Թուրքիան հավակնում է դառնալ կորոնավիրուսի նոր էպիկենտրոն. իրավիճակը երկրում

Վերջին չորս օրվա ընթացքում Թուրքիայում 200 հազար մարդ է վարակվել կորոնավիրուսով, նոր հիվանդների թիվը շարունակում է կտրուկ աճել: Այս ամենը համընկել է մահմեդականների համար սուրբ Ռամադան ամսվա մեկնարկի հետ, որը տեղի է ունենում կոշտ հակավիրուսային միջոցառումների ֆոնին:

«Վարակների և մահացությունների թվի վերջին աճը, հատկապես խոշոր քաղաքներում, մեզ ստիպում է նորից խստացնել հակավիրուսային միջոցառումները», - կառավարության նիստից հետո կայացած մամուլի ասուլիսում այսօր ասել է Թուրքիայի նախագահ Ռեջեփ Թայիփ Էրդողանը:

Վերջին շաբաթվա ընթացքում երկրում նոր վարակների օրական քանակը չի իջել 50 հազարի սահմանից:

«Մեր նպատակն է Ռամադանի առաջին երկու շաբաթվա ընթացքում հասնել նոր վարակների և մահվան դեպքերի զգալի կրճատմանը: Եթե չկարողանանք դրան հասնել, շատ ավելի խիստ միջոցառումները կլինեն անխուսափելի», - հավելել է Թուրքիայի նախագահը: Ավելի խստացված միջոցները կարող են նշանակել լիարժեք լոքդաուն՝ փողոց դուրս գալու  լիակատար արգելակմամբ:

Թուրքիայի ներքին գործերի նախարարությունը չորեքշաբթի հայտարարել է պարետային ժամի երկարացման, մի քաղաքից մյուսը բնակչության տեղաշարժի արգելքի, մարզադահլիճների և լողավազանների փակման, հարսանիքների արգելքի և դպրոցների առցանց ուսուցմանը վերադառնալու մասին: Հասարակական տրանսպորտը սահմանափակվել  է 50% -ով, և 65 տարեկանից բարձր անձինք այժմ կարող են լքել իրենց տները միայն առավոտյան 10-ից մինչև 14:00-ն:

Սահմանափակող միջոցառումները խստանում են Թուրքիայի բոլոր նահանգներում, նույնիսկ եթե այնտեղ համաճարակային իրավիճակը համարվում է համեմատաբար հանգիստ:

Ըստ ԱՀԿ-ի, Թուրքիայում վարակակիրների թվի աճը սկսվել է մարտի կեսերին: Մինչև մարտի 31-ը նոր դեպքերի քանակը գերազանցել է դեկտեմբերի գագաթնակետային ցուցանիշը (33 հազար) և հասել 37 հազարի:

Մեկ շաբաթ առաջվա դրությամբ վարակվածների թիվը հասել է 49 հազար դեպքի մեկօրյա ցուցանիշի, հաջորդ օրը այն հասել է 54 հազարի և դրանից հետո չի իջել 50 հազարից: Այսօրվա տվյալներով,  Թուրքիայում կորոնավիրուսի հետևանքով ավելի քան 34 հազար մահ կա:

Միևնույն ժամանակ, երկրում շարունակվում է բնակչության պատվաստումը: Անցյալ կիրակի օրվա դրությամբ Թուրքիայում պատվաստվել է ավելի քան 18 միլիոն քաղաքացի, նրանց մեծ մասը ՝ չինական ընկերության Sinovac պատվաստանյութով:

Շատերը կարծում են, որ վարակի ակտիվության աճի պատճառը մարտի սկզբին սրճարանների և ռեստորանների բացումն է, ինչին իշխանությունները գնացել են տնտեսությանը օգնելու համար: Դեռ մարտի կեսերին Էրդողանն ասել էր, որ կառավարությունը չի պատրաստվում խստացնել կարանտինային միջոցառումները:

Ընդդիմությունն ու որոշ բժիշկներ անցյալ շաբաթ ավելի կոշտ արգելափակման կոչ էին արել: Ստամբուլի քաղաքապետ Էքրեմ Իմամօղլուն BBC-ի հետ զրույցում նշել է, որ այդ ժամանակ քաղաքի շուրջ միլիոն բնակիչներ ամեն օր օգտվում էին հասարակական տրանսպորտից:

Որպես կանոն, վարակների մակարդակի արագ աճի ֆոնին, հիմնական բեռը ընկնում է հիվանդանոցների վրա: Ավելի վաղ որոշ թուրք փորձագետներ ասում էին, որ համաճարակը կարող է հանգեցնել երկրի առողջապահական համակարգի փլուզմանը:

«Ամեն օր նոր դեպքերի թիվն ավելանում է: Ամեն օր մահացությունների թիվ է աճում: Վերակենդանացման բաժանմունքներում տագնապալի իրավիճակ է», - անցած շաբաթ ասել է Թուրքիայի ինտենսիվ թերապիայի բաժանմունքների ասոցիացիայի ղեկավար Իսմայիլ Սինելը:

«Ցավոք, մենք կարանտինային մեղմ միջոցներ ենք կիրառել և չկարողացանք արագացնել պատվաստումները», - անցած ուրբաթ Hurriyet  թերթին ասել է Առողջապահության նախարար Ֆահրեթին Քոջան` հավելելով, որ նման տեմպերի շարունակման դեպքում 3-4 շաբաթից հիվանդանոցային բուժման կարիք ունեցող հիվանդները լուրջ խնդրի առաջ են կանգնելու:

Նախարարի խոսքով, այժմ երկրի հիվանդանոցները լցված են 55% -ով, իսկ վերակենդանացման բաժանմունքները` 67,4% -ով:

Քոջայի խոսքերով, Թուրքիայում համաճարակը մեկ առանձնահատկություն ունի. վարակման նոր դեպքերի մոտ 85% -ը անցյալ տարվա աշնանը Բրիտանիայում հայտնաբերված կորոնավիրուսի նոր շտամով վարակներն են:

Այս խիստ վարակիչ շտամը դարձել է Բրիտանիայի ժամանակավոր մեկուսացման պատճառը  Եվրոպայի մնացած մասից: Ավելի վաղ բրիտանացի գիտնականները կանխատեսում էին, որ այն կարող է գերիշխող դառնալ ամբողջ աշխարհում և ինչպես իրավիճակն է ցույց տալիս, այդպես էլ լինում է:

Բացի այդ, Թուրքիայում հայտնաբերվել են ևս երկու շտամներ ՝ Հարավային Աֆրիկայից և Բրազիլիայից, բայց միայն փոքրաթիվ դեպքերում: 

Հարավաֆրիկյան տարբերակը հաստատվել է 11 նահանգում 285 մարդու մոտ, իսկ բրազիլական տարբերակը՝ 9-ը նահանգում, 166 մարդու մոտ:

Թուրքիայում վարակի նման ցուցանիշը համարվում է համաճարակի նոր պիկ, որը հատկապես մեծ հարված է հասցնում երկրի տնտեսության առաջնային օղակներից մեկին՝ զբոսաշրջությանը:

Հիշեցնենք, օրեր առաջ Ռուսաստանի Դաշնությունը հայտարարեց դեպի Թուրքիա կանոնավոր ուղևորափոխադրումների դադարեցման մասին: Մշակվում են մեխանիզմներ՝ այնտեղ գտնվող ռուս զբոսաշրջիկների տեղափոխումն ապահովելու համար: