Հետևողական եղեք, որ պահակները երեկոյան ժամերին դպրոցի դահլիճները չտրամադրեն ինչ-որ անհայտ ծագման տղաների. Շիրակի մարզպետ

Շիրակի մարզպետ Նազելի Բաղդասարյանն այսօր աշխատանքային ընդլայնված  խորհրդակցություն է անցկացրել մարզի հանրակրթական դպրոցների տնօրենների մասնակցությամբ: Ասելիքը հստակ է եղել՝ դպրոցը զերծ պահել քաղաքականությունից, իսպառ բացառել դրամահավաքությունը: Քանի որ տարին մոտենում է ավարտին, մարզպետն ուշադրությունը հրավիրել է հատկապես 4-րդ, 9-րդ, 12-րդ դասարանների ավարտական Վերջին դասերի ու Վերջին զանգի միջոցառումների վրա:

«Ես խնդրում եմ, որ առավել նրբանկատ լինեք հատկապես այն երեխաների նկատմամբ, որոնք խոցելի սոցիալական խմբում են: Գիտեմ, որ կլինեն ծնողներ, որոնք կասեն՝ ես իմ երեխան, ոնց կուզեմ, այդպես էլ կանեմ: Բայց այդ ծնողներն իրենց երեխաներին ոնց ուզեն ու ինչով ուզեն կարող են գոհացնել իրենց տանը: Դպրոցի պատերից ներս սոցիալական շերտերի աննշան տարբերություն անգամ չպետք է զգա ոչ մի աշակերտ»,- նկատել է մարզպետն ու շեշտել՝ հետևողական է լինելու:

Դրամահավաքության բացառումը, ըստ մարզպետի, վերաբերում է նաև դպրոցներում տարաբնույթ տոմսերի վաճառքին: Բաղդասարյանը հանձնարարել է միջնորդ չդառնալ որևէ կազմակերպության համար:

Խոսվել է նաև որոշ դպրոցներում ընդունված միասնական հագուստ կրելու հանգամանքից: Մարզպետի խոսքով՝ անձամբ իր համար ընդունելի չէ, հետո էլ նման մոտեցումը նաև ֆինանսական ծախս է ենթադրում, ինչն անցանկալի է: Միաժամանակ դպրոցների տնօրեններին հանձնարարվել է կարգի բերել աշակերտների, հատկապես աշակերտուհիների հագուստ-կապուստը, ապահովել աշակերտական տեսքերով դպրոցական միջավայր:

Մարզպետը նշել է, որ ցավոտ արձանագրում ունի. վերջին տարիներին հատկապես ավագ դպրոցներում ուսուցիչ-աշակերտ տարբերությունը գրեթե աննկատ է:

«Հատկապես իգական սեռի ներկայացուցիչների մասին է խոսքը, որոնք պճնված են գալիս: Ես չգիտեմ՝ հիմա ինչպիսի՞ն են բարքերն ու ծնողների մոտեցումներն այս հարցին, բայց երբ ես էի դպրոցական, մենք եղունգի անգույն լաք անգամ իրավունք չունեինք դպրոցում օգտագործել: Եվ դա նորմալ է: Ես չեմ ուզում որևէ մեկի իրավունքի ոտնահարում դիտարկվի ասածս, բայց եկեք դպրոցը պահենք դպրոցին հարիր վիճակում, որպեսզի ուսուցիչը մտնի դասարան և կաշկանդված չզգա իրեն: Դպրոցում կենտրոնացեք կրթության և դաստիարակության վրա»,-շեշտել է Նազելի Բաղդասարյանը:

Կրթությանը զուգահեռ մարզպետը հորդորել է մեծ ուշադրություն դարձնել նաև հայրենասիրության գաղափարի ամրապնդմանը: Բաղդասարյանը հստակ ընդգծել է՝ հայրենասիրությունը ոչ մի պարագայում չշփոթել քաղաքականության հետ, դպրոցը չներքաշել քաղաքական գործընթացների տիրույթ: Նման քայլ անողներին խիստ պատիժ է սպասվում: Մարզպետն անուններ չի նշել, սակայն ակնարկել է, որ բոլորի քայլերին ծանոթ է:

Խորհրդակցության ընթացքում քննարկվող մտահոգիչ կետերից է եղել դպրոցի տնօրենի թափուր տեղի համար հայտարարվող մրցույթներին թեկնածուների իսպառ բացակայությունը, կամ լավագույն դեպքում մեկ թեկնածուով մրցույթի անցկացումը: Սակայն ոչ թե այլ անձանց դիմելիությունը խոչընդոտվում է, այլ իսկապես չկան դիմողներ, հավանաբար լիցենզիայի կամ մեկ այլ մասնագիտական խնդրի պատճառով:

