ցամաքային սահմանային անցման կետերով, եթե Հայաստանի տարածք մուտք գործելիս ներկայացվում է կորոնավիրուսային հիվանդության (COVID-19) ախտորոշման պոլիմերազային շղթայական ռեակցիայի  (ՊՇՌ) հետազոտության բացասական արդյունքը հավաստող առավելագույնը 72 ժամ վաղեմության սերտիֆիկատ, կամ սահմանային անցակետում իրականացվում է նմուշառում և տրվում է ինքնամեկուսացման հրահանգ մինչև ՊՇՌ հետազոտության բացասական արդյունքի ստացումը։ Նախկինում՝ այս պահանջը ներկայացված էր միայն օդային  սահմանային անցման կետերում: 

«Կարանտինի երկարաձգումը հնարավորություն կտա շարունակել պահպանել այնպիսի միջոցառումների իրականացումը, ինչպիսիք են, օրինակ, դիմակների կրումը, սահմանների անցման դեպքում ՊՇՌ հետազոտության պահանջը և այլն»,- համապատասխան նախագծի անհրաժեշտությունը հիմնավորելով՝ ֆեսբուքյան իր էջում գրել էր Առողջապահության  նախարարի խոսնակ Ալինա Նիկողոսյանը։ Նա նշել էր, որ այդ նախագծով որևէ  տնտեսական գործունեության տեսակի վրա արգելք սահմանված չէ, այլ սահմանված են պահանջներ, որոնք հնարավորություն են տալիս նվազեցնել կորոնավիրուսային հիվանդության վարակման ռիսկը։

Թեև Առողջապահության նախարարությունը պնդում է, որ կարանտինի երկարաձգումը, որևէ բացասական ազդեցություն չի ունենա տնտեսության վրա, այդուհանդերձ, կարանտինային ռեժիմի երկարաձգումից առաջ տնտեսավարողները հանդես եկան հայտարարությամբ՝ հայտնելով իրենց անհամաձայնությունը։  Հայաստանի 71 խոշոր ընկերությունները «Մանթաշով» գործարարների միության անունից կոչ էին անում չերկարաձգել կարանտինը՝ համոզված լինելով, որ եւս 6 ամսով այդ ռեժիմը շարունակելը պարալիզացնելու է հայաստանյան տուրիստական, ռեստորանային, միջոցառումների կազմակերպման և այլ ոլորտների գործունեությունը։ «2020 թվականին նոր տեսակի կորոնավիրուսի ու պատերազմի պատճառով Հայաստանի տնտեսությունն ահռելի կորուստներ է կրել՝ ունենալով առնվազն 8% անկում։ Դա իր հետ բերել է աշխատատեղերի կրճատում, աղքատության թվի ավելացում, սոցիալական լարվածություն, ապրանքների և ծառայությունների մրցունակության նվազում»,- մասնավորապես նշվում էր հայտարարության մեջ։

Իսկ ՀՀ Էկոնոմիկայի նախարար Վահան Քերոբյան, օրեր առաջ Հանրային հեռուստաընկերությանը տված հարցազրույցում նշել էր, որ իր ղեկավարած գերատեսչությունը  կողմ չէ կարանտինի երկարաձգման ռեժիմին՝ տնտեսությանը հիմա ամենաշատը հարկավոր է թթվածին:

Առողջապահության նախարարի մամուլի խոսնակ Ալինա Նիկողոսյանն, արձագանքելով նախարար Քերոբյանի մտահոգությանը, ֆեսբուքյան իր էջում գրել էր՝ «Անցած ամիսներին էլ կորոնավիրուսիային հիվանդությամբ բուժվող անձանց էր թթվածին անհրաժեշտ, ինչն Առողջապահության նախարարության ջանքերով ապահովվել է»։

Առողջապահության  նախարար Արսեն Թորոսյանը եւս ավելի ուշ անդրադարձել էր խնդրին՝ նշելով, որ անթույլատրելի է կարանիտի իրավական ռեժիմը տնտեսական դժվարությունների պատճառ համարելը։ Ըստ Թորոսյանի, այն պատճառի դեմ պայքարի գործիքն է։ «Ինչ վերաբերում է տնտեսական դժվարությունների պատճառին, ապա այն համաճարակն է, որը հանգեցրել է խոչընդոտների տրանսազգային բեռնա և ուղևորափոխադրումների, զբոսաշրջության հարցում, բազմաթիվ երկրներում տարբեր հումքային արտադրությունների սահմանափակումների պատճառով այլ երկրներում արտադրությունների սահմանափակումների և այլն», – ֆեսբուքյան իր էջում գրել էր Թորոսյանը:

Նրա խոսքով՝ ամբողջ աշխարհում գործող հակահամաճարակային միջոցառումներն են, որ պայքարելով համաճարակի դեմ, բերելու են տնտեսությունների ակտիվացման և ոչ թե հակառակը:

Թորոսյանը վստահեցնում է՝ այդ հարցը կապված է համաճարակային իրավիճակի հետ, երբ մեր երկրում օրական դեռ արձանագրվում է Covid–ի մոտ 300 նոր դեպք։

Նշենք, որ հունվարի 11-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 162 հազար 288 դեպք, որոնցից 149 հազար 873-ն` առողջացած, 2 հազար 931-ը` մահվան ելքով: Կորոնավիրուսային հիվանդությամբ այս պահին փաստացի բուժում է ստանում 8 հազար 782 պացիենտ:

ՄԵՐԻ ԽԱՉԱՏՐՅԱՆ