Շիրակի մարզպետը տնօրեններին նաև այլ ասելիք է ունեցել:

«Ես դպրոցների տնօրեններին ընդունում եմ միայն այն ժամանակ, երբ արդեն նշանակվում են: Սա սկզբունք է ինձ համար, որ որևէ տնօրեն, կներեք, իհարկե, բայց չհամարձակվի մինչև ընտրությունը գալ մարզպետի մոտ: Ասեմ, որ միջամտություններ կամ զարտուղի ճանապարհներով մարզպետին տեսնելու ցանկություններ ունեցողներ եղել են, բայց մեկ անգամ ևս շեշտում եմ, որ այդ արատավոր համակարգին մենք վերջ ենք դրել: Հորդորում եմ նրանց, ովքեր հավակնում են դառնալ այս կամ այն դպրոցի տնօրենը, եթե փորձեն որևէ կերպ կապի դուրս գալ մարզպետի հետ, սա ինձ համար ազդակ կլինի, որ տվյալ թեկնածուն ցանկալի չէ: Փորձեք ձեր ուժերով մասնակցել մրցույթին և դառնալ տնօրեն»,- հորդորել է նա:

Հաջորդ խնդիրը, ըստ մարզպետի, կապված է դպրոցների հաստիքացուցակների հետ: Ճիշտ է, Շիրակում կան կադրեր, որոնց կարիքը զգացվում է, և որոշ առարկաների դասավանդման համար չկան մասնագետներ, սակայն դա չի նշանակում, որ դպրոցում 70-ից բարձր տարիք ունեցող մանկավարժ պետք է դասավանդի:

«Հատկապես բնագիտամաթեմատիկական առարկաների մասին է խոսքը: Շատ դեպքերում 65, 70, երբեմն ավելի մեծ տարիքով ուսուցիչ ունենք դպրոցում, բայց այդ տարիքում մոտիվացիան քիչ է, որ նրանք կգնան ատեստավորման: Մենք հարգում ենք բոլորի տարիքն ու մասնագիտական փորձը, բայց մեր տարեց գործընկերներին պետք է ուղարկենք վաստակած հանգստի, ճանապարհ տանք երիտասարդներին: Փուլային լուծում պետք է տալ այս խնդրին»,- հայտարարել է Նազելի Բաղդասարյանը:

Վարչական մասում ևս քիչ չեն խնդիրները: Դպրոցներ կան, որտեղ պահակը 82 կամ 79 տարեկան պապիկ է, ասել է նա.

«Ի՞նչն են հսկում այս մարդիկ, հասկանում ենք, չէ՞, որ պարզապես հաստիքներ են զբաղեցնում: Գյուղական բնակավայրերում դպրոցին մոտ ապրող մարդն է պահակը հիմնականում: Այս հաստիքներն ուռճացված են: Եկեք օբյեկտիվ լինենք: Ես հարգում եմ բոլորին, բայց պետք է արդյունավետ աշխատել: Հիմա կարող եք ներքին անհամաձայնություն ունենալ, բայց 78-ից բարձր տարիք ունեցողն ընդունելի չէ, որ դպրոցում աշխատանքի մեջ լինի»,- ասել է Բաղդասարյանը:

Գրեթե բոլոր դպրոցներում ընդհանուր մեկ խնդիր էլ կա: Հատկապես երեկոյան ժամերին դպրոցների տարածքները, մարզադահլիճները վարձակալում են տարբեր մարդիկ: Մարզպետն ասել է, որ այս հարցն էլ են քննարկել: Եթե դրանք ինչ-որ պարային կամ այլ համույթների են տրվում, այսուհետ մարզպետարանի համաձայնությունը ստանալուց հետո նման քայլի դիմեն:

«Անվանական չեմ ասի, բայց ավելի հետևողական եղեք, որ պահակները երեկոյան ժամերին դպրոցի դահլիճները չտրամադրեն ինչ-որ անհայտ ծագման տղաների՝ ֆուտբոլ կամ բասկետբոլ խաղալու համար, և սա անում են գումարով: Ես Գյումրիից եմ, և քաղաքը 5 մատիս նման գիտեմ, թե ով որտեղ ինչ է անում: Բոլոր նման գործընթացներին վերջ է տրվելու: Խիստ վերահսկողություն է լինելու, որովհետև շատերն են կարծում, որ մարզպետարանում ոչնչից տեղյակ չեն: Ուզում եմ իմանաք՝ ամեն ինչից տեղյակ եմ, մի բան էլ ավելի»,- հանդիպումը եզրափակել է Շիրակի մարզպետը:

Սամսոն Մատինյան